ໂດຍ: ພູວັນ

ເນື່ອງໃນໂອກາດວັນຊາດທີ 2 ທັນວາ ຄົບຮອບ 48 ປີທີ່ໃກ້ຈະມາເຖິງນີ້, ທ່ານນາງ ສຸກຊົ່ງ ຕົ່ງສື ຮອງປະທານສະຫະພັນແມ່ຍິງແຂວງໄຊສົມບູນ ໄດ້ກ່າວສະແດງຄວາມຮູ້ສຶກເນື່ອງໃນໂອກາດວັນສຳຄັນດັ່ງ ກ່າວຕໍ່ສື່ມວນຊົນໃນວັນທີ 24 ພະຈິກນີ້ວ່າ: ວັນຊາດທີ 2 ທັນວາ ເປັນວັນທີ່ມີຄວາມໝາຍສໍາຄັນທາງປະ ຫວັດສາດຂອງຊາດລາວສະແດງເຖິງມູນເຊື້ອອັນສະຫງ່າອົງອາດກ້າຫານຂອງກອງທັບ ແລະປະຊາຊົນລາວບັນດາເຜົ່າພາຍໃຕ້ການນໍາພາຂອງພັກປະຊາຊົນປະຕິວັດລາວຕະຫຼອດໄລຍະ40 ປີກວ່າຜ່ານມາ,ພັກເຮົາໄດ້ມີຄວາມສະດຸ້ງໄວ, ກ້າຫານ, ໄດ້ວາງແນວທາງປ່ຽນແປງໃໝ່ຮອບດ້ານຢ່າງມີຫຼັກການ ໂດຍມີປະທານ ໄກສອນ ພົມວິຫານ ເປັນຜູ້ລິເລີ່ມເປັນສະຖາປານິກທີ່ມີວິໃສທັດອັນໃສແຈ້ງນັບແຕ່ປີ 1986ເປັນຕົ້ນມາການພັດທະນາປະເທດຊາດໄດ້ມີຜົນສໍາເລັດໃນຫຼາຍດ້ານ ເປັນບາດລ້ຽວທາງປະຫວັດສາດທີ່ນໍາເອົາຄວາມກ້າວໜ້າມາສູ່ສັງຄົມລາວ ຊຶ່ງໄດ້ນໍາເອົາຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄດ້ຮັບການປົກປັກຮັກສາໄດ້ຢ່າງໝັ້ນຄົງສ້າງເງື່ອນໄຂອໍານວຍໃຫ້ການດໍາລົງຊີວິດ, ການທໍາມາຫາກິນຂອງປະຊາຊົນລາວບັນດາເຜົ່າ ກໍຄືສ້າງຄວາມເຊື່ອໝັ້ນໃຫ້ແກ່ນັກລົງທຶນຜູ້ປະກອບການທັງພາຍໃນ ແລະ ຕ່າງປະເທດໃຫ້ເຂົ້າມາລົງທຶນນັບມື້ນັບຫຼາຍຂຶ້ນ ພ້ອມດຽວກັນນັ້ນກໍໄດ້ຮັບການສະໜັບສະໜູນຊ່ວຍເຫຼືອຈາກປະເທດເພື່ອນມິດ ແລະ ອົງການຈັດຕັ້ງສາກົນຢ່າງຕໍ່ເນື່ອງ.

