ເພື່ອຄຸ້ມຄອງຂະແໜງພະລັງງານ ແລະ ບໍ່ແຮ່ໃຫ້ສອດຄ່ອງຕາມລະບຽບກົດໝາຍ ຮັບປະກັນບໍ່ໃຫ້ເກີດມີຜົນກະທົບຕໍ່ລະບົບນິເວດ ແລະ ສິ່ງແວດລ້ອມ.ໃນປີ 2023 ຜ່ານມາ,ກະຊວງພະລັງງານ ແລະ ບໍ່ແຮ່(ພ.ບ)ໄດ້ເອົາໃຈໃສ່ ເຜີຍແຜ່ກົດໝາຍວ່າດ້ວຍຄວາມປອດໄພເຂື່ອນ ສະບັບເລກທີ 20/ສພຊ, ລົງວັນ ທີ 7/7/2022 ແລະ ບັນດານິຕິກໍາທີ່ກ່ຽວຂ້ອງ. ພ້ອມທັງ, ສືບຕໍ່ກວດແກ້ເນື້ອໃນຄໍາແນະນໍາວ່າດ້ວຍຄວາມປອດໄພຂອງເຂື່ອນ ສະບັບພາສາລາວ; ຄຸ້ມຄອງ, ຕິດຕາມ, ກວດສອບ ແລະ ກວດກາ ຜູ້ດໍາເນີນກິດຈະການພະລັງງານຂອງພາກລັດ ແລະ ເອກະຊົນ ໃຫ້ປະຕິບັດຕາມກົດໝາຍ ແລະ ລະບຽບການຢ່າງເຂັ້ມງວດ.ສໍາເລັດການລົງກວດກາ ແລະ ປະເມີນຜົນສໍາເລັດ ການຈັດຕັ້ງປະຕິບັດໂຄງການກໍ່ສ້າງຕາຂ່າຍໄຟຟ້າ 22 kV, 0,4 kV, ຕິດຕັ້ງໝໍ້ແປງ ຈໍານວນ 4 ໂຄງການ (ການລົງທຶນຂອງລັດ): ແຂວງອຸດົມໄຊ 1 ໂຄງການ, ແຂວງບໍລິຄໍາໄຊ2 ໂຄງການ, ແຂວງໄຊສົມບູນ 2 ໂຄງການ. ລົງຕິດຕາມ, ກວດກາ, ຄຸ້ມຄອງ ແລະ ປະເມີນຜົນການຈັດຕັ້ງປະຕິບັດໂຄງການ ທີ່ນໍາໃຊ້ທຶນຊ່ວຍເຫຼືອລ້າຈາກ ສປ ຈີນ (4 ຕື້ຢວນ) ໄລຍະ 2 ທີ່ຕິດພັນກັບຂະແໜງພະລັງງານ ແລະ ບໍ່ແຮ່ ຢູ່ 4 ແຂວງພາກເໜືອ (ແຂວງຫົວພັນ, ແຂວງອຸດົມໄຊ, ແຂວງຫຼວງນໍ້າທາ ແລະ ແຂວງຜົ້ງສາລີ). ປັດຈຸບັນ,ແມ່ນສໍາເລັດການປະມູນ ແລະ ກະກຽມເຊັນສັນຍາກັບຜູ້ຮັບເໝົາກໍ່ສ້າງ ແລະ ໄລຍະທີ 3 ຢູ່ (ແຂວງໄຊສົມບູນ, ແຂວງຊຽງຂວາງ, ແຂວງໄຊຍະບູລີ ແລະ ແຂວງບໍ່ແກ້ວ) ແມ່ນຢູ່ໃນຂັ້ນຕອນການລົງສໍາຫຼວດພາກສະໜາມ. ໄດ້ລົງຕິດຕາມ,ກວດກາເຕັກນິກ, ການດໍາເນີນງານ ແລະ ບໍາລຸງຮັກສາແຫຼ່ງຜະລິດພະລັງງານ ເປັນຕົ້ນ ໂຄງການເຂື່ອນໄຟຟ້ານ້ໍາເຊເສັດ 1-2, ຫ້ວຍລໍາພັນໃຫຍ່, ນ້ໍາງື່ມ 1, ນ້ໍາມັງ 3, ນ້ໍາອູ 1, 2, 3, ນ້ໍາ ໄຜ່, ນໍ້າຄານ 2, ນໍ້າຄານ 3, ນໍ້າງຽບ 2, ນໍ້າຊັນ 3A-3B ເຊຂະໝານ 3, ນໍ້າເທີນ 1 ແລະ ຫ້ວຍລະແງ... ສໍາເລັດການເຜີຍແຜ່ສັນຍາສໍາປະທານ CA ໂຄງການພະລັງງານລົມ ມອນຊຸນ ທີ່ແຂວງເຊກອງ. ບໍລິສັດທີ່ຂໍສ້າງຕັ້ງໃໝ່ ຈໍານວນ 43 ບໍລິສັດ ແລະ ບໍລິສັດທີ່ຂໍຕໍ່ອະນຸຍາດ ຈໍານວນ 111 ບໍລິສັດ. ສໍາເລັດການປຶກສາຫາລື ກ່ຽວກັບແຜນຮັບມືສຸກເສີນຂອງໂຄງການເຂື່ອນໄຟຟ້າທີ່ກໍາລັງດໍາເນີນການຜະລິດ ຢ່າງເປັນປົກກະຕິ. 
