ຫ້ອງການອຸດສາຫະກຳ ແລະ ການຄ້າເມືອງ ວິລະບູລີ ແຂວງສະຫວັນນະເຂດໄດ້ຈັດພິທີທໍາລາຍສິນຄ້າເສື່ອມຄຸນນະພາບ (ສິນຄ້າໝົດອາຍຸ) ຂຶ້ນເມື່ອບໍ່ດົນມານີ້ ທີ່ຫ້ອງການດັ່ງກ່າວ ໂດຍການເຂົ້າຮ່ວມຂອງທ່ານ ສີຄູນ ບານມະນີວົງ ຮອງເຈົ້າເມືອງວິລະບູລີ ຜູ້ຊີ້ນໍາວຽກງານວັດທະນະທຳ-ສັງຄົມ, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ບົວລະຄອນ ພົມມະວົງ ຮອງຫົວໜ້າຫ້ອງການອຸດສາຫະກໍາ ແລະການຄ້າເມືອງ ວິລະບູລີ ໄດ້ລາຍງານວ່າ: ໃນໄລຍະ 1 ປີ ທີ່ຜ່ານມາ ເຈົ້າໜ້າທີ່ກວດກາການຄ້າເມືອງວິລະບູລີໄດ້ຈັດຕັ້ງເຄື່ອນໄຫວຕິດຕາມ, ກວດກາ ການຈໍາໜ່າຍສິນຄ້າເສື່ອມຄຸນນະພາບ, ໝົດອາຍຸ ສິນຄ້າເກືອດຫ້າມ-ລອກຮຽນແບບ ແລະ ອື່ນໆ ຢູ່ຕາມທ້ອງຕະຫຼາດ ແລະ ບັນດາຫ້າງຮ້ານຕ່າງໆ ທັງຂອງຄົນລາວ ແລະຊາວຕ່າງປະເທດທີ່ເຄື່ອນໄຫວທຸລະກິດ ຄ້າຂາຍຢູ່ແຕ່ລະຈຸດສຸມ, ກຸ່ມບ້ານ ແລະ ບ້ານຕ່າງໆໃນຂອບເຂດທົ່ວເມືອງ ວິລະບູລີ ໄດ້ທັງໝົດ 5 ຄັ້ງ, ໄດ້ຮ່ວມກັບເຈົ້າໜ້າທີ່ກວດກາການຄ້າແຂວງ 2 ຄັ້ງ ມີຫ້າງຮ້ານທີ່ຖືກກວດກາທັງໝົດ 75 ຮ້ານ, ກວດພົບສິນຄ້າຈຳໜ່າຍທີ່ບໍ່ຖືກຕ້ອງ ມີ 13 ຮ້ານ ຊຶ່ງເຈົ້າໜ້າທີ່ໄດ້ເຮັດບົດບັນທຶກກ່າວເຕືອນ ແລະ ສຶກສາອົບຮົມເຈົ້າຂອງຮ້ານ, ພ້ອມທັງຢຶດສິນຄ້າດັ່ງກ່າວໄວ້ໄດ້ທັງໝົດ 14 ລາຍການ, ລວມມູນຄ່າທັງໝົດ 3 ກວ່າກີບ, ໃນນີ້ມີສິນຄ້າເສື່ອມຄຸນ-ໝົດອາຍຸ 13 ລາຍການ, ສິນຄ້າຫ້າມຈຳໜ່າຍມີ1 ລາຍການ ຈຶ່ງໄດ້ນຳເອົາສິນຄ້າເສື່ອມຄຸນ-ໝົດອາຍຸດັ່ງກ່າວທຳລາຍຖິ້ມ.

ຂ່າວ-ພາບ: ສະຫວັນນະເຂດ