ວັນທີ 5 ກຸມພາ ຜ່ານມາ ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີແຫ່ງສປປລາວ ໄດ້ເຄື່ອນໄຫວຢ້ຽມຢາມໂຄງການພັດທະນາ ແລະ ປັບປຸງແກ້ໄຂຄວາມທຸກຍາກຂອງປະຊາຊົນບ້ານກະບູດ-ຊຽງແຫວນ ເມືອງທ່າແຂກ ແຂວງຄໍາມ່ວນ ທີ່ໄດ້ຮັບການຊ່ວຍເຫຼືອຈາກບໍລິສັດຊິໂນອາກຣີໂປຕາສຈໍາກັດ ໂດຍການນໍາພາທາງຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ມີທ່ານ ໂຖງຢົງເຫີງ ຜູ້ອໍານວຍບໍລິສັດຊີໂນ-ອາກຣີໂປຕາສ ຈໍາກັດ ພ້ອມດ້ວຍຄະນະ ແລະ ຂະແໜງການກ່ຽວຂ້ອງໃຫ້ກຽດຕ້ອນຮັບ.  
ໃນໂອກາດນີ້, ທ່ານ ອະດີດນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍມາຍັງການນໍາຂອງແຂວງ ແລະ ບໍລິສັດທີ່ໄດ້ກໍານົດແຜນດໍາເນີນໂຄງການ ແລະ ມຸ່ງໝັ້ນເພື່ອຊ່ວຍເຫຼືອພັດທະນາ ແລະ ປັບປຸງແກ້ໄຂຄວາມທຸກຍາກຂອງປະຊາຊົນບ້ານ ຊຽງແຫວນໃຫ້ມີຊີວິດດີຂຶ້ນ ແລະ ກາຍເປັນບ້ານພັດທະນາຕົວແບບໃນຕໍ່ໜ້າ, ພ້ອມນີ້ ຍັງໄດ້ມີຄໍາເຫັນໃຫ້ທິດຊີ້ນໍາມາຍັງຄະນະພັກ-ອໍານາດການປົກຄອງຕະຫຼອດຮອດອົງການຈັດຕັ້ງມະຫາຊົນຂອງບ້ານດັ່ງກ່າວຈົ່ງໄດ້ເປັນຫຼັກແຫຼ່ງໃນການນໍາພາສ້າງຄວາມຮັບຮູ້ເຂົ້າໃຈໃຫ້ແກ່ປະຊາຊົນເພື່ອຮຽນຮູ້ທຸກບາດກ້າວ, ທຸກໄລຍະທຸກການເຄື່ອນໄຫວຂອງບໍລິສັດທີ່ນໍາເອົາບົດຮຽນມາຝຶກ, ມາແອບ ຍາດແຍ່ງເອົາບົດຮຽນແບບແຜນດໍາລົງຊີວິດ, ແບບແຜນທໍາການທໍາມາຫາກິນ, ບົດຮຽນຈາກການປູກ - ການລ້ຽງແລະກະຕືລືລົ້ນໃນການທໍາມາຫາກິນເພື່ອປັບປຸງຊີວິດການເປັນຢູ່ຂອງຕົນເອງ ຫຼື ຈັດກຸ່ມການຜະລິດໃຫ້ປະຊາຊົນໄດ້ຊ່ວຍເຫຼືອເຊິ່ງກັນ ແລະ ກັນຕາມເງື່ອນໄຂທ່າແຮງ, ເຮັດໃຫ້ມີຫຼາຍແຫຼ່ງລາຍຮັບ, ສົ່ງເສີມລູກຫຼານໃຫ້ຮຽນຮູ້ບົດຮຽນອັນໃໝ່ໃນການທໍາມາຫາກິນໄປພ້ອມກັບການອະນຸລັກຮັກສາຮີດຄອງວັດທະນະທໍາອັນດີງາມຂອງຊາດຂອງເຜົ່າ, ໂດຍສະເພາະແມ່ນວິຖີຊີວິດ ແລະ ວັດທະນະທໍາຊົນເຜົ່າຂອງບ້ານ ໄປຄຽງຄູ່ກັບການເອົາໃຈໃສ່ໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຈໍາກັດບັນຫາປະກົດການຫຍໍ້ທໍ້ຕ່າງໆໃນສັງຄົມ. 
(ຂ່າວ : ມະນີວັນ)