ຫວ່າງບໍ່ດົນມານີ້ ທີ່ຫ້ອງການກະສິກໍາ ແລະ ປ່າໄມ້ເມືອງວຽງຄໍາ ແຂວງຫຼວງພະບາງ ໄດ້ມີພິທີ ມອບ-ຮັບໂຄງການກໍ່ສ້າງຫ້ອງການຫຼັງໃໝ່ ໂດຍມີ ທ່ານ ສີພອນ ມິດໄມຕີ ຮອງເຈົ້າເມືອງວຽງຄໍາ, ພ້ອມດ້ວຍຫົວໜ້າ-ຮອງຫົວໜ້າຫ້ອງການ, ກົມກອງ, ພະແນກທີ່ກ່ຽວຂ້ອງຂອງແຂວງ, ອຳນວຍການບໍລິສັດຜູ້ຮັບເໜົາກໍ່ສ້າງ ພ້ອມດ້ວຍທີມງານ ເຂົ້າຮ່ວມ.

ໃນພິທີ, ທ່ານ ຈັນທີ ອິນທິສັກ ອຳນວຍການບໍລີສັດ ວິລະໄຊ ກໍ່ສ້າງ ເຄຫະສະຖານ ແລະ ສ້ອມແປງ ຈໍາກັດ ໄດ້ລາຍງານການຈັດຕັ້ງປະຕິບັດໂຄງການວ່າ: ໂຄງການກໍ່ສ້າງຫ້ອງການກະສິກຳ ແລະ ປ່າໄມ້ເມືອງວຽງຄໍາ ຫຼັງໃໝ່ ໄດ້ລົງມືກໍ່ສ້າງແຕ່ວັນທີ 5 ສິງຫາ 2022 ຫາ ວັນທີ 15 ພະຈິກ 2023 ໄດ້ສໍາເລັດກ່ອນສັນຍາ 9 ເດືອນ; ເປັນອາຄານ 2 ຊັ້ນ, ຂະໜາດກວ້າງ 10 ແມັດເຄິ່ງ, ຍາວ22 ແມັດ, ມີ ຫ້ອງເຮັດວຽກ 9 ຫ້ອງ, ຫ້ອງປະຊຸມ 1 ຫ້ອງ, ສາງເຄື່ອງ 1 ຫ້ອງ, ຫ້ອງນໍ້າລວມ 2 ຫ້ອງ ແລະຫ້ອງຕ້ອນຮັບແຂກ 2 ຫ້ອງ ແຕ່ລະຫ້ອງປະກອບດ້ວຍເຄື່ອງເຟີນີເຈີ, ອຸປະກອນ-ລະບົບໄຟຟ້າ ແລະ ນໍ້າປະປາຄົບຊຸດ ຕາມເນື້ອໃນສັນຍາ; ມູນຄ່າໃນການກໍ່ສ້າງ 3 ຕື້ 8 ຮ້ອຍກວ່າລ້ານກີບ ໂດຍແມ່ນທຶນຂອງລັດ 100%.

ໂອກາດນີ້, ພິທີໄດ້ເຊັນສັນຍາ ມອບ-ຮັບ ໂຄງການກໍ່ສ້າງລະຫວ່າງສອງຝ່າຍ ຢ່າງເປັນທາງການ, ຈາກນັ້ນ ທ່ານ ສີພອນ ມິດໄມຕີ ໄດ້ມີຄໍາເຫັນຊີ້ນໍາ ເພື່ອເປັນແນວທາງໃນການປົກປັກຮັກສາ, ການຄຸ້ມຄອງອາຄານມີປອດໄພ, ຊົມໃຊ້ ແລະເຄື່ອນໄຫວ ຈັດຕັ້ງປະຕິບັດໜ້າທີ່ໃຫ້ໄດ້ຮັບຜົນດີ ແລະເກີດປະໂຫຍດສູງສຸດຕື່ມອີກ.

ຂ່າວ-ພາບ: ບຸນທັນ ໄຊຍະວົງ