ຮ້ານຟ້າໃສ ການແວ່ນ ໄດ້ຈັດກິດຈະກຳບໍລິການກວດສຸຂະພາບສາຍຕາບໍ່ເສຍຄ່າ ໃຫ້ພະນັກງານໜັງສືພິມ ປະຊາຊົນ ແລະ ໜັງສືພິມພາສາຕ່າງປະເທດ ຂຶ້ນໃນວັນທີ 1 ທັນວານີ້ ທີ່ສໍານັກງານໜັງສືພິມປະຊາຊົນ ໂດຍມີທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ, ມີຮອງຫົວໜ້າບັນນາທິການ ແລະ ພະນັກງານເຂົ້າຮ່ວມ.
ທ່ານນາງ ສີພອນ ສີອຳພອນ ຜູ້ຮັບຜິດຊອບວຽກງານລວມຂອງຮ້ານຟ້າໃສການແວ່ນໄດ້ໃຫ້ສຳພາດວ່າ:ກິດຈະກຳໃນຄັ້ງນີ້ຈັດຂຶ້ນເພື່ອເປັນການຂໍ່ານັບຮັບຕ້ອນວັນຊາດທີ 2 ທັນວາ  ຄົບຮອບ 48 ປີ (2 ທັນວາ 1975-2 ທັນວາ 2023). ໃນນັ້ນ, ຍັງເປັນການເປີດໂອກາດໃຫ້ພະນັກງານທັງ 2 ສໍານັກຜູ້ທີ່ມີບັນຫາທາງສາຍຕາເປັນຕົ້ນສາຍຕາສັ້ນ, ສາຍຕາຍາວ, ສາຍຕາອຽງ, ວັດແທກສາຍຕາ, ຕັດແວ່ນຕາ ລາຄາຕາມນະໂຍບາຍໃຫ້ພະນັກງານ-ລັດຖະກອນ ໂດຍຈ່າຍຜ່ອນບໍ່ມີດອກເບ້ຍ. ໃນນັ້ນຜູ້ທີ່ມີບັນຫາທາງສາຍຕາເລັກນ້ອຍ ຫຼື ໜັກກໍສາມາດເຂົ້າກວດໄດ້ໂດຍບໍ່ເສຍຄ່າ, ຖ້າກວດພົບສາເຫດແລ້ວ ກໍໄດ້ໃຫ້ຄໍາປຶກສາ, ຄຳແນະນຳວິທີຕ່າງໆໃນການຮັກສາສຸຂະພາບສາຍຕາ. ໃນນັ້ນ, ຜູ້ເຂົ້າກວດຍັງຮູ້ໄດ້ສຸຂະພາບທາງສາຍຕາຕົນເອງ ແລະ ອື່ນໆຕື່ມອີກ. ການຈັດກິດຈະກຳຄັ້ງນີ້ອີງໃສ່ນະໂຍ ບາຍທີ່ທາງຮ້ານມີຕໍ່ພະນັກງານ-ລັດຖະກອນ ຊຶ່ງເລີ່ມປະຕິບັດແຕ່ໂຄວິດ-19 ເປັນຕົ້ນມາ. ປັດຈຸບັນໄດ້ລົງກວດສຸຂະພາບສາຍຕາ ໃຫ້ພະນັກງານ-ລັດຖະກອນໄດ້ 9 ແຂວງແລ້ວເຊັ່ນ: ແຂວງວຽງຈັນ, ຜົ້ງສາລີ, ອຸດົມໄຊ, ບໍລິຄຳໄຊ, ໄຊຍະບູລີ, ຫຼວງພະບາງ, ຊຽງຂວາງ, ໄຊສົມບູນ, ນະຄອນຫຼວງວຽງຈັນ.
ທ່ານນາງ ສີພອນ ສີອຳພອນ ຍັງໃຫ້ຮູ້ຕື່ມວ່າ: ໃນຕໍ່ໜ້າຍັງມີແຜນສ້າງກິດຈະກໍາກວດສຸຂະພາບສາຍຕາບໍ່ເສຍຄ່າໃຫ້ພະນັກງານ-ລັດຖະກອນໃນແຂວງຕ່າງໆທົ່ວປະເທດຕື່ມອີກ. ເນື່ອງຈາກບັນຫາສາຍຕາເປັນສິ່ງສຳຄັນຫຼາຍ ທ່ານຍັງໄດ້ຝາກເຖິງພະນັກງານ ກໍຄືທຸກຄົນບໍ່ຕ້ອງຖືເບົາຮັກສາສາຍຕາຂອງຕົນເອງໃຫ້ມີສຸຂະພາບດີ ໂດຍສະເພາະຜູ້ທີ່ເຮັດວຽກຜ່ານໜ້າຈໍຄອມພີວເຕີ, ໂທລະສັບມືຖື ແລະ ອື່ນໆ. ຖ້າທ່ານໃດຮູ້ສຶກສຸຂະພາບສາຍຕາບໍ່ດີ ຫຼື ມີບັນຫາທາງສາຍຕາກໍສາມາດເຂົ້າມາກວດນຳຮ້ານຟ້າໃສ ການແວ່ນໄດ້ ຮ້ານຕັ້ງຢູ່ແຄມເສັ້ນທາງໃຫຍ່ດົງໂດກ ເມືອງໄຊທານີ ນະຄອນຫຼວງວຽງຈັນ. 
(ຂ່າວ-ພາບ: ວັນເພັງ)