ໃນວັນທີ23 ພະຈິກຜ່ານມາ, ທ່ານ ພົນຕີ ຈາງ ຜິງ ຈຸ້ນ ຫົວໜ້າການເມືອງກອງຮັບປະກັນພະລາທິການ ເມືອງກຸ້ຍລີນ ກອງທັບປົດປ່ອຍປະຊາຊົນຈີນພ້ອມຄະນະໄດ້ເຄື່ອນໄຫວພົບປະຢ້ຽມຢາມ ແລະເຮັດວຽກຢູ່ກອງບັນຊາການທະຫານແຂວງຫຼວງພະບາງໂດຍມີທ່ານ ພັນເອກ ວິລະສິນ ມິດຕະພອນ ຮອງຫົວໜ້າກອງບັນຊາການຫົວໜ້າຫ້ອງການເມືອງກອງບັນຊາການທະຫານແຂວງຫຼວງພະບາງພ້ອມຄະນະໄດ້ໃຫ້ການຕ້ອນຮັບຢ່າງອົບອຸ່ນ.

ການພົບປະຄັ້ງນີ້ສອງຝ່າຍໄດ້ຜັດປ່ຽນກັນຂຶ້ນລາຍງານສະພາບການພັດທະນາເສດຖະກິດ-ສັງຄົມ, ຕິດພັນກັບພາລະບົດບາດ, ສິດ ແລະໜ້າທີ່ການເມືອງຂອບເຂດກົມກອງຮັບຜິດຊອບໃຫ້ກັນຊາບໂດຍຫຍໍ້ພ້ອມທັງຕີລາຄາສູງຕໍ່ໝາກຜົນການພົວພັນຮ່ວມມືຂອງສອງພັກ-ລັດ ແລະສອງກອງທັບລາວ-ຈີນທີ່ເຄີຍມີມາແຕ່ດົນນານ. ທ່ານ ພັນເອກ ວິລະສິນ ມິດຕະພອນ ກ່າວວ່າ: ໃນໄລຍະຜ່ານມາກອງບັນຊາການທະຫານແຂວງຫຼວງພະບາງໄດ້ຮັບການຊ່ວຍເຫຼືອທາງດ້ານພາຫະນະວັດຖຸ, ການກໍ່ສ້າງພະນັກງານວິຊາການ ແລະອື່ນໆຈາກກອງທັບປະຊາຊົນຈີນ. ໂອກາດນີ້ທ່ານໄດ້ຕີລາຄາສູງຕໍ່ການມາຢ້ຽມຢາມ ແລະເຮັດວຽກຂອງທ່ານ ພົນຕີ ຈາງ ຜິງ ຈຸ້ນ ພ້ອມຄະນະຊຶ່ງເປັນການປະກອບສ່ວນປົກປັກຮັກສາເສີມຂະຫຍາຍມູນເຊື້ອອັນດີງາມຂອງປະຊາຊົນສອງຊາດລາວ-ຈີນໃຫ້ກ້າວເຂົ້າສູ່ລວງເລິກ ແລະຈະເລີນງອກງາມຍິ່ງໆຂຶ້ນ.

ທ່ານ ພົນຕີ ຈາງ ຜິງ ຈຸ້ນໄດ້ກ່າວສະແດງຄວາມຂອບໃຈ ແລະຕີລາຄາສູງຕໍ່ການຕ້ອນຮັບອັນອົບອຸ່ນຂອງທ່ານພັນເອກ ວິລະສິນ ມິດຕະພອນ ພ້ອມຄະນະທັງໄດ້ແລກປ່ຽນບົດຮຽນຂໍ້ມູນດ້ານວຽກງານຮັບປະກັນພະລາທິການ ແລະມອບຂອງຂັວນທີ່ລະນຶກໃຫ້ກັນ ແລະ ກັນຕື່ມອີກ.

ຂ່າວ-ພາບ: ບຸນເພັງ ວົງແກ້ວມະນີ