ໃນວັນທີ 29 ພະຈິກຜ່ານມາ ທີ່ສະໂມສອນກອງພັນໃຫຍ່ 202 ກອງພົນທີ 2 ໄດ້ຈັດພິທີປາຖະກະຖາ  ວັນຊາດທີ 2 ທັນວາຄົບຮອບ 48 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 103 ປີພາຍໃຕ້ການເປັນປະທານຂອງສະຫາຍ ພັນໂທ ອູ່ທອງ ມະໂນລາດ ຮອງຫົວໜ້າການເມືອງກອງພັນໃຫຍ່ 202, ມີຄະນະພັກ-ຄະນະບັນຊາ,ພະນັກງານຫຼັກແຫຼ່ງ ແລະ ສະມາຊິກພັກເຂົ້າຮ່ວມ.
ສະຫາຍ ພັນໂທ ຄຳໄບ ວິໄລພອນ ຮອງຫົວໜ້າພະແນກການເມືອງ ແລະ ສະຫາຍ ພັນຕີສົມເພັດ ພີມມະສອນ ຫົວໜ້າຂະແໜງຈັດຕັ້ງພັກພະແນກການເມືອງກອງພັນໃຫຍ່ 202 ໄດ້ຜັດປ່ຽນກັນຂຶ້ນບັນຍາຍຍົກໃຫ້ເຫັນມູນເຊື້ອຄວາມໝາຍ-ຄວາມສຳຄັນຂອງວັນຊາດທີ 2 ທັນວາທີ່ມີປະຫວັດສາດອັນຍາວນານ, ສະຫງ່າອົງອາດແຫ່ງການຕໍ່ສູ້ຕ້ານການຮຸກຮານຂອງສັດຕູຈາກພາຍນອກ ສາມາດປົດປ່ອຍປະເທດຊາດຢ່າງມີໄຊ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວຢ່າງສະຫງ່າຜ່າເຜີຍໃນວັນທີ 2 ທັນວາ 1975 ຊຶ່ງໄດ້ກາຍເປັນວັນທີ່ມີຄວາມໝາຍສຳຄັນສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາ ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ເປັນເຈົ້າຂອງປະເທດຊາດຢ່າງແທ້ຈິງ. ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆໃນເວທີປະຊາຄົມໂລກ. ພ້ອມທັງໄດ້ຍົກໃຫ້ເຫັນຜົນງານ, ຄຸນງາມຄວາມດີ, ຊີວິດ ແລະ ການເຄື່ອນໄຫວຂອງປະທານ ໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ແມ່ນລູກຜູ້ປະເສີດຂອງປະຊາຊົນລາວບັນດາເຜົ່າ, ແມ່ນນັກປະຕິວັດຜູ້ດີເລີດເພິ່ນເປັນຜູ້ນຳສູງສຸດຂອງການປະຕິວັດລາວທີ່ມີຄວາມປີຊາສາມາດ, ມີຄວາມສະຫຼາດຫຼັກແຫຼມ, ມີໄຫວພິບອັນແຫຼມຄົມ ແລະ ມີນ້ຳໃຈຕໍ່ສູ້ເດັດດ່ຽວໜຽວແໜ້ນເປັນຜູ້ນຳທີ່ແສນເຄົາລົບຮັກຂອງພັກ, ຂອງລັດ ແລະ ຂອງປະຊາຊົນ ແລະ ເປັນວິລະບູລຸດຂອງຊາດລາວເຮົາ.
    ໂອກາດນີ້, ສະຫາຍ ພັນໂທອູ່ທອງມະໂນລາດໄດ້ໃຫ້ກຽດໂອ້ລົມພ້ອມທັງຮຽກຮ້ອງໃຫ້ພະນັກງານສະມາຊິກພັກທຸກສະຫາຍຈົ່ງພ້ອມກັນຕັ້ງໜ້າສຶກສາຄົ້ນຄວ້າຮ່ຳຮຽນ ແລະ ສືບທອດມໍລະດົກອັນລ້ຳຄ່າຂອງປະທານ ໄກສອນ ພົມວິຫານທີ່ສ້າງໄວ້ເພື່ອໝູນໃຊ້ເຂົ້າໃນການເຝີກຝົນຫຼໍ່ຫຼອມຕົນເອງເຂົ້າໃນການດຳລົງຊີວິດຕິດພັນກັບການປະຕິບັດໜ້າທີ່ວຽກງານຕົວຈິງໃນທຸກດ້ານ, ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດອັນດີ ພ້ອມກັນຍົກສູງນ້ຳໃຈຄວາມຮັບຜິດຊອບຕໍ່ໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາ ແລະສ້າງສາພັດທະນາປັບປຸງກໍ່ສ້າງກົມກອງໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.    
ຂ່າວ-ພາບ: ຄຳຊາຍ ກວ່າງຄຸນສີ