ພິທີມອບ-ຮັບໂຮງຮຽນມັດທະຍົມສົມບູນ (ມ.ສ) ບ້ານຕິ້ວ ເມືອງລະມາມ ແຂວງເຊກອງ ຊຶ່ງໄດ້ຮັບການກໍ່ສ້າງໂດຍທຶນຊ່ວຍເຫຼືອຈາກລັດຖະບານ ແລະ ປະຊາຊົນຍີ່ປຸ່ນຈັດຂຶ້ນໃນວັນທີ 21 ມັງກອນນີ້ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີທ່ານ ກິກຸຈິ ໄທຈຸ (Mr. Kikuchi Taiju) ຕາງໜ້າສະຖານເອກອັກຄະຣາຊະທູດຍີປຸ່ນປະຈໍາ ສປປ ລາວ, ທ່ານ ວົງເດືອນ ຈັນທະບຸດຊຽງ ເຈົ້າເມືອງລະມາມ, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະ ກິລາແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ພອນໄພ ສີວິໄລ ຫົວໜ້າຫ້ອງການສຶກສາທິການ ແລະ ກິລາເມືອງໄດ້ລາຍງານໃຫ້ຮູ້ວ່າ: ໂຄງການກໍ່ສ້າງອາຄານຮຽນ ມ.ສ ບ້ານຕິ້ວ ເມືອງລະມາມ ແຂວງເຊກອງ ໄດ້ເລີ່ມລົງມືກໍ່ສ້າງໃນເດືອນພະຈິກ 2022 ໂດຍແມ່ນບໍລິສັດເອັດແອັດວານ ຈຳກັດຜູ້ດຽວເປັນຜູ້ຮັບເໝົາກໍ່ສ້າງ. ມາຮອດເດືອນພຶດສະພາ 2023 ແມ່ນສໍາເລັດຕາມແຜນການຊຶ່ງເປັນອາຄານຊັ້ນດຽວຂະໜາດ 9x28 ແມັດ ປະກອບມີ 3 ຫ້ອງຮຽນ 1 ຫ້ອງການ ແລະ ເຄື່ອງເຟີນີເຈີຄົບຊຸດ. ພ້ອມນີ້, ຍັງມີຫ້ອງນໍ້າ 1 ຫຼັງ 2 ຫ້ອງ ລວມມູນຄ່າທັງໝົດປະມານ 1,3 ຕື້ກີບ.
ທ່ານ ກິກຸຈິ ໄທຈຸ ກ່າວວ່າ: ການຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນໃນຄັ້ງນີ້ມີເປົ້າໝາຍທີ່ຈະຂະຫຍາຍອາຄານ, ສະໜອງວັດຖຸອຸປະກອນການຮຽນ-ການສອນຊຶ່ງໃນເມື່ອກ່ອນໂຮງຮຽນດັ່ງກ່າວມີອາຄານຮຽນ 2 ຫຼັງ ແລະ ອຸປະກອນຕ່າງໆມີຄວາມເກົ່າແກ່ຊຸດໂຊມ ເຮັດໃຫ້ການຮຽນ-ການສອນພົບຄວາມຫຍຸ້ງຍາກ. ສະນັ້ນ, ຂ້າພະເຈົ້າເຊື່ອວ່າການຊ່ວຍເຫຼືອຄັ້ງນີ້, ຈະປະກອບສ່ວນສໍາຄັນເຂົ້າໃນປັບປຸງສະພາບແວດລ້ອມການສຶກສາໂດຍສະເພາະການຮຽນ-ການສອນຢູ່ໂຮງຮຽນແຫ່ງນີ້ໃຫ້ດີຂຶ້ນ.
ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ໂດຍສະເພາະທ່ານເອກອັກຄະຣາຊະທູດຍີປຸ່ນປະຈຳລາວທີ່ໃຫ້ການຊ່ວຍເຫຼືອ, ສະໜັບສະໜູນທຶນຮອນເຂົ້າໃນການກໍ່ສ້າງໂຮງຮຽນດັ່ງກ່າວ ແລະ ບັນດາໂຄງການອື່ນໆ ຊຶ່ງເປັນການປະກອບສ່ວນສໍາຄັນຕໍ່ການພັດທະນາຂະແໜງການສຶກສາ ກໍຄືການພັດທະນາຊັບພະຍາກອນມະນຸດ ແລະ ການພັດທະນາເສດຖະກິດ-ສັງຄົມຂອງແຂວງເຊກອງໃຫ້ດີຂຶ້ນ. ພ້ອມນີ້, ທ່ານເຈົ້າແຂວງຍັງໄດ້ຮຽກຮ້ອງໃຫ້ຂະແໜງສຶກສາທິການ ແລະ ກິລາແຂວງ-ເມືອງ, ຄະນະພັກ-ອົງການປົກຄອງບ້ານ ແລະ ພະນັກງານ-ຄູອາຈານ ຈົ່ງພ້ອມກັນເອົາໃຈໃສ່ປົກປັກຮັກສາ, ຄຸ້ມຄອງ-ນໍາໃຊ້ໂຮງຮຽນຫຼັງນີ້ໃຫ້ຖຶກເປົ້າໝາຍ, ມີຄວາມຍືນຍົງ ແລະ ຍາວນານ.
