ໃນວັນທີ 16 ມັງກອນ ນີ້, ທ່ານ ສົມສະໜຸກ ໄຊອຸດົມເຈົ້າເມືອງບໍ່ແຕນ ແຂວງໄຊຍະບູລີໄດ້ມອບເງິນ ຈຳນວນ 10 ກີບ ໃຫ້ອົງການປົກຄອງບ້ານຫ້ວຍຕາປູ່ ເພື່ອສົມທົບທຶນກໍ່ສ້າງທາງເບຕົງ (ທາງຮ່ອມ) ບ້ານຫ້ວຍຕາປູ່ຊຶ່ງບ້ານດັ່ງກ່າວມີ 41 ຄອບຄົວມີພົນລະເມືອງ237ຄົນ ຍິງ 111ຄົນ.
ການກໍ່ສ້າງເສັ້ນທາງຮ່ອມ ບ້ານຫ້ວຍຕາປູ່ມີຄວາມຍາວທັງໝົດ 215 ແມັດ, ກວ້າງ 4 ແມັດໜາ 10 ຊັງຕີແມັດຊຶ່ງເປັນການປະກອບສ່ວນທຶນຂອງປະຊາຊົນ ພາຍໃນບ້ານແລະນັກທຸລະກິດຜູ້ປະກອບການພາຍໃນເມືອງ ແລະ ຕ່າງເມືອງ.ເສັ້ນທາງດັ່ງກ່າວແມ່ນເທເບຕົງເສີມເຫຼັກ ຊຶ່ງມີມູນຄ່າການກໍ່ສ້າງທັງໝົດ 152 ລ້ານກວ່າກີບ, ໃນນີ້ໄດ້ຈາກການປຸກລະດົມປະຊາຊົນພາຍໃນບ້ານໄດ້ທັງໝົດ 80 ລ້ານກວ່າກີບ,ກອງທຶນພັດທະນາບ້ານ 22 ລ້ານກ່ວາກີບ ແລະ ຜູ້ປະກອບການທຸລະກິດ 48 ລ້ານກ່ວາກີບ, ຊຶ່ງທ່ານເຈົ້າເມືອງບໍ່ແຕນ ໄດ້ມອບທຶນສົມທົບອີກ 10 ລ້ານກີບຊຶ່ງເສັ້ນທາງດັ່ງກ່າວແມ່ນກໍ່ສ້າງສຳເລັດແລ້ວ 100%.
ທັງນີ້ ການກໍ່ສ້າງເສັ້ນທາງດັ່ງກ່າວ ເປັນການພັດທະນາພື້ນຖານໂຄງລ່າງພາຍໃນບ້ານເປັນຕົ້ນແມ່ນຖະໜົນຫົນທາງເພື່ອອຳນວຍຄວາມສະດວກໃຫ້ແກ່ປະຊາຊົນໃນການໄປມາຫາສູ່ກັນສະດວກສະບາຍຂຶ້ນ.
ຂ່າວ-ພາບ: ເມືອງບໍ່ແຕນ