ຊາວໜຸ່ມ 6 ກົມກອງ ທີ່ຂຶ້ນກັບກອງພົນທີ 2 ໄດ້ສ້າງຂະບວນການອອກແຮງງານລວມຕາມຂອບເຂດ ຄວາມຮັບຜິດຊອບຕາມຈຸດຕ່າງໆໃນບໍລິເວນ 2 ຟາກທາງ  ເມື່ອບໍ່ດົນມານີ້ ຊຶ່ງມີໂຮງໝໍ ແລະ ທາງເຂົ້າກອງພົນ ໃນນັ້ນມີຊາວໜຸ່ມໂຮງໝໍ, ຊາວໜຸ່ມກອງພັນ 409, ຊາວໜຸ່ມກອງຮ້ອຍ 22, ຊາວໜຸ່ມກອງຮ້ອຍ 23, ຊາວໜຸ່ມກອງຮ້ອຍ 24, ຊາວໜຸ່ມກອງຮ້ອຍ 25 .
    ໃນການຈັດຕັ້ງສ້າງຂະບວນການອອກແຮງງານລວມໃນຄັ້ງນີ້ເພື່ອເປັນການສ້າງຜົນງານຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ໃກ້ຈະມາເຖິງນີ້ ໃຫ້ມີຄວາມສະອາດຈົບງາມໃນຂະບວນການດັ່ງກ່າວແມ່ນໄດ້ມີການອະນາໄມປັດກວາດຂີ້ເຫຍື້ອຕາມແຄມທາງ, ຮ່ອງລະບາຍນ້ຳ, ຖາງຫຍ້າຕາມແຄມທາງທັງສອງຟາກທາງ ແລະ ຖົມທາງ ບ່ອນທີ່ເປັນບວກ ເປັນຂຸມ, ເພື່ອເຮັດໃຫ້ການສັນຈອນໄປມາສະດວກສະບາຍ, ຫຼີກລ່ຽງຈາກອຸບັດເຫດ, ບັນຍາກາດໃນການສ້າງຂະບວນການອອກແຮງງານໃນຄັ້ງນີ້ແມ່ນເຕັມໄປດ້ວຍຄວາມສາມັກຄີ, ການຮ່ວມແຮງ ຮ່ວມໃຈເປັນຈິດໜຶ່ງໃຈດຽວກັນ, ປຸ້ມລຸມຄວາມສາມັກຄີກັນ ຊຶ່ງສະແດງໃຫ້ເຫັນເຖິງຄວາມເຂັ້ມແຂງຂອງອ້າຍນ້ອງຊາວໜຸ່ມໃນ 6 ກົມກອງ ທີ່ຫ້າວຫັນບໍ່ຫວັ່ນກົວຕໍ່ຄວາມຫຍຸ້ງຍາກ ດັ່ງຄຳຂັວນທີ່ວ່າ: ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມຜ່ານຜ່າ ເມື່ອໃດຊາດຕ້ອງການຊາວໜຸ່ມຂານອາສາ ຈຶ່ງເຮັດໃຫ້ 2ຟາກທາງ ມີຄວາມເປີດແປນ ແລະ ບໍ່ຫົກເຮື້ອ.
ຂ່າວ-ພາບ: ອານຸສັກ ອຳພັນວິໄລ