ກອງບັນຊາການປ້ອງກັນຄວາມສະຫງົບ (ປກສ) ແຂວງເຊກອງໄດ້ຈັດພິທີປະກາດການເລື່ອນຊັ້ນໃຫ້ນາຍຕຳຫຼວດຜູ້ທີ່ມີຜົນງານດີເດັ່ນ, ຫ້າວຫັນ ແລະ ເຮັດສໍາເລັດໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້ ແລະ ຄົບມາດຖານເງື່ອນໄຂໃນການເລື່ອນຊັ້ນຂຶ້ນຫວ່າງບໍ່ດົນມານີ້ພາຍໃຕ້ການເປັນປະທານຂອງທ່ານ ພັອ ຄຳບານ ພົມມະນີວົງ ກຳມະການພັກແຂວງ ເລຂາຄະນະພັກ ຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ພັທ ແສງວົງຈອນ ດາວລາສີງ ຮອງຫົວໜ້າຫ້ອງການເມືອງ ກອງບັນຊາການ ປກສ ແຂວງໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການປະກາດເລື່ອນຊັ້ນໃຫ້ນາຍ ແລະ ພົນຕຳຫຼວດທີ່ຂຶ້ນກັບກອງບັນຊາການ ປກສ ແຂວງເຊກອງລວມທັງໝົດ 38 ສະຫາຍ ຍິງ 6 ສະຫາຍ. ໃນນີ້ເລື່ອນຊັ້ນພັນຕີຂຶ້ນຊັ້ນພັນໂທ 9 ສະຫາຍ, ເລື່ອນຊັ້ນຮ້ອຍເອກຂຶ້ນຊັ້ນພັນຕີ 1 ສະຫາຍ ແລະ ເລື່ອນຊັ້ນຮ້ອຍໂທຂຶ້ນເປັນຊັ້ນຮ້ອຍເອກ 28 ສະຫາຍ ຍິງ 6 ສະຫາຍຜູ້ທີ່ໄດ້ຮັບການເລື່ອນຊັ້ນຄັ້ງນີ້ແມ່ນໄດ້ຜ່ານການຝຶກຝົນຫຼໍ່ຫຼອມທາງດ້ານຄຸນສົມບັດ, ມີຄວາມຮູ້ຄວາມສາມາດ, ມີຄວາມສາມັກຄີ, ຫ້າວຫັນ ແລະ ເຮັດສໍາເລັດໜ້າທີ່ວຽກງານໃຫ້ກຽດປະດັບຊັ້ນໂດຍທ່ານ ພັອ ຄໍາບານ ພົມມະນີວົງ.

ຈາກນັ້ນ, ທ່ານນາງ ກອງມະນີ ສຸວັນນະສານ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະພັກປະຈຳພັກແຂວງ ສະບັບເລກທີ 18/ຄປພຂ,ຊກ ລົງວັນທີ 31 ຕຸລາ 2023 ວ່າດ້ວຍການບົງຕົວແຕ່ງຄະນະພັກກອງບັນຊາການ ປກສ ແຂວງ; ຄະນະປະຈໍາພັກແຂວງຕົກລົງແຕ່ງຕັ້ງທ່ານ ພັທ ຈັນທອນ ພົງພິຈິດ ເລຂາໜ່ວຍພັກ ຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານເປັນຄະນະພັກກອງບັນຊາການ ປກສ ແຂວງ.

ໂອກາດນີ້, ທ່ານ ພັອ ຄໍາບານ ພົມມະນີວົງ ກໍໄດ້ໂອ້ລົມເນັ້ນໃຫ້ຜູ້ໄດ້ຮັບການເລື່ອນຊັ້ນ ແລະ ຜູ້ທີ່ໄດ້ຮັບການແຕ່ງຕັ້ງຕ້ອງເພີ່ມທະວີຄົ້ນຄວ້າເຊື່ອມຊຶມ ແລະ ກໍາແໜ້ນແນວທາງຂອງພັກ, ແຜນນະໂຍບາຍຂອງລັດ ໂດຍສະເພາະແມ່ນມະຕິ, ຄໍາສັ່ງທີ່ພົວພັນເຖິງໜ້າທີ່ຄວາມຮັບຜິດຊອບຂອງຕົນ; ເພີ່ມທະວີຄວາມເປັນແບບຢ່າງນໍາໜ້າ, ຄວາມຮັບຜິດຊອບຕໍ່ໜ້າທີ່ການເມືອງ, ສຸມທຸກກຳລັງແຮງ ແລະ ສະຕິປັນຍາປະກອບສ່ວນເຂົ້າໃນການນໍາພາ-ບັນຊາກໍຄືການຈັດຕັ້ງປະຕິບັດວຽກງານວິຊາສະເພາະຂອງຕົນທີ່ການຈັດຕັ້ງມອບໝາຍໃຫ້ສໍາເລັດ ແລະ ເອົາໃຈໃສ່ຊອກຮູ້ຮໍ່າຮຽນຍົກລະດັບຄວາມຮູ້-ຄວາມສາມາດດ້ວຍວິທີການຕ່າງໆໃຫ້ສູງຂຶ້ນ ເພື່ອປະກອບສ່ວນພັດທະນາວຽກງານປ້ອງກັນຄວາມສະຫງົບແຂວງໃຫ້ເຕີບໃຫຍ່ຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ.

ຂ່າວ-ພາບ: ປກສ ແຂວງເຊກອງ