ຂ່າວ-ພາບ: ສັນຍາ
ທ່ານນາງ ພອນໄພ ສີວິໄລ ຫົວໜ້າຫ້ອງການສຶກສາທິການ ແລະ ກິລາເມືອງໄດ້ລາຍງານໃຫ້ຮູ້ວ່າ: ໂຄງການກໍ່ສ້າງອາຄານຮຽນ ມ.ສ ບ້ານຕິ້ວ ເມືອງລະມາມ ແຂວງເຊກອງ ໄດ້ເລີ່ມລົງມືກໍ່ສ້າງໃນເດືອນພະຈິກ 2022 ໂດຍແມ່ນບໍລິສັດເອັດແອັດວານ ຈຳກັດຜູ້ດຽວເປັນຜູ້ຮັບເໝົາກໍ່ສ້າງ. ມາຮອດເດືອນພຶດສະພາ 2023 ແມ່ນສໍາເລັດຕາມແຜນການຊຶ່ງເປັນອາຄານຊັ້ນດຽວຂະໜາດ 9x28 ແມັດ ປະກອບມີ 3 ຫ້ອງຮຽນ 1 ຫ້ອງການ ແລະ ເຄື່ອງເຟີນີເຈີຄົບຊຸດ. ພ້ອມນີ້, ຍັງມີຫ້ອງນໍ້າ 1 ຫຼັງ 2 ຫ້ອງ ລວມມູນຄ່າທັງໝົດປະມານ 1,3 ຕື້ກີບ.
ທ່ານ ກິກຸຈິ ໄທຈຸ ກ່າວວ່າ: ການຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນໃນຄັ້ງນີ້ມີເປົ້າໝາຍທີ່ຈະຂະຫຍາຍອາຄານ, ສະໜອງວັດຖຸອຸປະກອນການຮຽນ-ການສອນຊຶ່ງໃນເມື່ອກ່ອນໂຮງຮຽນດັ່ງກ່າວມີອາຄານຮຽນ 2 ຫຼັງ ແລະ ອຸປະກອນຕ່າງໆມີຄວາມເກົ່າແກ່ຊຸດໂຊມ ເຮັດໃຫ້ການຮຽນ-ການສອນພົບຄວາມຫຍຸ້ງຍາກ. ສະນັ້ນ, ຂ້າພະເຈົ້າເຊື່ອວ່າການຊ່ວຍເຫຼືອຄັ້ງນີ້, ຈະປະກອບສ່ວນສໍາຄັນເຂົ້າໃນປັບປຸງສະພາບແວດລ້ອມການສຶກສາໂດຍສະເພາະການຮຽນ-ການສອນຢູ່ໂຮງຮຽນແຫ່ງນີ້ໃຫ້ດີຂຶ້ນ.
ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ໂດຍສະເພາະທ່ານເອກອັກຄະຣາຊະທູດຍີປຸ່ນປະຈຳລາວທີ່ໃຫ້ການຊ່ວຍເຫຼືອ, ສະໜັບສະໜູນທຶນຮອນເຂົ້າໃນການກໍ່ສ້າງໂຮງຮຽນດັ່ງກ່າວ ແລະ ບັນດາໂຄງການອື່ນໆ ຊຶ່ງເປັນການປະກອບສ່ວນສໍາຄັນຕໍ່ການພັດທະນາຂະແໜງການສຶກສາ ກໍຄືການພັດທະນາຊັບພະຍາກອນມະນຸດ ແລະ ການພັດທະນາເສດຖະກິດ-ສັງຄົມຂອງແຂວງເຊກອງໃຫ້ດີຂຶ້ນ. ພ້ອມນີ້, ທ່ານເຈົ້າແຂວງຍັງໄດ້ຮຽກຮ້ອງໃຫ້ຂະແໜງສຶກສາທິການ ແລະ ກິລາແຂວງ-ເມືອງ, ຄະນະພັກ-ອົງການປົກຄອງບ້ານ ແລະ ພະນັກງານ-ຄູອາຈານ ຈົ່ງພ້ອມກັນເອົາໃຈໃສ່ປົກປັກຮັກສາ, ຄຸ້ມຄອງ-ນໍາໃຊ້ໂຮງຮຽນຫຼັງນີ້ໃຫ້ຖຶກເປົ້າໝາຍ, ມີຄວາມຍືນຍົງ ແລະ ຍາວນານ.
ຂ່າວ-ພາບ: ສັນຍາ
