ໂດຍ: ຍຸພິນທອງ

ໃນໂອກາດເປີດງານບຸນນະມັດສະການພະທາດຫຼວງຢ່າງເປັນທາງການ ແລະ ເປີດປີທ່ອງທ່ຽວລາວປີ 2024 ແລະ ງານວາງສະແດງສິນຄ້າ ທີ່ເດີ່ນພະທາດຫຼວງ ໃນວັນທີ 23 ພະຈິກ 2023 ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ວ່າ:ໃນການຈັດງານບຸນນະມັດສະການພະທາດຫຼວງວຽງຈັນປີນີ້ທາງອົງການປົກຄອງນະຄອນຫຼວງວຽງຈັນໄດ້ຖອດຖອນບົດຮຽນໃນການຈັດງານບຸນໃນປີຜ່ານມາເປັນປີທີ່ຜ່ານການເກີດພະຍາດໂຄວິດ-19 ເຮັດໃຫ້ການກະກຽມງານບຸນແມ່ນມີເວລາໜ້ອຍ ອີງໃສ່ການຖອດຖອນບົດຮຽນໃນປີຜ່ານມາ ປີນີ້ຈຶ່ງໄດ້ມີການກະກຽມ ແລະ ອອກແບບ ວາງແຜນຈັດງານບຸນໂດຍເນັ້ນໃສ່ສົ່ງເສີມ ອະນຸລັກ ວັດທະນະທຳ, ຮີດຄອງປະເພນີ, ສົ່ງເສີມຜະລິດຕະພັນລາວ ສີມືແຮງງານລາວເພື່ອເປັນການຊຸກຍູ້ສົ່ງເສີມການຜະລິດ ກໍຄືການຊົມໃຊ້ສິນຄ້າຜະລິດຕະພັນພາຍໃນຂອງພວກເຮົາເປັນຕົ້ນຕໍ ພ້ອມທັງໄດ້ມີງານອອກແບບປະດັບປະດາເອຍ້ອງ ຮ້ານວາງສະແດງສິນຄ້າ ແລະ ຈັດໃຫ້ມີຈຸດຖ່າຍຮູບ ແລະ ສະຖານທີ່ອື່ນໂດຍເນັ້ນອອກແບບທີ່ງົດງາມຮັກສາໄດ້ເອກະລັກຂອງລາວເຮົາ ແລະ ໄດ້ຈັດສັນຄວາມເປັນລະບຽບຮຽບຮ້ອຍເພື່ອບໍ່ໃຫ້ມີຄວາມແອອັດ ແນໃສ່ໃຫ້ມວນຊົນທີ່ເຂົ້າມາທ່ຽວງານບຸນມີຄວາມສະດວກສະບາຍ.

ທ່ານເຈົ້າຄອງກ່າວຕື່ມວ່າ: ສຳລັບກິດຈະກຳການຊື້-ຂາຍແມ່ນມີຄວາມຫຼາກຫຼາຍ ມີບັນຍາກາດການຊື້-ຂາຍສິນຄ້າທີ່ຟົດຟື້ນຄາດມີວ່າທຶນໝູນວຽນການຊື້-ຂາຍຫຼາຍກວ່າສິບຕື້ກີບ ການຈັດງານວາງສະແດງ ແລະ ຂາຍສິນຄ້າປີນີ້ໄດ້ຈັດຢູ່ 2 ຈຸດຄື: 1.ຈຸດບໍລິເວນເດີນສະໜາມຫຼວງແມ່ນວາງສະແດງ ແລະ ຂາຍສິນຄ້າຜະລິດຕະພັນລາວ ຊຶ່ງເປັນການສົ່ງເສີມຜະລິດຕະພັນລາວເປັນຫຼັກ ເຊັ່ນ: ສິນຄ້າໂອດັອບຂອງບັນດາເມືອງຕ່າງໆ ພ້ອມນັ້ນກໍຍັງມີສິນຄ້າໂອດັອບທີ່ມາຈາກຕ່າງແຂວງຈຳນວນໜຶ່ງ, 2. ແມ່ນວາງສະແດງ ແລະ ຂາຍສິນຄ້າຢູ່ສູນການຄ້າລາວ-ໄອເຕັກເປັນການຂາຍສິນຄ້າທົ່ວໄປ ແລະ ພິເສດໃນປີນີ້ ໄດ້ເຊີນບັນດາປະເທດໃກ້ຄຽງ ເຂົ້າມາຮ່ວມງານ ແລະ ສ້າງເງື່ອນໄຂໃຫ້ມີການນໍາເອົາຜະລິດຕະພັນສິນຄ້າມາແລກປ່ຽນວາງສະແດງ ແລະ ຂາຍໃນງານ. ນອກຈາກນັ້ນ ໃນງານຍັງມີ ກິດຈະກຳຫຼາຍຢ່າງເຊັ່ນ:ການສະແດງສິລະປະວັນນະຄະດີ (ຢູ່ເວທີກາງ) ຊຶ່ງຄະນະກຳມະການໄດ້ຈັດສັນກໍານົດໃຫ້ມີເນື້ອໃນ ລາຍການສະແດງທີ່ຫຼາກຫຼາຍ ຈາກຫຼາຍພາກສ່ວນມີການຟ້ອນຂັບລຳຈາກກອງ ສິລະປະກອນສູນກາງ,ສິລະປະກອນກອງທັບ,ສິລະປະຈາກບັນດາເມືອງສູນວັດທະນະທຳເດັກ ແລະ ສະໂມສອນດ່ານຊ້າງ ເປັນໂອກາດໃຫ້ຊາວໜຸ່ມໄວໜຸ່ມ,ນັກສິລະປິນ,ນັກປະດິດຄິດແຕ່ງ ໄດ້ມີໂອກາດສະແດງອອກ ແລະ ໄດ້ໂຄສະນາເຜີຍແຜ່ວັດທະນະທໍາລາວອັນດີງາມຂອງຊາດລາວ ສູ່ແຂກຕ່າງດ້າວທ້າວຕ່າງເມືອງທີ່ມາທ່ຽວຊົມງານໄດ້ສຳຜັດ ແລະ ຮ່ວມເບີກບານມ່ວນຊື່ນ ແລະ ສິ່ງສຳຄັນ ແລະ ພົ້ນເດັ່ນອີກຢ່າງໜຶ່ງໃນການຈັດງານປີນີ້ແມ່ນໄດ້ເອົາໃຈໃສ່ວຽກງານການຈັດສັນຄວາມເປັນລະບຽບຮຽບຮ້ອຍຄວາມສະອາດຈົບງາມ ໂດຍສະເພາະໄດ້ເອົາໃຈໃສ່ຮັກສາສິ່ງແວດລ້ອມ ໂດຍໄດ້ຊຸຸກຍູ້ສົ່ງເສີມທຸກພາກສ່ວນ ແລະ ປຸກລະດົມມວນຊົນຮ່ວມກັນໃນການເປັນເຈົ້າພາບຕ້ອນຮັບແຂກພາຍໃນ ແລະ ຊາວຕ່າງປະເທດ ທີ່ຈະມາທ່ຽວຊົມໃນງານບຸນ ດ້ວຍຄວາມເປັນເຈົ້າການຮ່ວມກັນ ໃນການຕ້ອນຮັບແຂກ ຮ່ວມກັນເປັນເຈົ້າພາບທີ່ດີ ແລະ ຮ່ວມກັນຮັກສາຄວາມສະຫງົບ ຄວາມເປັນລະບຽບຮຽບຮ້ອຍພາຍໃນງານບຸນດັ່ງກ່າວ.