ກະຊວງ ພະລັງງານ ແລະ ບໍ່ແຮ່ (ພບ) ໄດ້ຈັດປາຖະກະຖາວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ແລະ ວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ ຂຶ້ນໃນວັນທີ 2 ກຸມພາ ນີ້ ທີ່ຫ້ອງປະຊຸມລັດວິສາຫະກິດໄຟຟ້າລາວ ໂດຍການເປັນປະທານ ແລະ ປາຖະກະຖາ ຂອງ ທ່ານ ໂພໄຊ ໄຊຍະສອນ ກຳມະການສູນກາງພັກ ລັດຖະມົນຕີກະຊວງພະລັງງານ ແລະ ບໍ່ແຮ່, ມີຄະນະປະຈຳພັກ, ຄະນະພັກ, ຄະນະໜ່ວຍພັກ, ຄະນະກົມ, ສະຖາບັນ, ລັດວິສາຫະກິດ ແລະ ພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ.
ໃນພິທີດັ່ງກ່າວ, ທ່ານ ໂພໄຊ ໄຊຍະສອນ ໄດ້ປາຖະກະຖາໂດຍໄດ້ຍົກໃຫ້ເຫັນມູນເຊື້ອປະຫວັດການເຄື່ອນໄຫວຂອງປະທານ ຄຳໄຕ ສີພັນດອນ ຕັ້ງແຕ່ຊີວິດເຍົາໄວ ຈົນເຖິງການເຂົ້າຮ່ວມຂະບວນເຄື່ອນໄຫວປະຕິວັດ ເພື່ອຕໍ່ສູ້ຕ້ານຈັກກະພັດພວກລ່າເມືອງຂຶ້ນແບບເກົ່າ ແລະ ໃໝ່ ແລະ ໄດ້ຍົກໃຫ້ເຫັນເຖິງຄວາມປີຊາສາມາດ, ຄວາມສະຫຼຽວສະຫຼາດຂອງເພິ່ນ ໃນການຊີ້ນໍາບັນຊາກອງທັບປົດປ່ອຍປະຊາຊົນລາວໃນການຕໍ່ສູ້ກູ້ຊາດທີ່ບໍ່ຍອມຈຳນົນຈົນສາມາດຍາດໄດ້ໄຊຊະນະ ທີ່ສົມບູນ ແລະ ສະຖາປະນາ ສາທາລະ ນະລັດ ປະຊາທິປະໄຕປະຊາຊົນລາວ ຂຶ້ນໃນວັນທີ 2 ທັນວາ 1975 ຊຶ່ງຜົນງານອັນດີເລີດ, ຄຸນງາມ ຄວາມດີອັນປະເສີດ ຕະຫຼອດຮອດແບບແຜນການດຳລົງຊີວິດ, ຄວາມດຸໝັ່ນພາກພຽນ, ການອຸທິດຕົນເພື່ອຊາດ, ເພື່ອປະຊາຊົນ ຕະຫຼອດ ໄລຍະການຕໍ່ສູ້ກູ້ຊາດ ກໍຄືໃນໄລຍະພາລະກິດປົກປັກຮັກສາ ແລະ ສ້າງສາພັດປະເທດຊາດ ແລະ ໄດ້ຫວນຄືນວັນສ້າງ ຕັ້ງກອງທັບປະຊາຊົນລາວ ຄົບຮອບ 75 ປີ ຊຶ່ງທ່ານໄດ້ຍົກ ໃຫ້ເຫັນເຖິງປະຫວັດການກຳເນີດຂອງກອງທັບປະຊາຊົນລາວ, ເງື່ອນໄຂ, ສະພາບແວດລ້ອມກ່ອນການສ້າງຕັ້ງ, ຄວາມຈຳເປັນພາວະວິໄສ, ຄວາມໝາຍຄວາມສຳຄັນ ຂອງການສ້າງຕັ້ງກອງທັບປະຊາຊົນລາວ ຜົນງານໄຊຊະນະ,ການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວແຕ່ລະໄລຍະ, ທາດແທ້ ແລະ ມູນເຊື້ອອັນສະຫງ່າອົງອາດກ້າຫານ ຂອງກອງທັບປະຊາຊົນລາວ, ມູນເຊື້ອຄວາມຈົງຮັກພັກດີຕໍ່ພັກ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ, ມູນເຊື້ອຕໍ່ສູ້ອັນພິລະອາດຫານ, ກ້າແກ່ນ, ໜຽວແໜ້ນ ແລະ ມີໄຫວພິບ; ນໍ້າໃຈດຸໝັ່ນຂະຫຍັນພຽນ, ຢຶດໝັ້ນການພົວພັນ, ສາມັກຄີແບບກາຍອິນຊີອັນແໜ້ນແຟ້ນກັບປະຊາ ຊົນບັນດາເຜົ່າ, ການພົວພັນຮ່ວມມືພາຍໃນ ແລະ ສາກົນຢ່າງກົມກຽວບົນພື້ນຖານຕ່າງຝ່າຍຕ່າງມີຜົນປະໂຫຍດ ແລະ ການສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງກອງທັບປະຊາຊົນລາວ. 
ການຈັດຕັ້ງປາຖະກະຖາຄັ້ງນີ້ ເພື່ອໃຫ້ສະມາຊິກພັກ, ພະນັກງານທັງໝົດ ຂອງກະຊວງ ພບ ຈົ່ງພ້ອມກັນຕັ້ງໜ້າສຶກສາ ຄົ້ນຄວ້າຮໍ່າຮຽນເອົາຄຸນສົມ ບັດສິນທຳປະຕິວັດ, ຄວາມຈົງຮັກພັກດີ, ຄວາມບໍລິສຸດຜຸດຜ່ອງ, ຄວາມມານະອົດທົນ, ອຸ່ນອ່ຽນທຸ່ນທ່ຽງ, ມີໄຫວພິບໃນການຈັດຕັ້ງປະຕິບັດບັນດາໜ້າທີ່ວຽກງານທີ່ຕົນຮັບຜິດຊອບເພື່ອອຸທິດຕົນໃຫ້ພາລະກິດປະຕິວັດ, ເພື່ອຊາດ ເພື່ອປະຊາຊົນຂອງ ປະທານ ຄຳໄຕ ສີພັນດອນ ຜູ້ນຳທີ່ແສນເຄົາລົບຮັກເພື່ອມາໝູນໃຊ້ເຂົ້າໃນການປະຕິບັດໜ້າທີ່ວຽກງານໃນປັດຈຸບັນ ແລະ ໃຫ້ພະນັກງານ ສະມາຊິກພັກຮັບຮູ້, ເຂົ້າໃຈຄວາມໝາຍ ແລະ ຄວາມສໍາຄັນຂອງວັນສ້າງຕັ້ງກອງທັບປະຊາ ຊົນລາວ ທີ່ສະແດງໃຫ້ເຫັນຖິງທາດແທ້ມູນເຊື້ອປະຕິວັດ ແລະ ການເຕີບໃຫຍ່ເຂັ້ມແຂງຢ່າງບໍ່ຍຸດຢັ້ງ, ຜົນງານອັນໃຫຍ່ຫຼວງ, ມູນເຊື້ອການຕໍ່ສູ້ຢ່າງພິລະອາດຫານຂອງກອງທັບປະຊາຊົນລາວ ກໍຄືຜົນງານອັນໃຫຍ່ຫຼວງຂອງວິລະຊົນລາວ ທີ່ຍາດມາໄດ້ ຕະຫຼອດໄລຍະ 75 ປີ ຜ່ານມາ. (ຂ່າວ-ພາບ: ສຳນານ)