ເລີ່ມແຕ່ວັນທີ 4 ມັງກອນ 2024 ເປັນຕົ້ນມາ ຢູ່ ນະຄອນ-ຫຼວງພະບາງ ໄດ້ກຽມເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງແບບເອເລັກໂຕຣນິກ ທີ່ນະຄອນ-ຫຼວງພະບາງ ເພື່ອອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງການບໍລິການຂອງພາກລັດ ໄດ້ສະດວກ ແລະ ວ່ອງໄວ, ເປັນການເພີ່ມຄວາມເຂົ້າໃຈ ແລະ ປຸກລະດົມຄວາມຕື່ນຕົວຂອງພົນລະເມືອງ ໃຫ້ເຂົ້າມາໃຊ້ການບໍລິການ ການຈົດທະບຽນການເກີດ ເພື່ອປົກປ້ອງສິດຜົນປະໂຫຍດຂອງຕົນເອງ ກໍຄື ບຸກຄົນກ່ຽວຂ້ອງ. ທັງເປັນການເພີ່ມຈໍານວນການຈົດທະບຽນການເກີດ ເຂົ້າລະບົບຄຸ້ມຄອງຂໍ້ມູນພົນລະເມືອງ        ເອເລັກໂຕຣນິກ ໃຫ້ບັນລຸເປົ້າໝາຍ, ໃຫ້ພົນລະເມືອງທຸກຄົນ ໄດ້ຮັບເອກະສານຢັ້ງຢືນສະຖານະພາບ ການເປັນພົນລະເມືອງລາວ ແລະ ສາມາດນໍາໃຊ້ຂໍ້ມູນສະຖິຕິພົນລະເມືອງ ປະກອບສ່ວນເຂົ້າໃນການສ້າງນະໂຍບາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ. ທົ່ວນະຄອນ-ຫຼວງພະບາງ ປະກອບມີ 30 ບ້ານ ມີພົນລະເມືອງທັງໝົດ 24.415 ຄົນ ມີ 314 ໜ່ວຍ ແລະ ມີ 4.180 ຄອບຄົວ.
ເພື່ອເຮັດໃຫ້ ຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ ຄັ້ງນີ້ ສໍາເລັດ ແລະ ບັນລຸຕາມຄາດໝາຍທີ່ກໍານົດໄວ້ ຂໍເຊີນຊວນ ປະຊາຊົນ ທົ່ວນະຄອນ-ຫຼວງພະບາງ ຈົ່ງພ້ອມພຽງກັນເຂົ້າຮ່ວມຂະບວນການດັ່ງກ່າວ ໃຫ້ຟົດຟື້ນຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ ໃນຄັ້ງນີ້ຈະສໍາເລັດໃນໄວນີ້ໆ.
ຂ່າວ-ພາບ: ຈໍາປາ