ວັນທີ 23 ພະຈິກ ຜ່ານມານີ້, ທີ່ພະແນກອຸສາຫະກໍາ ແລະການຄ້າ (ພອຄ) ແຂວງເຊກອງ ໄດ້ມີພິທີມອບ-ຮັບໃບຍ້ອງຍໍ ຜົນງານປີ 2022 ໃຫ້ແກ່ພະນັກງານ-ລັດຖະກອນພາຍໃນພະແນກ ແລະປະກາດພະນັກງານຂັ້ນຫົວໜ້າຂະແໜງ ອອກພັກຜ່ອນ-ຮັບອຸດໜູນບໍານານ, ໂດຍການເຂົ້າຮ່ວມຂອງທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກໍາ ແລະການຄ້າແຂວງ, ມີຂະແໜງການກ່ຽວຂ້ອງຂັ້ນແຂວງ, ພ້ອມດ້ວຍພະນັກງານ-ລັດຖະກອນພາຍໃນ ພອຄ ເຂົ້າຮ່ວມ.

ໃນພິທີ, ທ່ານ ນາງ ຂັນທະລີ ວັນລະເບືອມ ຮອງຫົວໜ້າພະແນກພາຍໃນແຂວງ ໄດ້ຂຶ້ນຜ່ານຂໍ້ຕົກລົງຂອງທ່າານເຈົ້າແຂວງ ສະບັບເລກທີ 183/ຊກ, ລົງວັນທີ 2 ພະຈິກ 2023 ວ່າດ້ວຍການຍ້ອງຍໍ ແລະຊົມເຊີຍຂັ້ນແຂວງ ໂດຍໄດ້ຕົກລົງຍ້ອງຍໍ ແລະຊົມເຊີຍໃຫ້ແກ່ພະນັກງານ-ລັດຖະກອນ ພອຄ ທີ່ຜົນງານດີເດັ່ນ ປະກອບສ່ວນເຫື່ອແຮງ ແລະສະຕິປັນຍາເຂົ້າໃນການຈັດຕັ້ງປະຕິບັດໜ້າທີ່ວຽກງານໃນໄລຍະ 1 ປີຜ່ານມາ(ປະຈໍາປີ2022) ຊຶ່ງໄດ້ຮັບໃບຍ້ອງຍໍທັງໝົດ 44 ສະຫາຍຍິງ 13 ສະຫາຍ, ໄດ້ຮັບໃບຊົມເຊີຍ 3 ສະຫາຍ. ທັງນີ້ ເພື່ອເປັນການຍ້ອງຍໍ ຊົມເຊີຍ ແລະຢັ້ງຢືນເຖິງຜົນງານອັນໃຫຍ່ຫຼວງໃນການເຄື່ອນໄຫວຈັດຕັ້ງປະຕິບັດວຽກງານ ຂອງພະນັກງານພາຍໃນ ພອຄ ໃນໄລຍະ 1 ປີຜ່ານມາ ເຮັດໃຫ້ມີຜົນສໍາເລັດຢ່າງຈົບງາມ.

ນອກຈາກນີ້, ທ່ານ ນາງ ຂັນທະລີ ວັນລະເບືອມ ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ 178/ຊກ ລົງວັນທີ 31 ຕຸລາ 2023 ວ່າດ້ວຍອະນຸມັດໃຫ້ພະນັກງານ-ລັດຖະກອນ ອອກພັກຜ່ອນ-ຮັບອຸດໜູນບໍານານ ຊຶ່ງໄດ້ຕົກລົງອະນຸມັດໃຫ້ທ່ານ ຄໍາໄພ ພັນສິດໃສ ຫົວໜ້າຂະແໜງ ສັງກັດຢູ່ພະແນກອຸດສາຫະກໍາ ແລະການຄ້າແຂວງ ອອກພັກຜ່ອນ-ຮັບອຸດໜູນບໍານານ.

ໂອກາດນີ້, ທ່ານ ດາວວີ ສວຍທະລັງສີ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ໝາກຜົນ ແລະຜົນງານໃນແຕ່ລະດ້ານ ຂອງພະນັກງານ-ລັດຖະກອນພາຍໃນ ພອຄ ທີ່ຍາດມາໄດ້ ໃນໄລຍະ 1 ປີຜ່ານມາ ຊຶ່ງເຮັດໃຫ້ວຽກງານມີຜົນສໍາເລັດຢ່າງຫຼວງຫຼາຍ, ພ້ອມນີ້ ກໍໄດ້ຍ້ອງຍໍຊົມເຊີຍຕໍ່ຜູ້ທີ່ພັກຜ່ອນ-ຮັບອຸດໜູນບໍານານ ຊຶ່ງໃນໄລຍະຜ່ານມາຜູ້ກ່ຽວໄດ້ຕັ້ງໜ້າປະກອບສ່ວນທາງດ້ານເຫື່ອແຮງ, ສະຕິ ປັນຍາ ຄວາມຮູ້ຄວາມສາມາດ ເຂົ້າໃນການເຄື່ອນໄຫວນຳພາ-ຊີ້ນຳ - ຈັດຕັ້ງປະຕິບັດວຽກງານແຕ່ລະດ້ານ ທີ່ໄດ້ຮັບການມອບໝາຍມີຜົນສຳເລັດເປັນຢ່າງດີ ແລະທ່ານຍັງໄດ້ຮຽກຮ້ອງ ໃຫ້ບັນດາສະມາຊິກພັກ, ພະນັກງານ - ລັດຖະກອນພາຍໃນ ພອຄ ຈົ່ງນໍາເອົາເປັນແບບຢ່າງທີ່ດີ; ພ້ອມນີ້ ຍັງໄດ້ຮຽກຮ້ອງໃຫ້ພະນັກງານຜູ້ທີ່ໄດ້ອອກພັກຜ່ອນ-ຮັບອຸດໜູນບຳນານໄປແລ້ວ ກໍຂໍໃຫ້ຮັກສາສຸຂະພາບໃຫ້ດີ, ສືບຕໍ່ປະຕິບັດໜ້າທີ່ໃນການພັດທະນາເສດຖະກິດຄອບຄົວ ແລະປະກອບສ່ວນຊ່ວຍເຫຼືອໃຫ້ຄຳປຶກສາແກ່ຜູ້ປະຕິບັດໜ້າທີ່ວຽກງານໃໝ່ ແລະຜູ້ທີ່ຍັງສືບຕໍ່ປະຕິບັດວຽກງານ ກໍໃຫ້ແບ່ງງານ-ແບ່ງຄວາມຮັບຜິດຊອບຢ່າງລະອຽດ, ເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ປັບປຸງແບບແຜນວິທີນຳພາ-ວິທີເຮັດວຽກໃຫ້ດີຂຶ້ນໄປເລື້ອຍໆ.

ຂ່າວ-ພາບ: ພຸດທະສອນ