ພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ເບື້ອງຕົ້ນ ໃນການພັດທະ ນາໂຄງການຫຼຸດຜ່ອນການປ່ອຍທາດອາຍເຮືອນແກ້ວ ຈາກການທໍາລາຍປ່າໄມ້ ແລະ ການເຮັດໃຫ້ປ່າ ໄມ້ຊຸດໂຊມ (REDD+) ລະຫວ່າງກົມປ່າໄມ້ ກະຊວງກະສິກຳ ແລະ ປ່າໄມ້ ແລະ ບໍລິສັດ ເສສວນ ຫົວໂຖ ພັດທະນາເຕັກໂນໂລຊີກາກບອນ ຈຳກັດ ໄດ້ຈັດຂຶ້ນໃນວັນທີ 1 ທັນວາ ນີ້ ທີ່ໂຮງແຮມດອນຈັນພຣາເລດ ນະຄອນຫຼວງວຽງຈັນ.

ຮ່ວມລົງນາມຄັ້ງນີ້ຕາງໜ້າ ກົມປ່າໄມ້ ໂດຍ ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ ແລະ ຕາງໜ້າ ບໍລິສັດ ໂດຍ ທ່ານ ຫວັງຈຽນ ຜູ້ບໍລິຫານ ຂອງ ບໍລິສັດ ເສສວນຫົວໂຖ ພັດທະນາເຕັກ ໂນໂລຊີກາກບອນ ຈຳກັດ ແລະ ທ່ານ ບຸນເຮືອງ ຊີນຈິຄັງ ປະທານ ບໍລິສັດ ຄັງຮົວລົງທຶນລາວ ຈຳກັດ ໂດຍໃຫ້ກຽດເຂົ້າຮ່ວມຂອງ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ການລົງນາມດັ່ງກ່າວນີ້ ແມ່ນເພື່ອຮ່ວມມືກັນ ລະຫວ່າງ ລັດຖະບານ ແຫ່ງ ສປປ ລາວ (ຕາງໜ້າ ໂດຍກົມປ່າໄມ້, ກະຊວງກະສິກຳ ແລະ ປ່າໄມ້) ແລະ ບໍລິສັດ ເສສວນ ຫົວໂຖ ພັດທະນາ ເຕັກໂນໂລຊິກາກບອນ ຈຳກັດ ກ່ຽວກັບ ການເຂົ້າຫາແຫຼ່ງທຶນແບບຍືນຍົງ ໃນການບໍລິຫານຄຸ້ມຄອງ ແລະ ປົກປັກຮັກສາຊັບພະຍາກອນປ່າໄມ້ ແລະ ເພື່ອເຮັດວຽກງານຮ່ວມກັນພັດທະນາເຕັກໂນໂລຊີກາກບອນ ຈຳກັດ, ກ່ຽວກັບ ການເຂົ້າຫາຕະຫຼາດສິນເຊື່ອກາກບອນປ່າໄມ້ແບບຍືນຍົງ ຊຶ່ງຄາດຄະເນໝາກຜົນທີ່ ຈະໄດ້ຮັບຈາກການຮ່ວມມືໃນຄັ້ງນີ້: ຈະສ້າງເປັນໂຄງການຮ່ວມກັນ ແລະ ຕ່າງຝ່າຍຕ່າງມີຜົນ ປະໂຫຍດຮ່ວມກັນ, ຂຸດຄົ້ນຫາທ່າແຮງບົ່ມຊ້ອນທາງດ້ານທຳມະຊາດ ກໍຄືຊັບພະຍາກອນປ່າໄມ້ ເພື່ອຫັນ ເຂົ້າສູ່ການສ້າງເສດຖະກິດສີຂຽວ ຫຼື ການເຕີບໂຕສີຂຽວໃຫ້ປະກົດຜົນເປັນຈິງເທື່ອກ້າວ, ສ້າງລາຍ ຮັບຈາກການອະນຸລັກ ແລະ ການບໍລິຫານຄຸ້ມຄອງປ່າໄມ້ຮ່ວມກັນ ຊຶ່ງຈະເປັນລາຍຮັບທາງດ້ານ ເສດຖະ ກິດຂອງຊາດ ແລະ ຂອງປະຊາຊົນທ້ອງຖິ່ນ ທີ່ຢູ່ໃນເຂດພື້ນທີ່ເປົ້າໝາຍຂອງໂຄງການ, ເປັນການປະ ຕິບັດພັນທະຕໍ່ສົນທິສັນຍາສາກົນ ວ່າດ້ວຍການປ່ຽນແປງດິນຟ້າອາກາດຮ່ວມກັນ ແລະ ສ້າງໂອກາດ ໃຫ້ປະຊາຊົນ ໄດ້ມີສ່ວນຮ່ວມໃນການຄຸ້ມຄອງຊັບພະຍາກອນປ່າໄມ້ ແລະ ເພື່ອເປັນການພັດທະນາຊີວິດ ການເປັນຢູ່ຂອງປະຊາຊົນທີ່ຢູ່ໃນຂອບເຂດພື້ນທີ່ເປົ້າໝາຍຂອງໂຄງການ

