ໂດຍ: ພັດ ລໍວັນໄຊ

ເນື່ອງໃນໂອກາດວັນຊາດທີ 2 ທັນວາ ຄົບຮອບ 48 ປີ (2/12/1975-2/12/2023) ໄດ້ໝູນວຽນມາບັນຈົບຄົບຮອບອີກວາລະໜຶ່ງ ທ່ານ ມິຖຸນາ ພານຄຳ ຮອງພະແນກບໍລິຫານ ສະຖາບັນພັດທະນາການບໍລິຫານການສຶກສາ ກະຊວງສຶກສາທິການ ແລະ ກິລາ ໄດ້ກ່າວສະແດງຄວາມຮູ້ສຶກຂອງຕົນເອງຜ່ານສື່ມວນຊົນວ່າ: ວັນຊາດທີ 2 ທັນວາ ແມ່ນວັນທີ່ມີຄວາມໝາຍຄວາມສຳຄັນ, ເປັນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ ຊຶ່ງພາຍໃຕ້ການນໍາພາຂອງພັກປະຊາຊົນ ປະຕິວັດລາວ ທີ່ສະຫຼາດສ່ອງໃສໄດ້ສໍາເລັດພາລະກິດ ແລະ ໜ້າທີ່ອັນມີກຽດຂອງຕົນໃນພາລະກິດປົດປ່ອຍປະເທດຊາດຢ່າງສະຫງ່າງາມ ແລະ ສືບຕໍ່ຜັນຂະຫຍາຍມູນເຊື້ອອັນດີງາມຂອງຕົນເຂົ້າໃນພາລະກິດລວມແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ.

ໂອກາດທີ່ມີຄວາມໝາຍ-ຄວາມສໍາຄັນນີ້, ຂໍສະແດງຄວາມຮູ້ບຸນຄຸນມາຍັງພັກ-ລັດ ການນຳຂັ້ນສູງທຸກໆທ່ານທີ່ຊີ້ນໍາ-ນຳພາຕະຫຼອດໄລຍະ 48 ປີ ທີ່ຜ່ານມາ ແລະ ໄດ້ຮັບຜົນສຳເລັດອັນຍິ່ງໃຫຍ່. ຂໍອວຍພອນໄຊມາຍັງການນຳທຸກທົ່ວໜ້າ, ພະນັກງານ-ລັດຖະກອນ ຕະຫຼອດພໍ່ແມ່ປະຊາຊົນ ຈົ່ງມີສຸຂະພາບແຂງແຮງ, ຄວາມສຸກສົມຫວັງທຸກປະການ, ບັນດາທ່ານການນໍາພັກ-ລັດ ຈົ່ງສືບຕໍ່ຊີ້ນຳ-ນຳພາປະເທດຊາດໃຫ້ມີຄວາມຈະເດີນຮຸ່ງເຮືອງສີວິໄລຍິ່ງໆຂຶ້ນ.