ສານປະຊາຊົນສູງສຸດ(ສປສສ) ໄດ້ຈັດກອງປະຊຸມປາຖະກະຖາ ຫວນຄືນມູນເຊື້ອ ວັນຊາດທີ 2 ທັນວາ ຄົບຮອບ 48 ປີ  ແລະ ວັນເກີດ ປະທານ ໄກສອນ ພົມວິຫານ ຄົບຮອບ 103 ຜູ້ນຳທີ່ແສນເຄົາລົບຮັກ ຂອງປວງຊົນລາວ ຂຶ້ນໃນວັນທີ 30 ພະຈິກ ນີ້ ທີ່ ສປສສ,ໃຫ້ກຽດປາຖະກະຖາ ໂດຍທ່ານ  ຄຳພາ ແສງດາຣາ ອະດີດປະທານສານປະຊາຊົນສູງສຸດ ຊຶ່ງມີພະນັກງານອ້ອມຂ້າງເຂົ້າຮ່ວມ.
ທ່ານ  ຄຳພາ ແສງດາຣາ ໄດ້ຍົກໃຫ້ເຫັນ ເຖິງມູນເຊື້ອ ແລະ ຄວາມໝາຍສຳຄັນຂອງວັນຊາດທີ 2 ທັນວາ,ຜົນສຳເລັດໃນການປົກປັກຮັກສາ ແລະ ພັດທະນາປະເທດຊາດ ແລະ ເສີມຂະຫຍາຍມູນເຊື້ອວັນຊາດ 2 ທັນວາ ເຂົ້າໃນການສ້າງສາພັດທະນາປະເທດຊາດ ແລະ ໄດ້ຍົກໃຫ້ເຫັນຊີວິດ ແລະ ການ ເຄື່ອນໄຫວປະຕິວັດ ຂອງປະທານ ໄກສອນ ພົມວິຫານ, ຜົນງານ ແລະ ຄຸນງາມຄວາມດີ ຂອງປະທານ ໄກສອນ ພົມວິຫານ,ຕັ້ງໜ້າຮໍ່າຮຽນ ແລະ ສືບທອດມໍລະດົກອັນລໍ້າຄ່າ ຂອງປະທານ ໄກສອນ ພົມວິຫານ ທີ່ໄດ້ສ້າງໄວ້.
 ທັງໝົດນັ້ນກໍເພື່ອໃຫ້ພະນັກງານຮັບຮູ້ ແລະ ກຳແໜ້ນມູນເຊື້ອ ວັນຊາດທີ 2 ທັນວາ  ແລະ ປະຫວັດການເຄື່ອນໄຫວ ຂອງປທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວ ມານຳໃຊ້ເຂົ້າໃນວຽກງານຂອງຕົນໃຫ້ມີຜົນສຳເລັດຕາມການມອບໝາຍ. 
ຂ່າວ-ພາບ:ອານຸພົນ