ພິທີເຊັນສັນຍາສໍາປະທານ (CA) ໂຄງການສໍາປະທານເນື້ອທີ່ດິນ 150 ເຮັກຕາ ເພື່ອປູກໝາກແມັກຄາເດເມຍ ແລະ ຖົ່ວລຽນ ເພື່ອຈໍາໜ່າຍພາຍໃນ ແລະ ສົ່ງອອກ ຢູ່ບ້ານພະໜວນດົງ ເມືອງປາກຊ່ອງ ແຂວງຈໍາປາສັກ ລະຫວ່າງ ອົງການປົກຄອງແຂວງຈໍາປາສັກ ແລະ ບໍລິສັດ ປາຄາເວຍ ບໍລະເວນປາກຊ່ອງ ຈໍາກັດຜູ້ດຽວ ໄດ້ຈັດຂຶ້ນໃນທ້າຍອາທິດຜ່ານມາ ທີ່ພະແນກແຜນການ ແລະ ການລົງທຶນແຂວງ ໂດຍໃຫ້ກຽດເຂົ້າຮ່ວມຂອງທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ, ມີພະແນກການກ່ຽວຂ້ອງ, ເມືອງ ແລະ ອໍານວຍການບໍລິສັດເຂົ້າຮ່ວມ.

ໃນພິທີ ເຊັນສັນຍາສໍາປະທານຄັ້ງນີ້, ຕາງໜ້າອົງການປົກຄອງແຂວງເຊັນໂດຍທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນ, ທ່ານ ຄໍາ ນິລະວົງ ວ່າການຫົວໜ້າພະແນກກະສິກໍາ ແລະ ປ່າໄມ້, ທ່ານ ບຸນລິດ ເທບບຸນສູງ ວ່າການເຈົ້າເມືອງປາກຊ່ອງ ແລະ ຝ່າຍບໍລິສັດເຊັນໂດຍທ່ານ ເລວັນຍາ ອໍານວຍການບໍລິສັດ ປາຄາເວຍ ບໍລະເວນ ປາກຊ່ອງ ຈໍາກັດຜູ້ດຽວ, ທ່ານ ເລວັນເກືອງ ຕາງໜ້າບໍລິສັດ ຂັນໄຊພັດທະນາກະສິກໍາ ຈໍາກັດຜູ້ດຽວ.

(ຂ່າວ-ພາບ: ຈັນທະວີສັກ ເຊັນສຸດໃຈ)