ໃນວັນ 9 ມັງກອນ ຜ່ານມາ ທີ່ສຳນັກງານອົງການປົກຄອງ ນະຄອນຫຼວງວຽງຈັນ, ສະພາປະຊາຊົນ ນະຄອນຫຼວງ ໄດ້ດຳເນີນກອງປະຊຸມສຳມະນາ ຮ່າງນິຕິກຳ ຈຳນວນ 2 ສະບັບ ທີ່ໄດ້ຮັບຮອງເອົາດ້ານຫຼັກການໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຜ່ານມາ, ໂດຍການເປັນປະທານກອງປະຊຸມຂອງ ທ່ານ ນາງ ລຳພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ ຮອງປະທານ ສະພາປະຊາຊົນ ນະຄອນຫຼວງວຽງຈັນ, ເຂົ້າຮ່ວມມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1, ສະມາຊິກສະພາປະຊາຊົນ ນະຄອນຫຼວງວຽງຈັນ, ຄະນະຮັບຜິດຊອບຮ່າງນິຕິກຳ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນກອງປະຊຸມຄັ້ງນີ້, ໄດ້ຮັບຟັງການລາຍງານຈາກຄະນະຮັບຜິດຊອບບັນດາຮ່າງນິຕິກຳ2 ສະບັບ ຄື: ຮ່າງຂໍ້ຕົກລົງ ວ່າດ້ວຍກອງທຶນພັດທະນາກິລາ-ກາຍຍະກຳ ນະຄອນຫຼວງວຽງຈັນ ແລະ ຮ່າງຂໍ້ຕົກລົງ ວ່າດ້ວຍການກຳນົດລາຄາຫົວໜ່ວຍທົດແທນຄ່າເສຍຫາຍຂອງໂຄງການກໍ່ສ້າງປ້ອງກັນຕາຝັ່ງ ແລະ ພັດທະຄານແຄມຂອງ ໄລຍະທີ II.ພາຍຫຼັງທີ່ໄດ້ຖືກຮັບຮອງທາງດ້ານຫຼັກການ ໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນວ ຄະນະຮັບຜິດຊອບໄດ້ສືບຕໍ່ປັບປຸງເນື້ອໃນຂອງແຕ່ລະມາດຕາ ແລະ ມາດຕະການຕ່າງໆ ຕາມການປະກອບຄຳເຫັນຂອງສະມາຊິກສະພາ ເພື່ອນຳມາລາຍງານຕໍ່ກອງປະຊຸມສຳມະນາຄັ້ງນີ້ ຊຶ່ງຕໍ່ກັບ 2 ຮ່າງຂໍ້ຕົກລົງດັ່ງກ່າວ ເຫັນວ່າຍັງມີບາງຈຸດທີ່ຕ້ອງໄດ້ສືບຕໍ່ປັບປຸງ ເປັນຕົ້ນ: ມາດຕາ ທີ່ຕິດພັນກັບຂອບເຂດການນໍາໃຊ້, ດ້ານໂຄງປະກອບແລະ ປັບປຸງຮຽບຮຽງເນື້ອໃນຄຳສັບຄືນເພື່ອໃຫ້ມີເນື້ອໃນຄົບຖ້ວນສົມບູນ ແລ້ວນຳມາລາຍງານຄືນ ຕໍ່ກອງປະຊຸມ ສະພາປະຊາຊົນ ນະຄອນຫຼວງ ເພື່ອຈະໄດ້ຮັບຮອງເອົາບັນດາຮ່າງຂໍ້ຕົກລົງດັ່ງກ່າວ.
                                              ຂ່າວ-ພາບ:ສະພາປະຊາຊົນ ນວ