ພິທີໄຂຊຸດຝືກອົບຮົມການທະຫານ-ການເມືອງ ໃຫ້ກໍາລັງກອງຫຼອນ ກອງຮ້ອຍທີ 6 ບໍລິເວນດອນເມນ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນວັນທີ 7 ກຸມພາ ຜ່ານມາ ທີ່ຫໍປະຊຸມບ້ານດອນເມນ. ໂດຍການເຂົ້າຮ່ວມຂອງສະຫາຍ ອໍາຄາ ລັດສະໝີ ກໍາມະການພັກແຂວງ ເລຂາພັກເມືອງ ເຈົ້າເມືອງແກ່ນ ທ້າວ ປະທານປ້ອງກັນຊາດ-ປ້ອງກັນຄວາມສະຫງົບເມືອງ, ສະຫາຍ ບຸນຍູ້ ອິນທະວອນ ເລຂາຄະນະ ພັກຮາກຖານ, ຫົວໜ້າການເມືອງກອງບັນຊາການທະຫານເມືອງ, ມີພາກສ່ວນກ່ຽວຂ້ອງ ເຂົ້າຮ່ວມ.
ໃນພິທີ ໄດ້ຜ່ານແຜນອົບຮົມຂອງຫ້ອງການເສນາທິການແຂວງ, ຂໍ້ຕົກລົງຂອງທ່ານເຈົ້າເມືອງ ວ່າດ້ວຍອະນຸມັດການຝຶກອົບຮົມ ແລະ ການແຕ່ງຕັ້ງອະນຸກໍາມະການຮັບຜິດຊອບຊີ້ນໍາການອົບຮົມ, ຜ່ານລະບຽບຊົ່ວຄາວຂອງນັກສໍາມະນາກອນ, ຜ່ານແຜນຮັບປະກັນການສູ້ຮົບປ້ອງກັນບໍລິເວນ. ຈາກນັ້ນ, ສະຫາຍ ບຸນຍູ້ ອິນທະວອນ ເລຂາຄະນະພັກຮາກຖານ ຫົວໜ້າການເມືອງກອງບັນຊາການທະຫານເມືອງ ໄດ້ມີຄໍາເຫັນຕໍ່ການຝຶກອົບຮົມ.
ຊຸດຝືກອົບຮົມຄັ້ງນີ້, ຈະໄດ້ດໍາເນີນເປັນເວລາ 7 ວັນຈຶ່ງຈະສໍາເລັດ.
(ຂ່າວ: ແກ່ນທ້າວ).