ປະເພນີແຫ່ຜາສາດເຜິ້ງ ເປັນອີກໜຶ່ງກິດຈະກຳທີ່ໄດ້ສືບທອດ ແລະ ປະຕິບັດມາທຸກໆປີໃນງານບຸນນະມັດສະການພະທາດຫຼວງວຽງຈັນ ຊຶ່ງເປັນເວລາຫຼາຍກວ່າ 4 ສະຕະວັດຜ່ານມາແລ້ວ, ຂະບວນດັ່ງກ່າວໄດ້ເລີ່ມຂຶ້ນໃນຕອນບ່າຍຂອງວັນທີ 26 ພະຈິກ 2023 ມື້ຂຶ້ນ 14 ຄໍ່າ ເດືອນ 12 ລາວ ຊຶ່ງຈະມີມວນຊົນຈຳນວນຫຼວງຫຼາຍ ໄດ້ມາເຕົ້າໂຮມກັນຢູ່ວັດສີເມືອງ ສະຖານທີ່ສັກກາລະບູຊາຄູ່ບ້ານຄູ່ເມືອງຂອງຊາວນະຄອນຫຼວງວຽງຈັນ ກໍຄືຊາວລາວທົ່ວປະເທດ ກ່ອນທີ່ຈະແຫ່ໄປພະທາດຫຼວງວຽງຈັນ

ໃນພິທີແຫ່ຜາສາດເຜີ້ງປີນີ້ ມີການນຳ ພັກ-ລັດ ນຳພາໂດຍ ທ່ານ ສິນລະວົງ ຄຸຸດໄພທູນ ປະທານສູນກາງແນວລາວສ້າງຊາດ , ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມດ້ວຍ ມວນຊົນຊາວລາວ ເຂົ້າຮວ່ມ ຢ່າງຫຼວງຫຼາຍ . ຜາສາດເຜິ້ງທີ່ນຳມາແຫ່ນັ້ນແມ່ນເຮັດມາຈາກຕົ້ນກ້ວຍ ແລະ ອື່ນໆ ພ້ອມປະດັບປະດາດ້ວຍດອກເຜິ້ງ (ທີ່ເຮັດຈາກຂີ້ເຜິ້ງ), ປະກອບມີເຄື່ອງໃຊ້ເຊັ່ນ: ສໍດຳ, ປາກກາ (ບິກຂຽນ), ປຶ້ມຂຽນ ແລະ ເຄື່ອງໃຊ້ທີ່ຈໍາເປັນລວມທັງເງິນທີ່ຖືກປະດັບເອ້ຢ່າງສວຍງາມ ແລະ ດັດແປງເປັນຮູບແບບຕ່າງໆ. ຊຶ່ງການຕົບແຕ່ງຜາສາດເຜິ້ງນັ້ນຈະມີຄວາມໝາຍ ສະແດງເຖິງຄວາມອຸດົມຮັ່ງມີຂອງປະຊາຊົນລາວໃນແຕ່ລະໄລຍະ ແລະ ປະເພນີແຫ່ຜາສາດເຜິ້ງ ຈະຈັດຂຶ້ນໃນທຸກໆປີຂອງບຸນນະມັດສະການພະທາດຫຼວງ ແນໃສ່ເພື່ອສືບທອດເອກະລັກ ແລະ ປົກປັກຮັກສາຮີດຄອງປະເພນີອັນດີງາມຂອງຊາດລາວໄວ້ໃຫ້ເຖິງຮຸ່ນລູກ-ຫຼານ. ໃນຂະບວນຈະມີມວນຊົນຊາວລາວບັນດາເຜົ່າບໍ່ວ່າຈະເປັນຜູ້ອາວຸໂສ, ຊາວໜຸ່ມຍິງ-ຊາຍ, ເດັກນ້ອຍ ກໍໄດ້ເຂົ້າຮ່ວມຢ່າງຟົດຟື້ນມ່ວນຊື່ນ; ການແຕ່ງກາຍແມ່ນສຸພາບຮຽບຮ້ອຍ ຜູ້ຊາຍນຸ່ງຖືສຸພາບ ສ່ວນແມ່ຍິງກໍນຸ່ງຖືຕາມເອກະລັກຂອງແມ່ຍິງລາວເຊັ່ນ: ນຸ່ງສິ້ນ, ເສື້ອແບບແມ່ຍິງລາວ ບ່ຽງແພ ໂດຍຖືຜາສາດເຜິ້ງແຫ່ໄປຕາມຂະບວນ ປະສົມປະສານດ້ວຍສຽງຄັບ, ສຽງລໍາຈາກທ້ອງຖິ່ນຕ່າງໆ ທີ່ຟັງແລ້ວເປັນຕາສະອອນໃຈ ພ້ອມນັ້ນ ຍັງມີຂະບວນແຫ່ຈາກຫຼາຍພາກສ່ວນໂດຍສະເພາະແມ່ນບັນດາຊົນເຜົ່າຕ່າງໆ. ສະແດງໃຫ້ເຫັນເຖິງການເຕົ້າໂຮມຄວາມສາມັກຄີຂອງປວງຊົນລາວບັນດາເຜົ່າ, ການແຫ່ຜາສາດເຜີ້ງຕ້ອງອ້ອມພະທາດຫຼວງວົງໃນ ຫຼື ນອກກົມມະລຽນ 3 ຮອບ ຫຼັງຈາກນັ້ນກໍມີພິທີທາງສາສະໜາ. ສໍາລັບຂະບວນແຫ່ຜາສາດເຜີ້ງໃນປີນີ້ ປະກອບຂະບວນພະເຖລາ ນຸເຖລະ, ຂະບວນການນໍາ, ສິລະປະ, ມີຜາສາດເຜີ້ງຈາກ 4 ເມືອງ ໃນຈໍານວນ 16 ຜາສາດເຜີ້ງ ເມືອງຈັນທະບູລີ, ສີສັດຕະນາກ ຈັນທະບູລີ ແລະ ເມືອງສີໂຄດຕະບອງ ເມືອງລະ 4 ຜາສາດເຜີ້ງ ພ້ອມນີ້ກໍມີຂະບວນແຫ່ຜາສາດເຜີ້ງຈາກພັນລະຍາການນໍາ, ສູນກາງແນວລາວສ້າງຊາດ ແລະ ຈາກອົງການຈັດຕັ້ງ, ບັນດາໂຮງຮຽນ, ບ້ານ ແລະ ຂອງມວນຊົນເຂົ້າຮ່ວມຢ່າງຫຼວງຫຼາຍ.

ຂ່າວ-ພາບ: ຍຸພິນທອງ