ກອງປະຊຸມສະຫຼຸບການຈັດຕັ້ງປະຕິບັດວຽກງານຂອງຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກຂັ້ນແຂວງ (ຄກມດຂ) ໄຊຍະບູລີປະຈໍາປີ 2023 ແລະ ທິດທາງແຜນການປະຈໍາປີ 2024 ຈັດຂຶ້ນຫວ່າງບໍ່ດົນມານີ້ ທີ່ພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງ ປະທານຄກມດຂ, ເມືອງທີ່ກ່ຽວຂ້ອງເຂົ້າຮ່ວມ.
    ທ່ານ ເພັດພິໄຊ ສູນວິໄລ ໄດ້ກ່າວເປີດກອງປະຊຸມ. ຈາກນັ້ນ, ທ່ານນາງ ຄໍາຜີວ ພັນທະວົງ ປະທານສະຫະພັນແມ່ຍິງແຂວງ ຮອງປະທານ ຄກມດຂ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຂອງ ຄກມດຂ ປະຈໍາປີ 2023 ແລະ ທິດທາງແຜນການປະຈໍາປີ 2024 ວ່າ: ໃນໄລຍະ 1 ປີຜ່ານມາ,ຄກມດຂ ໄດ້ເອົາໃຈໃສ່ສູ້ຊົນໃນການປັບປຸງກົນຈັກການຈັດຕັ້ງຂອງແຂວງ ເພື່ອສ້າງເງື່ອນໄຂໃຫ້ແມ່ຍິງໄດ້ບັນຈຸສັບຊ້ອນເຂົ້າໃນຕໍາແໜ່ງຄຸ້ມຄອງ-ນໍາພາຂັ້ນຕ່າງໆທັງໝົດ 227ທ່ານ,ເຂົ້າຮ່ວມຂະບວນການແກ້ໄຂຄະດີທີ່ພົວພັນເຖິງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ 9 ຄັ້ງ, ແກ້ໄຂບັນຫາອັນພົ້ນເດັ່ນໃນສື່ສັງຄົມອອນລາຍກ່ຽວກັບເຫດການພໍ່ແມ່ໃຊ້ຄວາມຮຸນແຮງຕໍ່ລູກ (ສັ່ງສອນລູກ) ເກີນກວ່າເຫດ ມັດແຂນໄຂວ່ຫຼັງຫ້ອຍໄວ້ຮາວຕາກເຄື່ອງ, ໄດ້ຊ່ວຍເຫຼືອແມ່ຍິງທີ່ຖືກເຄາະຮ້າຍຈາກການຄ້າມະນຸດ 1 ຄັ້ງ 7 ຄົນ ແລະ ໄດ້ສະກັດກັ້ນຄົນຕ່າງປະເທດຕົວະຍົວະແມ່ຍິງລາວໄປຖ່າຍສື່ລາມົກອານາຈານ 1 ຄັ້ງ, ມີແມ່ຍິງໜຸ່ມ 20 ຄົນ,ສ້າງເງື່ອນໄຂໃຫ້ແມ່ຍິງ ແລະ ເດັກໄດ້ເຂົ້າເຖິງການບໍລິການດ້ານສຸຂະພາບຢ່າງທົ່ວເຖິງ 4.655 ຄັ້ງ, ຊຸກຍູ້ໃຫ້ແມ່ຍິງແຂວງໄດ້ພັດທະນາສີມືແຮງງານ ແລະ ມີວຽກເຮັດງານທໍາ ເພື່ອສ້າງເສດຖະກິດຄອບຄົວ 586 ຄົນ, ເປັນເຈົ້າການໂຄສະນາເຜີຍແຜ່ການຢຸດຕິໃຊ້ຄວາມຮຸນແຮງຂອງແມ່ຍິງ ແລະ ເດັກນ້ອຍ 2 ຄັ້ງ. 
ພ້ອມນີ້,ຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດຄວາມໝາຍໝັ້ັນຂອງຮອງເຈົ້າແຂວງໄຊຍະບູລີ ເພື່ອຫຼຸດຜ່ອນຄວາມທຸກຍາກຂອງເດັກປະຈໍາປີ 2023 ແລະ ທິດທາງແຜນການ 2024 ພ້ອມທັງປະກອບຄໍາເຫັນຕໍ່ການຕີລາຄາຜົນງານດ້ານດີ, ດ້ານຄົງຄ້າງ, ບາງບົດຮຽນທີ່ຖອດຖອນໄດ້ ແລະ ບັນຫາສິ່ງທ້າທາຍໃນການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ, ວຽກງານແມ່ ແລະ ເດັກໃນໄລຍະຜ່ານມາ ແລະ ວາງແຜນການເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານໃນຕໍ່ໜ້າໃຫ້ແທດເໝາະກັບສະພາບຄວາມເປັນຈິງຂອງກົມກອງທ້ອງຖິ່ນຮາກຖານ.                    
ຂ່າວ-ພາບ: ມະໄລວັນ