ເມື່ອບໍ່ດົນມານີ້ທີ່ຕົງກວນ ສປ ຈີນ ບໍລິສັດຫົວເຫວີຍ ໄດ້ປະກາດການເຊື່ອມຕໍ່ກັບຜູ້ຄົນຈຳນວນ 90 ລ້ານຄົນ ທີ່ອາໄສຢູ່ໃນເຂດຫ່າງໄກສອກຫຼີກ,ເກືອບ 80 ປະເທດ ຕາມຂໍ້ຜູກພັນຕໍ່ແນວຮ່ວມດີຈີຕອນ Partner2Connect (P2C) ຂອງສະຫະພັນໂທລະຄົມມະນາຄົມສາກົນ (ITU). ການປະກາດດັ່ງກ່າວ, ໄດ້ເປັນສ່ວນໜຶ່ງຂອງບົດລາຍງານຄວາມຄືບໜ້າຄັ້ງທຳອິດຂອງຫົວເຫວີຍ ນັບຕັ້ງແຕ່ໄດ້ເຂົ້າຮ່ວມແນວຮ່ວມມືໃນປີຜ່ານມານີ້.

ທ່ານ ຫຼຽງ ຮວາ (Liang Hua) ປະທານສະພາບໍລິຫານບໍລິສັດຫົວເຫວີຍ ໄດ້ຖະແຫຼງການໃນການປະຊຸມຄວາມຍືນຍົງປະຈຳປີ 2023 ໃນຫົວຂໍ້ “ເຕີບໂຕໄປພ້ອມກັບເຕັກໂນໂລຊີ ເພື່ອບັນລຸການພັດທະນາແບບຍືນຍົງ.” ວ່າ: ພື້ນຖານໂຄງລ່າງດີຈີຕອນ ມີຄວາມສຳຄັນຫຼາຍຕໍ່ການຂັບເຄື່ອນການພັດທະນາເສດຖະກິດ-ສັງຄົມ ເປັນຕົ້ນແມ່ນການເຊື່ອມຕໍ່ ແລະ ພະລັງງານການປະມວນຜົນ ຄະນະດຽວກັນ, ຄອມພິວເຕີ ກໍເປັນໂຕຊ່ວຍໃນການຂັບເຄື່ອນທີ່ສໍາຄັນ ຂອງຜະລິດຕະພັນໃນເສດຖະກິດດີຈີຕອນ ຊຶ່ງການເປີດຕົວໂຄງສ້າງພື້ນຖານດ້ານຄອມພິວເຕີ ຈະຊ່ວຍເລັ່ງການຫັນປ່ຽນທາງດີຈີຕອນ ໃນອຸດສາຫະກໍາ ແລະ ສົ່ງເສີມການເຊື່ອມໂຍງທີ່ເລິກເຊິ່ງ ລະຫວ່າງເສດຖະກິດດີຈີຕອນ ແລະ ເສດຖະກິດທີ່ແທ້ຈິງ. ສິ່ງດັ່ງກ່າວສາມາດຊຸກຍູ້ຄວາມໝັ້ນຄົງດ້ານເສດຖະກິດໂລກ ແລະ ການພັດທະນາແບບຍືນຍົງ. ຫົວເຫວີຍ ເຊື່ອໝັ້ນວ່າດີຈີຕອນ ແມ່ນກຸນແຈສຳຄັນຂອງນະວັດຕະກໍາເຕັກໂນໂລຊີໃນອະນາຄົດ. ເພື່ອສົ່ງເສີມການມີສ່ວນພົວພັນທາງດ້ານດີຈີຕອນ ໃຫ້ກວ້າງຂວາງຫຼາຍຂຶ້ນ ແລະ ພັດທະນາຜູ້ນໍາໃນອະນາຄົດ, ບໍລິສັດຫົວເຫວີຍ ໄດ້ຮ່ວມມືກັບ ITU ເປີດໂຄງການ ITU Generation Connect ເພື່ອມອບທຶນການສຶກສາໃຫ້ກັບ ໄວໜຸ່ມ ຊຶ່ງຈະເປີດໃຫ້ສະໝັກໃນຕົ້ນປີໜ້າ ແລະ ຈະແກ່ຍາວເຖິງ 3ປີ. ໃນແຕ່ລະປີ, ນັກວິໄສທັດໄວໜຸ່ມ 30 ຄົນ (ອາຍຸ 18-28 ປີ) ຈາກທົ່ວໂລກຈະໄດ້ຮັບການສະໜັບສະໜູນ ໃນໂຄງການເພື່ອນຳໃຊ້ເຕັກໂນໂລຊີດີຈີຕອນເພື່ອຊຸກຍູ້ການພັດທະນາຊຸມຊົນ.

ITU ແມ່ນຈະໄດ້ສົ່ງເສີມການເຊື່ອມຕໍ່ທີ່ມີຄວາມໝາຍ ແລະ ການປ່ຽນແປງທາງດ້ານດີຈີຕອນທົ່ວໂລກ ໂດຍໃຫ້ຄວາມສຳຄັນກັບຊຸມຊົນຫ່າງໄກສອກຫຼີກໃນປະເທດ ແລະ ພາກພື້ນຕ່າງໆທີ່ບໍ່ມີການເຂົ້າເຖິງທາງດີຈີຕອນ. ຫົວເຫວີຍ ໄດ້ລົງນາມໃນຂໍ້ຜູກພັນລະດັບໂລກໃນປີຜ່ານມາ, ໂດຍຕັ້ງເປົ້າໝາຍນຳເອົາການເຊື່ອມຕໍ່ໄປສູ່ປະຊາຊົນປະມານ 120 ລ້ານຄົນຢູ່ເຂດຫ່າງໄກສອກຫຼີກຫຼາຍກວ່າ 80 ປະເທດພາຍໃນປີ 2025.

(ຂ່າວ-ພາບ:ຫົວເຫວີຍ)