ໂຄງການ “ຫຼຸດຜ່ອນການປ່ອຍອາຍເຮືອນແກ້ວຈາກການທຳລາຍປ່າ" ມີເປົ້າໝາຍຈັດຕັ້ງປະຕິບັດ ຢູໃນປ່າສະຫງວນແຫ່ງຊາດຍອດນ້ຳໂມ-ພູສາມສຸມ ແຂວງຊຽງຂວາງ ແລະ ປ່າປ້ອງກັນແຫ່ງຊາດ ແຫຼ່ງນ້ຳຊັນ-ນໍ້າເຜືອກ ແຂວງຊຽງຂວາງ ແລະ ແຂວງໄຊສົມບູນ, ທັງສອງພື້ນທີ່ມີເນື້ອທີ່ທັງໝົດປະມານ 140.000 ເຮັກຕາ, ຄາດຄະເນວ່າ ການປ່ອຍທາດອາຍກາກໂບນິກຈະປະມານ 200.000 ໂຕນ/ປີ, "REDD+” ໝາຍເຖິງ “ການຫຼຸດຜ່ອນການປ່ອຍອາຍເຮືອນແກ້ວຈາກການທໍາລາຍປ່າ ແລະ ການເຮັດ ໃຫ້ປ່າໄມ້ຊຸດໂຊມຢູ່ໃນປະເທດກຳລັງພັດທະນາ, ໃນນັ້ນລວມເຖິງການຄຸ້ມຄອງປ່າໄມ້ແບບຍືນຍົງ ແລະ ການປົກປັກຮັກສາປ່າໄມ້ເພື່ອເສີມຂະຫຍາຍ ແລະ ເພີ່ມພື້ນທີ່ຂອງແຫຼ່ງກາກບອນຂອງປ່າໄມ້, ໂດຍ ການຈັດຕັ້ງປະຕິບັດໂຄງການ REDD+ ລວມມີຫຼາຍໆກິດຈະກຳທີ່ສໍາຄັນຄື: ການຄຸ້ມຄອງ ແລະ ປົກ ປັກຮັກສາປ່າໄມ້, ການສ້າງສູນຮຽນຮູ້, ການສ້າງແລວກັນໄຟ, ການກວດກາລາດຕະເວນການກຳນົດ ເຂດແດນ, ການປັບປຸງຊີວິດການເປັນຢູ່ຂອງປະຊາຊົນ, ດ້ວຍຄວາມສະໝັກໃຈ ແລະ ໄດ້ຮັບຂໍ້ມູນລ່ວງໜ້າ (FPIC) ແລະອື່ນໆ.

(ຂ່າວ: ສຳນານ - ພາບ: ສຸກສະຫວັນ)