ເພື່ອສ້າງໂອກາດໃຫ້ນັກທຸລະກິດພາຍໃນໄດ້ເຂົ້າເຖິງຕະຫຼາດຕ່າງປະເທດ ພະແນກອຸດສາຫະກໍາ-ການຄ້າ ແຂວງ (ອຄຂ) ບໍລິຄໍາໄຊ ໄດ້ມີການຮ່ວມມືປະສານສົມທົບກັບບັນດາປະເທດທີ່ມີຊາຍແດນຕິດຈອດໂດຍສະເພາະປະເທດຫວຽດນາມທີ່ຕິດຈອດກັບແຂວງບໍລິຄໍາໄຊ ມີ ແຂວງຮ່າຕິງ, ແຂວງເຫງະອານ ໄດ້ມີການແລກປ່ຽນສິນຄ້າພ້ອມກັນລົງນາມເຊັນສັນຍາເພື່ອຮ່ວມມືພັດທະນາວຽກງານອຸດສາຫະກໍາ ແລະ ການຄ້າ ລະຫວ່າງ ອຄຂ ບໍລິຄໍາໄຊ ແລະ ອຄຂ ຮ່າຕິງ ສສ ຫວຽດນາມ, ເພື່ອສົ່ງເສີມໃຫ້ເຂົ້າເຖິງຕະຫຼາດຂອງແຕ່ລະຝ່າຍ, ການແລກປ່ຽນບົດຮຽນວ່າດ້ວຍການຈັດຕັ້ງປະຕິບັດວຽກງານພັດທະນາສິນຄ້າ ໂອດ໋ອບ ແລະ ໂອຄ໋ອບ ສອງຝ່າຍເຫັນດີຊຸກຍູ້ກ່ຽວກັບວຽກງານ ໂລຈິດສຕິກ ແລະ ການຄ້າຊາຍແດນ.

ໂຕເລກສະຖິຕິການສົ່ງອອກ-ນໍາເຂົ້າ ແລະ ສິນຄ້າຜ່ານແດນ ຂອງແຂວງບໍລິຄໍາໄຊແຕ່ ປີ 2021-2023 ມີຄື: (2021) ມູນຄ່າການສົ່ງອອກ 199.570.601 ໂດລາ, (2022) 225.460.614 ໂດລາ. (11 ເດືອນ 2023 )126.156.630 ໂດລາ. ມູນຄ່າການນໍາເຂົ້າ (2021) 492.149.112 ໂດລາ, (2022) 380.752.249,60 ໂດລາ. (11 ເດືອນ 2023) ມູນຄ່າ 233.712.124,56 ໂດລາ. ມູນຄ່າສິນຄ້າຜ່ານແດນ (2021) 136.796.060 ໂດລາ, (2022) 144.310.462 ໂດລາ, (11 ເດືອນປີ 2023) 129.796.967 ໂດລາ. (ຂ່າວ: ຕະວິນຍານ)