ງານພົບປະລະຫວ່າງ ອະດີດການນໍາ ແຂວງຫຼວງນໍ້າທາ ແລະ ແຂວງບໍ່ແກ້ວ ໄດ້ມີຂຶ້ນຫວ່າງບໍ່ດົນມານີ້ ທີ່ເມືອງຫຼວງນ້ຳທາ ຊຶ່ງແຂວງບໍ່ແກ້ວ ນຳໂດຍ ທ່ານ ສົມລິດ ສີພາວັນ ອະດີດຮອງເລຂາພັກແຂວງ ອະດີດປະທານສະພາປະຊາຊົນແຂວງບໍ່ແກ້ວ ຊຸດທີ I ພ້ອມດ້ວຍຄະນະ; ຝ່າຍອະດີດການນຳແຂວງຫຼວງນ້ຳທາ ນຳໂດຍ ທ່ານ ໄຊພອນ ຄູນສີລິເຮືອງ ອະດີດຮອງເລຂາພັກແຂວງ ອະດີດປະທານສະພາປະຊາຊົນແຂວງຊຸດທີ Iພ້ອມຄະນະ.

ໂອກາດນີ້, ທັງສອງແຂວງໄດ້ຜັດປ່ຽນກັນລາຍງານປະຫວັດຄວາມເປັນມາຂອງສອງແຂວງມີຄວາມສະນິດຕິດພັນກັນຢ່າງແໜ້ນແຟ້ນ, ໃນໄລຍະທີ່ປະເທດຊາດຂອງພວກເຮົາ ຍັງຕົກເປັນຫົວເມືອງຂຶ້ນຂອງຈັກກະພັດຕ່າງດ້າວຂອບເຂດປົກຄອງຂອງສອງແຂວງແມ່ນເປັນແຂວງຫົວຂອງ ມາເຖິງວັນທີ 6 ພຶດສະພາ 1962 ຈຶ່ງໄດ້ຮັບການປົດປ່ອຍ ແລະ ໄດ້ຕັ້ງຊື່ເປັນແຂວງຫຼວງນໍ້າທາ, ໃນໄລຍະນັ້ນ ສອງແຂວງຍັງເປັນແຂວງດຽວກັນ ພາຍໃຕ້ການນໍາພາຂອງອົງຄະນະພັກແຂວງຫຼວງນໍ້າທາ ແລະ ເປັນແຂວງໜຶ່ງທີ່ກວ້າງຂວາງສົມຄວນ, ມາຮອດວັນທີ 26 ມີນາ 1983 ກົມການເມືອງສູນການພັກຈຶ່ງໄດ້ຕົກລົງ ແບ່ງອອກເປັນ 2 ແຂວງຄື: ແຂວງຫຼວງນໍ້າທາ ແລະ ແຂວງບໍ່ແກ້ວຊຶ່ງແຕ່ລະແຂວງກໍໄດ້ມີການພັດທະນາດ້ານເສດຖະກິດ, ປັບປຸງ ແລະ ຍົກສູງຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂຶ້ນເທື່ອລະກ້າວ.

ໃນພິທີດັ່ງກ່າວ ຍັງໄດ້ມີການມອບຂອງຂວັນທີ່ລະນຶກ, ພ້ອມທັງຮ່ວມພາເຂົ້າສາມັກຄີ ພົບປະໂອ້ລົມຢ້ຽມຢາມຖາມຂ່າວ ທຸກ - ສຸກ ຊຶ່ງກັນ ແລະ ກັນດ້ວຍຄວາມມ່ວນຊື່ນ.

ການພົບປະໃນຄັ້ງນີ້ ເພື່ອເປັນການສ້າງສາຍພົວພັນ ຄວາມສາມັກຄີ ມິດຕະພາບສະໜິດແໜ້ນລະຫວ່າງ ອະດີດການນຳທັງສອງແຂວງ ໃຫ້ໝັ້ນຄົງຂະໜົງແກ່ນຕະຫຼອດໄປ.

ຂ່າວ: ມຸນຕີ