ທ່ານນາງ ສຸກຊົ່ງ ຕົ່ງສື ກ່າວໃຫ້ຮູ້ອີກວ່າ: ເວົ້າສະເພາະຜົນງານທີ່ພົ້ນເດັ່ນໃນການຈັດຕັ້ງປະຕິບັດວຽກງານສິດທິເດັກໃນ 1 ປີຜ່ານມາ ພາຍຫຼັງໃຫ້ຄວາມໝາຍໝັ້ນໃນການປະຕິບັດສົນທິສັນຍາວ່າດ້ວຍສິດທິເດັກ ເພື່ອນໍາໃຊ້ກາລະໂອກາດພັດທະນາທ່າແຮງຂອງເດັກລາວບັນດາເຜົ່າແຂວງໄຊສົມບູນໃຫ້ບັນລຸຄາດໝາຍການພັດທະນາແບບຍືນຍົງ ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແຂວງໄຊສົມບູນໄດ້ເອົາໃຈໃສ່ຈັດຕັ້ງຜັນຂະຫຍາຍຈັດບູລິມະສິດຕໍ່ບັນດາແຜນວຽກເປັນຕົ້ນແມ່ນ ວຽກງານໂພຊະນາການ, ສຸຂະພາບ, ການປົກປ້ອງເດັກ, ນໍ້າສະອາດ, ສຸຂະອະນາໄມ, ທີ່ຢູ່ອາໄສ, ການພັດທະນາເດັກກ່ອນໄວຮຽນ, ການສຶກສາ ແລະ ຂໍ້ມູນຂ່າວສານສຳລັບເດັກ ແລະ ໄວໜຸ່ມ, ຈາກນັ້ນກໍໄດ້ມອບໝາຍຄວາມຮັບຜິດຊອບໃຫ້ບັນດາພະແນກການອ້ອມຂ້າງແຂວງຕິດພັນກັບການເຄື່ອນໄຫວວຽກງານວິຊາສະເພາະຂອງແຕ່ລະພາກສ່ວນໃຫ້ບັນດາຕົວຊີ້ວັດທີ່ໄດ້ກໍານົດໄວ້ບັນລຸ. ໃນນີ້ໄດ້ເອົາໃຈໃສ່ເຄື່ອນໄຫວໂຄສະນາເຜີຍແຜ່ບັນດານິຕິກໍາຕ່າງໆທີ່ພົວພັນສິດ-ຜົນປະໂຫຍດອັນຊອບທໍາຂອງແມ່ຍິງ ແລະ ເດັກເປັນຕົ້ນ ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ກົດໝາຍວ່າດ້ວຍຄວາມສະເໝີພາບຍິງ-ຊາຍ ແລະ ກົດໝາຍວ່າດ້ວຍການຕ້ານການຄ້າມະນຸດປະຕິບັດໄດ້ 16 ຄັ້ງ, ໄດ້ຮັບຜູ້ຖືກເຄາະຮ້າຍຈາກການຄ້າມານຸດຄືນສູ່ຄອບຄົວ ແລະ ສັງຄົມຢູ່ເມືອງທ່າໂທມ ແຂວງໄຊສົມບູນ 6 ຄົນຍິງ 6 ຄົນ, ນໍາສົ່ງແມ່ຍິງຜູ້ດ້ອຍໂອກາດ ແລະ ມີຄວາມສ່ຽງຈາກການຄ້າມະນຸດ, ຝຶກອົບຮົມວິຊາຊີບຕັດຫຍິບໄລຍະສັ້ນ 3 ເດືອນຢູ່ແຂວງ ເພື່ອຫາລ້ຽງຊີບກຸ້ມຕົນເອງນອກນັ້ນຍັງໄດ້ສ້າງຄວາມເຂັ້ມແຂງ ແລະ ຄວາມເປັນເຈົ້າການຂອງອົງການປົກຄອງທ້ອງຖິ່ນ ແລະ ຊຸມຊົນດ້ວຍວິທີການແບບ CONNECT ໄປຕາມທິດນໍາ 3 ສ້າງເພື່ອໃຫ້ສາມາດກາຍເປັນ “ບ້ານເພື່ອການຮຽນຮູ້ການປົກຄອງດີດ້ານສຸຂະພາບ ແລະ ການຈົດທະບຽນການເກີດ” ໃນ 15 ບ້ານ ແລະ ໄດ້ຂຶ້ນທະບຽນການເກີດໃຫ້ເດັກໃນຂອບເຂດທົ່ວແຂວງໄດ້ 3 ເມືອງ ແລະ 6 ບ້ານ, ເອົາໃຈໃສ່ຊຸກຍູ້ສູນວັດທະນະທໍາເດັກ ເພື່ອສ້າງຄວາມເຂັ້ມແຂງໃຫ້ເດັກ ແລະ ໄວໜຸ່ມເຂົ້າຮ່ວມບັນດາກິດຈະກໍາຕ່າງໆ ແລະ ໄດ້ຜະລິດລາຍການເປີດໃຈໄວໜຸ່ມ ໂດຍຜ່ານວິທະຍຸກະຈາຍສຽງລະບົບໂທລະໂຄ່ງຂອງແຂວງ ແລະ 5 ເມືອງ ເພື່ອເປັນການໂຄສະນາປູກຈິດສໍານຶກໃຫ້ສັງຄົມເຫັນຄວາມສໍາຄັນຂອງເດັກ, ໃນນັ້ນໂຮງຮຽນກິນນອນຊົນເຜົ່າມິດຕະພາບອະນຸວົງໄດ້ຮັບເອົາເດັກຜູ້ດ້ອຍໂອກາດໄດ້ເຂົ້າຮຽນເທົ່າທຽມກັນເຊັ່ນ: ເດັກຢູ່ໃນຄອບທຸກຍາກ, ເດັກກໍາພ້າ-ກໍາພອຍມີນັກຮຽນທັງໝົດ 376 ຄົນຍິງ 145 ຄົນ.

ທ່ານນາງ ສຸກຊົ່ງ ຕົ່ງສື ກ່າວເນັ້ນໃຫ້ຮູ້ຕື່ມອີກວ່າ: ສຳລັບແຜນວຽກຈຸດສຸມໃນຕໍ່ໜ້າຈະສຸມໃສ່ໂຄສະນາ, ເຜີຍແຜ່ບັນດານິຕິກຳຕ່າງໆ ທີ່ພົວພັນເຖິງສິດຜົນປະໂຫຍດອັນຊອບທໍາຂອງແມ່ຍິງ ແລະ ເດັກນ້ອຍ, ວິທີປ້ອງກັນການນຳໃຊ້ສື່ສັງຄົມອອນລາຍຕ່າງໆໃຫ້ບັນດາເດັກທົ່ວແຂວງໄຊສົມບູນໄດ້ຮັບຮູ້ ແລະ ເຂົ້າໃຈສາມາດນຳໃຊ້ໄດ້ຢ່າງມີປະສິດທິພາບ ແລະ ມີປະສິດທິຜົນໃຫ້ໄດ້ 15 ຄັ້ງຕໍ່ປີ.