ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ໄດ້ຖະແຫຼງຂ່າວຕໍ່ສື່ມວນຊົນແຂວງໃນວັນທີ 11 ມັງກອນ ນີ້ວ່າ: ການກຽມຄວາມພ້ອມ ເປີດປີທ່ອງທ່ຽວລາວ 2024 ແລະງານສະເຫຼີມສະຫຼອງ ຫຼວງພະບາງ ເຂົ້າເປັນເມືອງມໍຣະດົກໂລກ ຄົບຮອບ 28 ປີ ໃນຄັ້ງນີ້ ໂດຍອີງໃສ່ສະພາບເງື່ອນໄຂຈຸດພິເສດ ແລະ ທ່າແຮງ ອັນໂດດເດັ່ນ, ການນໍາຂອງແຂວງ ເຫັນໄດ້ຄວາມສໍາຄັນ ຊຶ່ງໄດ້ກໍານົດແຜນຍຸດທະສາດຂອງແຂວງ ໂດຍຖືເອົາວຽກງານການທ່ອງທ່ຽວ ເປັນບຸລິມະສິດອັນດັບໜຶ່ງ ໃນການພັດທະນາເສດຖະກິດ-ສັງຄົມຂອງແຂວງ ໃນການສ້າງຫຼວງພະບາງ ເປັນສູນກາງການທ່ອງທ່ຽວ ທາງພາກເໜືອ ຂອງ ສປປ ລາວ ທາງດ້ານທຳມະຊາດ, ປະຫວັດສາດ ແລະ ວັດທະນະທໍາ, ເປັນໃຈກາງທາງດ້ານການສຶກສາ ແລະ ສາທາລະນະສຸກ, ເປັນຈຸດພັກເຊົ່າທີ່ມີການບໍລິການແບບຄົບວົງຈອນ ແລະ ມີທາງຜ່ານໄປສູ່ບັນດາແຂວງພາກເໜືອຂອງລາວ ແລະ ອະນຸພາກພື້ນ, ເພື່ອເປັນການສົ່ງເສີມ, ໂຄສະນາ ແລະ ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ອງທ່ຽວຫຼວງພະບາງຫຼາຍຂຶ້ນ. 
ສໍາລັບບັນດາກິດຈະກໍາ ທີ່ຈະຈັດຕັ້ງປະຕິບັດປີທ່ອງທ່ຽວ2024 ປະກອບມີ 9 ແຜນງານ 41 ກິດຈະກຳ. ໃນນີ້, ກິດຈະກໍາຫຼັກທີ່ໄດ້ຈັດຕັ້ງປະຕິບັດໄປແລ້ວມີທັງໝົດ 7 ກິດຈະກໍາ ແລະ ຈະໄດ້ສືບຕໍ່ຈັດຕັ້ງປະຕິບັດກິດຈະກຳຕ່າງໆຕະຫຼອດປີ 2024 ໃຫ້ສຳເລັດ. ແຂວງຫຼວງພະບາງມີຈຸດພິເສດ ແລະ ຄວາມໂດດເດັ່ນ ທາງດ້ານສະຖາປັດຕະຍະກໍາ, ດ້ານທຳມະຊາດ, ປະຫວັດສາດ ແລະ ວັດທະນະທຳ ຂອງຫຼວງພະບາງ ບວກກັບແນວທາງການພັດທະນາ, ປັບປຸງ, ສົ່ງເສີມວຽກງານການທ່ອງທ່ຽວ, ຄຸນະພາບຂອງການບໍລິການ ແລະ ປົກປັກຮັກສາທາງດ້ານມໍຣະດົກ ໃຫ້ຄົງຄຸນຄ່າ ຂອງຫຼວງພະບາງ. ດັ່ງນັ້ນ, ອົງການອຸຍແນັດສະໂກ ຈຶ່ງໄດ້ຮັບຮອງເອົາແຂວງຫຼວງພະບາງ ເຂົ້າເປັນມໍຣະດົກໂລກ ໃນວັນທີ 9 ທັນວາ 1995. ທ່ານ ຮອງເຈົ້າແຂວງຫຼວງພະບາງ ຍັງໄດ້ເຊີນມາຍັງບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ, ຜູ້ປະກອບການ ທຸລະກິດການທ່ອງທ່ຽວ, ອົງການປົກຄອງບ້ານ ຕະຫຼອດຮອດ ປະຊາຊົນບັນດາເຜົ່າ ເຂົ້າຮ່ວມທ່ຽວຊົມບັນດາກິດຈະກໍາສະຫຼອງແຂວງຫຼວງພະບາງ ເຂົ້າເປັນມໍຣະດົກໂລກ ທີ່ຈະໄດ້ຈັດຂຶ້ນຢ່າງເປັນທາງການ ໃນວັນທີ 15 ມັງກອນ 2024 ທີ່ສະໂມສອນໃຫຍ່ ຫ້ອງວ່າການແຂວງຫຼວງພະບາງ.
ຂ່າວ-ພາບ: ຈໍາປາ