ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949-20/1/2024) ທີ່ໝູນວຽນມາບັນຈົບຄົບຮອບອີກວາລະໜຶ່ງ. ໃນວັນທີ 18 ມັງກອນ ຜ່ານມາ ຄະນະພັກ, ຄະນະນຳກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ນຳໂດຍ ສະຫາຍ ນາງ ບຸນຄຳ ວໍລະຈິດ ກຳມະການສູນກາງພັກ ເລຂາຄະນະພັກ ລັດຖະມົນຕີ ກຊສ ພ້ອມດ້ວຍຄະນະ ໄດ້ເຂົ້າອວຍພອນຄະນະພັກ, ຄະນະນຳກະຊວງປ້ອງກັນປະເທດ ໂດຍໃຫ້ກຽດຕ້ອນຮັບຂອງ ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ ພ້ອມຄະນະ.

ໃນໂອກາດທີ່ມີຄວາມໝາຍຄວາມສຳຄັນທາງປະຫວັດສາດນີ້ ສະຫາຍ ນາງ ບຸນຄຳ ວໍລະຈິດ ໄດ້ນຳເອົາຄວາມຢື້ຢາມ, ຖາມຂ່າວ ແລະ ຄໍາອວຍພອນອັນປະເສີດຈາກພະນັກງານ, ລັດຖະກອນ ແລະ ກຳມະກອນ ທົ່ວຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ ອວຍພອນຕໍ່ ຄະນະນໍາ ກະຊວງປ້ອງກັນປະເທດ ແລະ ພົນທະຫານ ທີ່ກໍາລັງປະຕິບັດໜ້າທີ່ ໃນທົ່ວກອງທັບ ແລະ ຕີລາຄາສູງຕໍ່ຜົນງານ, ການເຕີບໃຫຍ່ຂະຫຍາຍຕົວຂອງກອງທັບ ຕະຫຼອດໄລຍະ 75 ປີຜ່ານ ທີ່ເປັນຮົ້ວຂອງຊາດ ຈົ່ງມີສູຂະພາບເຂັ້ມແຂງ, ແຂງແຮງ, ເປັນກຳລັງແຮງອັນແຂງແກ່ນ ໃນການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ.

ພ້ອມກັນນີ້, ສະຫາຍ ພົນໂທ ທອງລອຍ ສິລິວົງ ກໍໄດ້ຕາງໜ້າໃຫ້ຄະນະພັກ, ຄະນະນຳກະຊວງປ້ອງກັນປະເທດ ກ່າວສະແດງຄວາມຂອບໃຈ ທີ່ ກຊສ ໄດ້ນໍາເອົາກະຕ່າດອກໄມ້ມາອວຍພອນ; ພ້ອມທັງກ່າວສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ການນຳ ກຊສ ເວົ້າລວມ, ເວົ້າສະເພາະຕໍ່ ສະຫາຍ ນາງ ບຸນຄຳ ວໍລະຈິດ ທີ່ຍາມໃດກໍມີຄວາມເປັນຫ່ວງເປັນໃຍ ຕໍ່ການປະຕິບັດໜ້າຂອງນາຍ ແລະ ພົນທະຫານ.

ໃນໂອກາດອວຍພອນ ແລະ ຢ້ຽມຢາມຄະນະນຳກະຊວງປ້ອງກັນປະເທດ ໃນຄັ້ງນີ້, ສະຫາຍ ນາງ ບຸນຄຳ ວໍລະຈິດ ກໍໄດ້ມອບເງິນສົດມູນຄ່າ 20.000.000 ກີບ ໃຫ້ກັບກະຊວງປ້ອງກັນປະເທດ ເພື່ອນຳໃຊ້ເຂົ້າໃນການເຄື່ອນໄຫວປະຕິບັດວຽກງານຂອງນາຍ ແລະ ພົນທະຫານຕື່ມອີກ.

(ຂ່າວ-ພາບ: ກຊສ)