ໂດຍ: ວັນເພັງ

ເພື່ອເຮັດໃຫ້ງານບຸນນະມັດສະການພະທາດຫຼວງວຽງຈັນ ປະຈຳປີ ພ.ສ 2566 ນີ້, ມີຄວາມເປັນລະບຽບຮຽບຮ້ອຍ ແລະ ສະອາດງານຕາ. ສະນັ້ນ, ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ມອບໃຫ້ບໍລິສັດສະມອນບີ້ ນຳເອົາຖັງຂີ້ເຫຍື້ອຫຼາຍກວ່າ 300 ຖັງ ໄປວາງໄວ້ຕາມຈຸດຕ່າງໆໃນງານບຸນດັ່ງກ່າວ ເພື່ອໃຫ້ຜູ້ມາທ່ຽວງານບຸນ ລວມເຖິງບັນດາຫ້າງຮ້ານທີ່ນຳສິນຄ້າມາວາງສະແດງ ແລະ ຂາຍ ເພື່ອອໍານວຍຄວາມສະດວກໃນການຖີ້ມຂີ້ເຫຍື້ອ. ໃນນັ້ນ, ຍັງໄດ້ມີພະນັກງານອະນາໄມທຳຄວາມສະອາດເດີ່ນພະທາດຫຼວງຈຳນວນ 270 ຄົນ ເພື່ອໃຫ້ເດີ່ນພະທາດຫຼວງມີຄວາມສະອາດຕະຫຼອດງານບຸນ.

ທ່ານ ນີວອນ ຄໍາບັ້ນ ຜູ້ຈັດການຝ່າຍການຕະຫຼາດ ທັງເປັນຜູ້ຊີ້ນຳວຽກພາກສະໜາມໃນການອະນາໄມເກັບມ້ຽນ-ຂົນສົ່ງຂີ້ເຫຍື້ອງານບຸນດັ່ງກ່າວໄດ້ເປີດເຜີຍຕໍ່ສື່ມວນຊົນໃນວັນທີ 24 ພະຈິກຜ່ານມາ ວ່າ: ການຮັກສາຄວາມສະອາດ ແລະ ຄວາມເປັນລະບຽບຮຽບຮ້ອຍໃນການເກັບມ້ຽນຂີ້ເຫຍື້ອໃນງານບຸນນະມັດສະການພະທາດຫຼວງວຽງຈັນແມ່ນເປັນໜຶ່ງວຽກສຳຄັນຫຼາຍ ເພາະງານບຸນດັ່ງກ່າວເປັນງານບຸນປະເພນີປາງໃຫຍ່ລະດັບຊາດຂອງປວງຊົນລາວຊາວພຸດ, ບໍລິສັດ ສະມໍບີ້ ທີ່ປຶກສາດ້ານການລົງທຶນ ໃນນາມໄດ້ຮັບໜ້າທີ່ດ້ານການຮັກສາຄວາມສະອາດຈົບງາມ ພ້ອມໄດ້ຍົກລະດັບຄວາມເອົາໃຈໃສ່ ເພື່ອເຮັດແນວໃດໃຫ້ເທສະການງານບຸນນະມັດສະການພະທາດຫຼວງປີນີ້ ມີສິ່ງແວດລ້ອມສົດໃສ, ສະອາດປາສະຈາກຂີ້ເຫຍື້ອຕະຫຼອດງານ ຈຶ່ງໄດ້ນຳຖັງຮອງຮັບຂີ້ເຫຍື້ອມາວາງໄວ້ຕາມຈຸດຕ່າງໆໃນງານບຸນປີນີ້ ມີຫຼາຍກວ່າ 300 ຖັງ.

ນອກນັ້ນ, ຍັງມີຖັງໂຄງເຫຼັກ ແລະ ຖົງຢາງໃຫຍ່ກຽມພ້ອມໃສ່ເສດຂີ້ເຫຍື້ອເປັນຫຼາຍສິບຖົງ. ໃນນັ້ນ, ປີ 2022 ມີພະນັກງານຮັກສາຄວາມສະອາດຈາກ 180 ຄົນ ແລະ ປີ 2023 ໄດ້ເພີ່ມ ເປັນ 270 ຄົນ.

ທ່ານ ນີວອນ ຄໍາບັ້ນ ໃຫ້ຮູ້ຕື່ມວ່າ: ສຳລັບການບໍລິຫານຈັດພະນັກງານອະນາໄມ, ຮັບຜິດຊອບ ຖີ້ມຂີ້ເຫຍື້ອໄດ້ມີການແບ່ງງານ, ແບ່ງເວລາກັນຮັບຜິດຊອບຕະຫຼອດ 24 ຊົ່ວໂມງ (ມີທີມພະນັກງານພາກເດິກ ແລະ ທີມພາກເຊົ້າ) ໂດຍມີການຂົນສົ່ງຂີ້ເຫຍື້ອໄປກໍາຈັດບໍ່ຕໍ່າກວ່າ 20 ຖ້ຽວ/ມື້.

ປັດຈຸບັນປະຊາຊົນລາວ ກໍຄືຜູ້ມາທ່ຽວງານບຸນແມ່ນມີຄວາມຕື່ນຕົວໃນການຖິ້ມຂີ້ເຫຍື້ອດີຂຶ້ນຫຼາຍຖ້າທຽບໃສ່ໃນປີຜ່ານມາ ຊຶ່ງຊ່ວຍໃຫ້ພະນັກງານຈັດເກັບໄດ້ມີຄວາມສະດວກຫຼາຍກວ່າເກົ່າ ແຕ່ທ່ານຍັງຮຽກຮ້ອງໃຫ້ທຸກທ່ານທີ່ທ່ຽວງານບຸນນະມັດສະການພະທາດຫຼວງປີນີ້ ມີຄວາມເອົາໃຈໃສ່ ແລະ ເປັນເຈົ້າການຮ່ວມກັນ ເວລາກິນອາຫານ ຫຼືເຄື່ອງດື່ມໝົດແລ້ວໃຫ້ນຳໄປຖີ້ມໃສ່ຖັງຂີ້ເຫຍື້ອ ຫຼື ຖົງຢາງຢູ່ຈຸດຕ່າງໆໃຫ້ຖືກ ແລະ ເປັນລະບຽບຮຽບຮ້ອຍ, ບໍ່ຄວນຖີ້ມຂິີ້ເຫຍື້ອຊະຊ່າຍ ເພາະຈະເຮັດໃຫ້ພະນັກງານເກັບມ້ຽນຂີ້ເຫຍື້ອມີຄວາມຫຍຸ້ງຍາກໃນການນຳໄປຖີ້ມ, ອະນາໄມແລ້ວ ຍັງຈະເຮັດງານບຸນບໍ່ສະອາດງາມຕາຕໍ່ແຂກຄົນເຂົ້າມາທ່ຽວພົບເຫັນ. ສະນັ້ນ, ຖ້າທຸກຄົນຮັກສາຄວາມສະອາດໄດ້ດີຍັງເຮັດໃຫ້ມີສິ່ງແວດລ້ອມທີ່ດີ ແລະ ຍັງເປັນໃບໜ້າຂອງຊາດ ການຮັກສາຄວາມສະອາດຈຶ່ງເປັນໜ້າທີ່ຂອງໝົດທຸກຄົນ