ເມື່ອບໍ່ດົນມານີ້, ກອງບັນຊາການປ້ອງກັນຄວາມສະຫງົບ (ປກສ) ເມືອງອຸທຸມພອນ ແຂວງສະຫວັນນະເຂດ ໄດ້ຈັດກອງປະຊຸມສຶກສາອົບຮົມກຸ່ມເປົ້າໝາຍໄວໜຸ່ມທີ່ຂັບຂີ່ລົດໄວ,ໃຊ້ສຽງດັງໃນຍາມກາງຄືນດັດແປງສະພາບເຕັກນິກລົດແລະ ຢຶດລົດໄດ້ຈໍານວນ 18 ຄັນ,ບໍ່ມີເອກະສານ13 ຄັນທີ່ດັດແປງສະພາບເຕັກນິກລົດພ້ອມທັງປັບໄໝຕາມລະບຽບກົດໝາຍບ້ານເມືອງວາງອອກ, ໂດຍການເຂົ້າຮ່ວມເປັນປະທານຂອງທ່ານພັນໂທ ສາຄອນ ສີສຸກ ຮອງຫົວໜ້າກອງບັນຊາການ ປກສ ເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານພັນຕີ ຄໍາຕັນ ເຄນໄຊບຸນຍະເລດ ຮອງຫົວໜ້າພະແນກຊີ້ນໍາວຽກງານຈະລາຈອນກອງບັນຊາການ ປກສ ເມືອງໃຫ້ຮູ້ວ່າ: ການສຶກສາອົບຮົມໄວໜຸ່ມໃນຄັ້ງນີ້, ເພື່ອໃຫ້ເຂົາເຈົ້າຮູ້ຈັກລະບຽບກົດໝາຍ,ຮູ້ຈັກການຂັບຂີ່ລົດຕາມທ້ອງຖະໜົນຫຼວງ,ຮູ້ຈັກກົດລະບຽບຈະລາຈອນ,ສິ່ງສໍາຄັນກໍຄືກົດໝາຍປະມວນອາຍາມາດຕາ 149,150 ແລະ 188 ມີທັງໂທດຈໍາຄຸກ ແລະ ປັບໄໝຕໍ່ຜູ້ກະທໍາຜິດ ພ້ອມທັງຮຽກຮ້ອງໃຫ້ຜູ້ປົກຄອງເອົາໃຈໃສ່ສຶກສາອົບຮົມລູກຫຼານຂອງຕົນ ບໍ່ໃຫ້ເຂົາເຈົ້າໄປເດິກມາດື່ນ,ບໍ່ໃຫ້ມີການຂັບຂີ່ລົດໄວ,ໃຊ້ສຽງດັງລົບກວນແກ່ຜູ້ອື່ນໃນເວລາກາງຄືນ
    ໂອກາດນີ້,ທ່ານພັນໂທ ສາຄອນ ສີສຸກໄດ້ໃຫ້ກຽດໂອ້ລົມຕໍ່ກຸ່ມເປົ້າໝາຍພ້ອມທັງເຮັດບົດບັນທຶກກັບຜູ້ປົກຄອງ ແລະ ອໍານາດການປົກຄອງບ້ານຕື່ມອີກ.
ຂ່າວ-ພາບ: ບຸນຊູ ພົມມະເທບ