ສະຖາບັນສື່ມວນຊົນວັດທະນະທໍາ ແລະ ທ່ອງທ່ຽວ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ໄດ້ຈັດຝຶກອົບຮົມວຽກງານວັດທະນະທໍາເພື່ອການທ່ອງທ່ຽວຂຶ້ນໃນວັນທີ16ມັງກອນນີ້ທີ່ຫ້ອງການສຶກສາທິການ ແລະ ກິລາເມືອງປາກລາຍແຂວງໄຊຍະບູລີ ໂດຍການເປັນປະທານຂອງທ່ານ ຄໍາຫຼ້າ ຍອຍສາຍຄໍາຫົວໜ້າສະຖາບັນສື່ມວນຊົນວັດທະນະທຳ ແລະ ທ່ອງທ່ຽວ, ມີຕາງໜ້າຈາກຂະແໜງວັດທະນະທໍາ, ຫົວໜ້າ, ຮອງຫົວໜ້າຫ້ອງ ການ, ຜູ້ປະກອບການ ພ້ອມດ້ວຍພາກສ່ວນກ່ຽວຂ້ອງເຂົ້າຮວ່ມ.
    ການຝຶກອົບຮົມໃນຄັ້ງນີ້,ເພື່ອສ້າງຄວາມພ້ອມໃຫ້ແກ່ການປະຕິບັດແຜນພັດທະນາວຽກງານ ຖວທ. ເວົ້າລວມ,ເວົ້າສະເພາະແຜນຍຸດທະສາດວຽກງານວັດທະນະທຳແຕ່ນີ້ຮອດປີ 2025 ແລະວິໃສທັດຮອດປີ 2030 ໃຫ້ໄດ້ຮັບການຈັດຕັ້ງປະຕິບັດເປັນແຕ່ລະບາດກ້າວດ້ວຍຄວາມຕັ້ງໜ້າຢ່າງໜັກແໜ້ນ ເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນຜູ້ທີ່ເຮັດວຽກໃນຂົງເຂດວັດທະນະທຳທ່ອງທ່ຽວ ແລະ ຂະແໜງປິ່ນອ້ອມວຽກງານດັ່ງກ່າວພາຍໃນເມືອງປາກລາຍ ບົດຮຽນທີ່ນໍາມາສະເໜີປະກອບມີ 3 ຫົວຂໍ້: ຈາລິຍະທໍາສຶກສາ ແລະ ຮີດຄອງປະເພນີລາວ,ການອະນຸລັກ ແລະ ສົ່ງເສີມສິລະປະການສະແດງ,ການບໍລິຫານມໍລະດົກວັດທະນະທຳ.ນອກຈາກຮຽນທິດສະດີຍັງໄດ້ລົງພາກປະຕິບັດຕົວຈິງ ທັງນີ້ເພື່ອສ້າງຄວາມເຂັ້ມແຂງໃຫ້ແກ່ເມືອງປາກລາຍ. 
ຂ່າວ-ພາບ: ກ່າ ຄຸດທະວົງສັກ