ໃນວັນທີ 23 ພະຈິກ ຜ່ານມານີ້ ທີ່ສະໂມສອນໃຫຍ່ຂອງເມືອງວິລະບູລີ ແຂວງສະຫວັນນະເຂດ ໄດ້ມີກອງປະຊຸມປະກາດບົ່ງຕົວແຕ່ງຕັ້ງ ພະນັກງານນໍາພາ-ຄຸ້ມຄອງຂັ້ນສູງຂອງເມືອງວິລະບູລີ ເພື່ອທົດແທນໃນຕໍາແໜ່ງທີ່ວ່າງລົງ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ລໍາທອງ ຂອບສີລາວົງ ຄະນະປະຈໍາພັກແຂວງ ປະທານກວດກາພັກ-ລັດແຂວງ, ທ່ານ ວາລິຍະ ສີຈັນທອງທິບ ກໍາມະການພັກແຂວງ ເລຂາພັກເມືອງ ເຈົ້າເມືອງວິລະບູລີ, ເຂົ້າຮ່ວມມີບັນດາທ່ານໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຄະນະກົມກອງ-ຫ້ອງການອ້ອມຂ້າງເມືອງ, ຕາງໜ້າຈາກຄະນະຈັດຕັ້ງແຂວງ ພ້ອມດ້ວຍຄະນະພັກຮາກຖານໄດ້ເຂົ້າຮ່ວມຢ່າງພ້ອມພຽງ.

ໃນພິທີຕາງໜ້າຈາກຄະນະຈັດຕັ້ງແຂວງສະຫວັນນະເຂດ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 2161/ຄປພຂ, ລົງວັນທີ 15 ພະຈິກ 2023 ວ່າດ້ວຍການບົ່ງຕົວແຕ່ງຕັ້ງ ກໍາມະການປະຈໍາພັກເມືອງວິລະບູລີ ໂດຍໄດ້ບົ່ງຕົວແຕ່ງຕັ້ງສະຫາຍ ໄພມະນີ ວົງໄຊຄໍາ ແລະ ສະຫາຍ ພູວະນາດ ບຸນສີພົມ ເປັນກໍາມະການປະຈໍາພັກເມືອງ ແລະ ໄດ້ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 3803/ຈຂ ລົງວັນທີ 14 ພະຈິກ 2023 ວ່າດ້ວຍການແຕ່ງຕັ້ງພະນັກງານ ໂດຍໄດ້ເຫັນດີແຕ່ງຕັ້ງທ່ານ ໄພມະນີ ວົງໄຊຄໍາ ເປັນຮອງເຈົ້າເມືອງວິລະບູລີ ຊີ້ນໍາວຽກງານຂົງເຂດເສດຖະກິດ.

ໃນໂອກາດນີ້, ທ່ານ ລໍາທອງ ຂອບສີລາວົງກໍໄດ້ເປັນກຽດມອບໃບມະຕິຕົກລົງໃຫ້ແກ່ທັງ 2 ສະຫາຍທີ່ໄດ້ຮັບການບົ່ງຕົວແຕ່ງຕັ້ງໃນຄັ້ງນີ້ຢ່າງສົມກຽດ ແລະໃນໂອກາດຕອນທ້າຍ ທ່ານປະທານກອງປະຊຸມ ກໍໄດ້ໃຫ້ຄໍາໂອວາດ ຕໍ່ກັບຜູ້ທີ່ໄດ້ຮັບການແຕ່ງຕັ້ງຕໍາແໜ່ງໃໝ່ໃນຄັ້ງນີ້ໂດຍທ່ານໄດ້ກ່າວວ່າ: ການສັບຊ້ອນ ແລະປັບປຸງການຈັດຕັ້ງແມ່ນກົດເກນທີ່ຈະຕ້ອງໄດ້ປະຕິບັດຢູ່ໃນທຸກໆການຈັດຕັ້ງແຕ່ລະຂັ້ນ, ເພື່ອເຮັດໃຫ້ວຽກງານມີການພັດທະນາທີ່ເຂັ້ມແຂງ ແລະຜູ້ທີ່ຖືກແຕ່ງຕັ້ງກໍລ້ວນແຕ່ຜ່ານການຄົ້ນຄວ້າພິຈາລະນາຢ່າງລະອຽດຈາກຄະນະພັກຂັ້ນເທິງ ແລະ ເປັນຜູ້ທີ່ໄດ້ຮັບຄວາມໄວ້ວາງໃຈຈາກໝູ່ຄະນະ, ເປັນຜູ້ທີ່ມີຄວາມຮູ້ຄວາມສາມາດ ແລະ ທ່ານໄດ້ຮຽກຮ້ອງໃຫ້ຜູ້ທີ່ໄດ້ຮັບການແຕ່ງຕັ້ງໃໝ່ ຈົ່ງເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ສະເໝີຕົ້ນສະເໝີປາຍ, ມີຄວາມສາມັກຄີ ເຮັດວຽກມີການປຶກສາຫາລື, ຢຶດໝັ້ນໃນຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະ.