(ໂດຍ: ຕະວິນຍານ)
ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ກ່າວຕໍ່ກອງປະຊຸມອົງການປົກຄອງແຂວງໄຊຍະບູລີເປີດກວ້າງ ຄັ້ງທີ II ປະຈໍາປີ 2023 ກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນ ໂດຍຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດວ່າ:ໃນປີ 2023 ຜ່ານມາ, ແຂວງໄດ້ແຕ່ງຕັ້ງຄະນະຮັບຜິດຊອບແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນຂັ້ນແຂວງ ແລະແຕ່ງຕັ້ງຄະນະຮັບຜິດຊອບປະຕິບັດ 2 ວາລະແຫ່ງຊາດ.
ຜ່ານການຈັດຕັ້ງປະຕິບັດເຫັນວ່າມີຜົນສໍາເລັດດີສົມຄວນ ເປັນຕົ້ນແມ່ນການປະຕິບັດມາດຕະການແກ້ໄຂສະພາບເງິນເຟີ້ ໄດ້ຊຸກຍູ້ໃຫ້ບັນດາຫົວໜ່ວຍວິສາຫະກິດ ທີ່ດໍາເນີນການນໍາເຂົ້າ-ສົ່ງອອກ ໃຫ້ໄດ້ລົງທະບຽນການນໍາເຂົ້າ-ສົ່ງອອກສິນຄ້າ,ສໍາເລັດການກໍານົດປະເພດສິນຄ້າທີ່ບໍ່ຈໍາເປັນຈາກຕ່າງປະເທດ ເຂົ້າມາຈໍາໜ່າຍຢູ່ພາຍໃນແຂວງໄຊຍະບູລີ ຈໍານວນ 137 ລາຍການ.
ສໍາລັບມາດຕະການແກ້ໄຂອັດຕາແລກປ່ຽນ ແຂວງໄດ້ແຕ່ງຕັ້ງຄະນະຮັບຜິດຊອບຄຸ້ມຄອງເງິນຕາຂັ້ນແຂວງ, ຂັ້ນເມືອງ 11 ເມືອງ, ພ້ອມທັງກວດກາຄືນບັນດາຮ້ານແລກປ່ຽນເງິນຕາຢູ່ພາຍໃນແຂວງ ແລະ ສັ່ງປິດຮ້ານແລກປ່ຽນເງິນຕາຈໍານວນໜຶ່ງ; ໄດ້ກໍານົດໂຄງສ້າງລາຄາສິນຄ້າ ໂດຍສະເພາະປະເພດເຂົ້າສານ, ຊີ້ນຄວາຍ, ງົວ, ຊີ້ນໝູ, ໄຂ່ໄກ່ ແລະ ປານິນ; ພ້ອມນີ້ ຍັງໄດ້ອອກມາດຕະການຂອງແຂວງ ກ່ຽວກັບການເພີ່ມທະວີການຄຸ້ມຄອງ ການຊື້-ຂາຍສິນຄ້າ ປະເພດເຂົ້າກິນ, ສັດລ້ຽງໃນທົ່ວແຂວງ ເພື່ອຫຼີກລ່ຽງການຂາດສະບຽງອາຫານຢູ່ພາຍໃນແຂວງ.
ສໍາລັບການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ມາຮອດປັດຈຸບັນ,ມີຜູ້ປະກອບການຍື່ນເຈດຈໍານົງເພື່ອເຂົ້າເຖິງແຫຼ່ງທຶນດັ່ງກ່າວ 36 ຫົວໜ່ວຍ ຈໍານວນ 85 ຕື້ກວ່າກີບ.
ການຈັດຕັ້ງປະຕິບັດ 2 ວາລະແຫ່ງຊາດ: ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການ ເງິນ: ໄດ້ປະຕິບັດ 6 ຄາດໝາຍສູ້ຊົນ ໃນນີ້ ໄດ້ສູ້ຊົນເຮັດໃຫ້ເສດຖະກິດ ຂະຫຍາຍຕົວບັນລຸແລ້ວ 5%, ໄດ້ມີຄວາມພະຍາຍາມແກ້ໄຂໜີ້ສິນໂຄງການລົງທຶນຂອງລັດທີ່ສໍາເລັດ 100% ແຕ່ປີ 2015 ຄືນຫຼັງຈໍານວນ 110 ໂຄງການ ມູນຄ່າ 289 ຕື້ກີບ ໃຫ້ຫຼຸດລົງ ຜ່ານການຈັດຕັ້ງປະຕິບັດຕົວຈິງຮອດ 9 ເດືອນຕົ້ນປີ 2023 ແກ້ໄຂໜີ້ ໄດ້ 166 ຕື້ກີບ ເກີນຄາດໝາຍ 90%.
ສ່ວນການແກ້ໄຂບັນຫາຢາເສບຕິດໃນໄລຍະຜ່ານມາ, ໄດ້ສຸມໃສ່ 6 ໜ້າວຽກຈຸດສຸມຄື: ໄດ້ໂຄສະນາເຜີແຜ່ເຊື່ອມຊຶມກົດໝາຍ, ນິຕິກໍາໃຫ້ພະນັງານ, ທະຫານ, ຕໍາຫຼວດ, ນັກຮຽນ-ນັກສຶກສາ ຕະຫຼອດຮອດປະຊາຊົນໃນທົ່ວແຂວງ ໄດ້ຮັບຮູ້ເຂົ້າໃຈ ແລະ ເຫັນໄດ້ຜົນຮ້າຍຂອງຢາເສບຕິດ, ເຫັນໄດ້ຄວາມຈໍາເປັນຮີບດ່ວນໃນການແກ້ໄຂ ບັນຫາຢາເສບຕິດ ສາມາດມ້າງຄະດີຢາເສບຕິດ ໄດ້ 744 ລາຍ, ກັກຕົວຜູ້ກະທໍາຜິດໄດ້ 856 ຄົນ.