ໄປພ້ອມກັນນັ້ນ,ຍັງໄດ້ປຶກສາຫາລື ແລະ ຄົ້ນຄວ້າປັບປຸງ ກົດໝາຍວ່າດ້ວຍແຮ່ທາດ ສະບັບເລກທີ 31/ສພຊ, ລົງວັນທີ 03/11/2017 ຊຶ່ງຈຸດປະສົງຂອງການປັບປຸງ ກໍເພື່ອເຮັດໃຫ້ການຄຸ້ມຄອງ, ຕິດຕາມ, ກວດກາ ແລະ ປົກປັກຮັກສາຊັບພະຍາກອນແຮ່ທາດໃຫ້ມີຄວາມຈະແຈ້ງ, ຄົບຖ້ວນ, ຖືກຕ້ອງ, ຊັດເຈນ, ຮັດກຸມ, ມີຄວາມໂປ່ງໃສ, ສອດຄ່ອງກັບຫຼັກການຂອງສາກົນ ແລະ ພາກພື້ນກ່ຽວກັບການດໍາເນີນທຸລະກິດກ່ຽວກັບແຮ່ທາດ, ສອດຄ່ອງຕາມແນວທາງນະໂຍບາຍຂອງພັກ ແລະ ລັດໄດ້ວາງອອກ, ສອດຄ່ອງກັບສະພາວະຄວາມເປັນຈິງ ຂອງການຂະຫຍາຍຕົວຂອງສັງຄົມໃນແຕ່ລະໄລຍະ. ກະຊວງພະລັງງານ ແລະ ບໍ່ແຮ່ຍັງສ້າງນິຕິກໍາໃນການຈັດຕັ້ງປະຕິບັດການຄຸ້ມຄອງການອອກອະນຸຍາດເຂດສໍາປະທານຊອກຄົ້ນ-ສໍາຫຼວດ ແລະ ຂຸດຄົ້ນບໍ່ແຮ່ ເປັນຕົ້ນ: ຄໍາແນະນໍາກ່ຽວກັບການສົ່ງເນື້ອທີ່ຊອກຄົ້ນຄືນ ແລະ ສໍາຫຼວດແຮ່ທາດ, ຄໍາແນະນໍາກ່ຽວກັບຂັ້ນຕອນການກວດເຂດ ແລະ ຢັ້ງຢືນແຜນທີ່ເຂດສໍາປະທານຊອກຄົ້ນ ແລະ ສໍາຫຼວດ ແຮ່ທາດ, ຄໍາແນະນໍາກ່ຽວກັບການປັກຫຼັກໝາຍເຂດສໍາປະທານຊອກຄົ້ນ ແລະ ສໍາຫຼວດແຮ່ທາດ, ຄໍາ ແນະນໍາກ່ຽວກັບການສົ່ງເນື້ອທີ່ເຂດບໍ່ແຮ່ຄືນ ແລະ ດໍາລັດວ່າດ້ວຍການປັບໃໝຕໍ່ຜູ້ລະເມີດໃນການພັດທະນາໂຄງການບໍ່ແຮ່... ສໍາເລັດການກວດກາປະເມີນຜົນ ຈັດປະເພດໂຄງການລົງທຶນດ້ານບໍ່ແຮ່ ທັງໝົດ 93 ບໍລິສັດ ສາມາດສັງ ລວມໄດ້ ວ່າ: ປະເພດ A+ ມີ 1 ບໍລິສັດ, A ມີ 6 ບໍລິສັດ, B+ ມີ 10 ບໍລິສັດ, B ມີ 16 ບໍລິສັດ, C+ ມີ 35 ບໍລິສັດ ແລະ C ມີ 25 ບໍລິສັດ. ໂດຍລວມແລ້ວ ການຈັດຕັ້ງປະຕິບັດວຽກງານພັດທະນາໂຄງການບໍ່ແຮ່ ແມ່ນໄດ້ເອົາໃຈໃສ່ການຕິດຕາມ ກວດກາ ເພື່ອໃຫ້ໄດ້ຮັບຜົນປະໂຫຍດທັງທາງກົງ ແລະ ທາງອ້ອມ ເປັນຕົ້ນ: ລາຍຮັບໂດຍກົງຂອງລັດຖະບານ,ຄ່າສໍາປະທານ ພາສີ-ອາກອນ, ຄ່າທໍານຽມ, ເງິນປັນຜົນໃນກໍລະນີລັດເຂົ້າຖືຮຸ້ນ ແລະ ອຶື່ນໆ, ລວມທັງການປະກອບສ່ວນພັດທະນາຊຸມຊົນ ແກ້ໄຂຄວາມທຸກຍາກຂອງປະຊາຊົນຢູ່ເຂດໂຄງການ; ການປະກອບທຶນປົກປັກຮັກສາສິ່ງແວດລ້ອມໃຫ້ມີຄວາມຍືນຍົງ ໂດຍອີງໃສ່ກົດໝາຍວ່າດ້ວຍແຮ່ທາດ. (ໂດຍ: ຕະວິນຍານ)