ພິທີເປີດສົກຮຽນໃໝ່ຊັ້ນມັດທະຍົມສຶກສາຕອນປາຍບໍາລຸງທີ່ສູນການສຶກສານອກໂຮງຮຽນແຂວງຄໍາມ່ວນ ໄດ້ຈັດຂຶ້ນໃນວັນທີ 2 ຕຸລາ ນີ້ ໂດຍການເຂົ້າຮ່ວມເປັນປະທານຂອງທ່ານ ນາງ ຄໍາສອນ  ສີວົງສາຮອງຫົວໜ້າພະແນກສຶກສາທິການ ແລະ ກິລາແຂວງ , ພ້ອມດ້ວຍຄະນະ,ຂະແໜງການທີ່ກ່ຽວຂ້ອງຕະຫຼອດພະນັກງານຄູ-ອາຈານ ແລະ ນັກຮຽນບໍາລຸງເຂົ້າຮ່ວມ.
    ທ່ານ ທອງຄູນ ສີລິຈັນທາ ຫົວໜ້າສູນການສຶກສານອກໂຮງຮຽນແຂວງຄຳມ່ວນໄດ້ລາຍງານ ຜົນສຳເລັດຂອງສູນສຶກສານອກໂຮງຮຽນເລີ່ມເປີດການຮຽນ-ການສອນບຳລຸງຊັ້ນມັດທະຍົມຕອນປາຍ ສົກຮຽນ 2022-2023 ມີນັກຮຽນທັງໝົດ 27 ຄົນຍິງ  9  ຄົນ ຂັ້ນ ມ.5 ມີ 1 ຫ້ອງຮຽນ; ຈຳນວນນັກຮຽນທັງໝົດ 1  ຄົນຍິງ 1 ຄົນ, ຂັ້ນ ມ.6 ມີ 1 ຫ້ອງຮຽນ; ຈຳນວນນັກຮຽນທັງໝົດ 4  ຄົນຍິງ 2 ຄົນ, ຂັ້ນ ມ.7 ມີ 1 ຫ້ອງຮຽນ; ຈຳນວນນັກຮຽນທັງໝົດ 22  ຄົນຍິງ 6 ຄົນ.ການຮຽນ-ການສອນແມ່ນໄດ້ກຳນົດເອົາວັນເສົາ-ອາທິດ; ອຸປະກອນການຮຽນ-ການສອນ,ປຶ້ມແບບຮຽນຕາມຫຼັກສູດແມ່ນມີຄົບ, ວຸດທິການສຶກສາຂອງຄູທີ່ສອນຢູ່ສູນການສຶກສານອກໂຮງຮຽນຊັ້ນສູງສຸດແມ່ນຈົບປະລິນຍາຕີ, ຕ່ຳສຸດແມ່ນຊັ້ນສູງ ແລະ ສ່ວນຫຼາຍນັກຮຽນບຳລຸງແມ່ນມີແຕ່ຜູ້ໃຫຍ່ມາຮຽນ; ການຮຽນໄດ້ດີ ແລະ ມີຈຳນວນໜ່ອຍໜຶ່ງບໍ່ຄ່ອຍເອົາໃຈໃສ່ມາຮຽນຄິດເປັນເປີເຊັນ 40%, ປະກອບມີ 9 ວິຊາຮຽນຄື: ພາສາລາວ-ວັນນະຄະດີ, ພູມສາດ, ປະຫວັດສາດ, ເຄມີສາດ, ຟີຊິກສາດ,ຊີວະສາດ, ຄະນິດສາດ, ສຶກສາພົນລະເມືອງ ແລະ ພາສາອັງກິດ. 
ນອກຈາກນັ້ນ, ຍັງໄດ້ຝຶກອົບຮົມວິຊາຊີບຂັ້ນພື້ນຖານໃນຫົວຂໍ້: ຫຍິບພາບາສີ ແລະ ວິທີເຮັດນ້ຳຢາລ້າງຈານສູດພື້ນບ້ານໄລຍະສັ້ນໃຫ້ແກ່ປະຊາຊົນກຸ່ມເປົ້າໝາຍເມືອງທ່າແຂກ (ບ້ານດອນເຄື່ອນຊ້າງ,ບ້ານສົມສະໝຸກ,ບ້ານໜອງບົວຄຳ ແລະ ພະນັກງານສູນນອກໂຮງຮຽນເມືອງທ່າແຂກ), ການຝຶກອົບຮົມປຸງແຕ່ງໝາກອຶ-ໝາກເລັ່ນ ແລະ ວິທີເຮັດນໍ້າຢາລ້າງຈານສູດພື້ນບ້ານໃຫ້ແກ່ປະຊາຊົນກຸ່ມເປົ້າໝາຍເມືອງໜອງບົກ (ບ້ານດອນຂຽວ); ຝຶກອົບຮົມທັກຟອຍ ແລະ ວິທີເຮັດນໍ້າຢາລ້າງຈານສູດພື້ນບ້ານ ໃຫ້ແກ່ ປະຊາຊົນກຸ່ມເປົ້າໝາຍ  ເມືອງມະຫາໄຊ (ບ້ານໂພນໄຊ), ພ້ອມນັ້ນຍັງໄດ້ຍົກໃຫ້ເຫັນເຖິງແຜນພັດທະນາການສຶກສາບຳລຸງຍົກລະດັບຊັ້ນມ.ປາຍສົກປີ 2023-2024 ລວມເຖິງເປົ້າໝາຍລວມ ແລະ ວຽກງານຈຸດສຸມໃນຕໍ່ໜ້າ. 
ທ່ານ ນາງ ຄໍາສອນສີວົງສາ ກໍໄດ້ມີຄໍາເຫັນຕໍ່ພິທີເປີດສົກຮຽນໃໝ່ 2023-2024 ໂດຍທ່ານໄດ້ຍົກໃຫ້ເຫັນເຖິງຄວາມໝາຍ, ຄວາມສໍາຄັນຂອງການສຶກສາຊັ້ນມັດທະຍົມສຶກສາຕອນປາຍບໍາລຸງຕະຫຼອດເຖິງຜົນປະໂຫຍດທີ່ຜູ້ຮຽນຈະໄດ້ຮັບເພາະການການຮຽນໃນຢູ່ສູນການສຶກສານອກໂຮງຮຽນພາຍຫຼັງສໍາເລັດການຮຽນແລ້ວຜູ້ຮຽນສາມາດນໍາໃຊ້ໃບປະກາສະນີຍະບັດຂອງຕົນໄປສະເໜີຮຽນຕໍ່ໃນສາຂາວິຊາຊີບຕ່າງໆໄດ້ຕາມລະບຽບກົດໝາຍ.
ຂ່າວ-ພາບ: ແດງສະຫວັດ ແສນພານິດ.