ກະຊວງ ສຶກສາທິການ ແລະ ກິລາ ຫຼື ສສກ ມອບໃບຍ້ອງຍໍ ແລະ ເງິນສະໜັບສະໜູນ ຈຳນວນ 10 ລ້ານກີບ ໃຫ້ແກ່ທີມນັກກິລາ ສະໂມສອນ ດັບເບິນໄອຈີ ນາຄາ ຫຼື WIG NAGA ທີ່ສ້າງຜົນງານ ແລະ ກຽດຊື່ສຽງໃຫ້ແກ່ປະເທດຊາດ ດ້ວຍການຍາດໄດ້ທີ1ເຕະບານ 6 ຮັບ 1 ຄົນ ລາຍການ TAR Asia Qualifiers ຈາກໂຮງຮຽນ Oscar International School ທີ່ນະຄອນຫຼວງ ບາງກອກ ປະເທດໄທ ເປັນເຈົ້າພາບ ຊຶ່ງໄດ້ກາຍເປັນຕົວແທນໃຫ້ແກ່ ສປປ ລາວ ໃນຂົງເຂດ ອາຊີ ກຽມສືບຕໍ່ເຂົ້າຮ່ວມການແຂ່ງຂັນຮອບສຸດທ້າຍ ລາຍການທີ່ຫຼາຍສະໂມສອນ ໃນທົ່ວໂລກໄຝຝັນ ຢາກຈະໄປເມືອງນີ້ ເມືອງບາເຊໂລນ່າ ປະເທດແອັດສະປາຍ ຈະຈັດຂຶ້ນໃນເດືອນເມສາ 2024ນີ້. 
  ພິທີມອບ-ຮັບໃບຍ້ອງຍໍໃນຄັ້ງນີ້ ຈັດຂຶ້ນ ເມື່ອບໍ່ດົນຜ່ານມາ ທີ່ຫ້ອງການປະສານງານຄະນະກຳມະການໂອແລມປິກແຫ່ງຊາດລາວ (ຄອລ) ຕາງໜ້າມອບໂດຍ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ແລະ ຕາງໜ້າຮັບໂດຍທ່ານ ຄອນສະຫວັນ ສິດທິໄທ ຮອງປະທານສະຫະພັນບານເຕະ ນະຄອນຫຼວງວຽງຈັນ, ມີທ່ານ  ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານ ຄອລ ພ້ອມດ້ວຍບັນດາຄະນະກົມ, ຄະນະນຳ, ຄູຝຶກ ແລະ ນັກກິລາ ຕະຫຼອດຮອດພະນັກງານທີ່ກ່ຽວຂ້ອງ ເຂົ້າຮ່ວມ. 

ສຳລັບການຍ້ອງຍໍໃນຄັ້ງນີ້ ທາງກະຊວງ ສສກ ໄດ້ມອບໃຫ້ແກ່ທ່ານ ຄອນສະຫວັນ ສິດທິໄທ ຫົວໜ້າຄະນະ, ທ່ານ ວຽງໄຊ ວິໄລກຸນ ຮອງຫົວໜ້າຄະນະ, ທ່ານ ບຸນມີ ໄຊຍະວົງ ແລະ ທ່ານ ບຸນມີ ຫຼ່ຽມໄຊຍະຈັກ ເປັນຄະນະ ນອກນັ້ນ ກໍຍັງມີຄະນະຄູຝຶກ ແລະ ນັກກິລາ ທີ່ໄດ້ຮັບການຍ້ອງຍໍຈາກກະຊວງດັ່ງກ່າວຢ່າງສົມກຽດອີກດ້ວຍ. 

ມາຮອດປັດຈຸບັນ ມີຫຼາຍພາກສ່ວນໃຫ້ການສະໜັບສະໜູນຫ ສະໂມສອນ ດັບເບິນໄອຈີ ນາຄາ ລວມມູນຄ່າ 200 ກວ່າລ້າກີບ, ໃນນັ້ນ ໄດ້ຮັບເງິນສະໜັບສະໜູນຈາກ ທ່ານເຈົ້າຄອງ ນະຄອນຫຼວງວຽງຈັນ ຈຳນວນ 10 ລ້ານກີບ, ທະນາຄານ ພັດທະນາລາວ ຫຼື LDB BANK ສະໜັບສະໜູນ 150 ລ້ານກີບ, Miss ann kavanh ເປັນຄົນລາວໃນ ອາເມຣິກາ ( ຣັດຟໍຣິດ້າ FLORIDA ) ( ເມື່ອງ ຕຳປາເບ້ TAMPA BAY ) ຈາກສະຫະລັດອາເມລິກາ 100 ໂດລາ, Mr huang bo ຈຳນວນ 1 ແສນບາດ, ທ່ານ ບຸນມີ ຫຼ່ຽມໄຊຍະຈັກ ມອບນໍ້າດື່ມ 200 ແພັກ, ຮ້ານອາຫານຊີ້ນດາດ ໂຕໝູ ຈັດພາເຂົ້າລ້ຽງອາຫານແລງ ດາດໂຕໝູ ແລະ ຫຼ້າສຸດ ກະຊວງ ສສກ ມອບເງິນ10 ລ້ານກີບ. ຂ່າວ:ສົງການ