ໃນລະຫວ່າງວັນທີ 5 ຫາ 7 ມັງກອນ ນີ້, ທ່ານ ຄໍາບາລີ ຄໍາຊຸມພູ ຮອງຫົວໜ້າອົງການກາແດງ ແຂວງໄຊຍະບູລີ ພ້ອມດ້ວຍພາກສ່ວນທີ່ກ່ຽວຂ້ອງຂອງເມືອງລົງມາໂຄສະນາເຄື່ອນໄຫວຮັບບໍລິຈາກເລືອດ ຢູ່ທີ່ເມືອງຄອບ ແຂວງໄຊຍະບູລີ.
ການລົງມາເຄື່ອນໄຫວຄັ້ງນີ້, ແມ່ນໄດ້ລົງຕາມໂຮງຮຽນຕ່າງໆ ແລະ ບັນດາກົມກອງຢູ່ພາຍໃນເມືອງ ເປັນຕົ້ນແມ່ນ ໂຮງຮຽນມັດທະຍົມສຶກສາສົມບູນເມືອງຄອບ, ໂຮງຮຽນມັດທະຍົມສຶກສາສົມບູນມ່ວງດອນມູນ, ໂຮງຮຽນມັດທະຍົມສຶກສາສົມບູນປາງໄຮ, ກອງບັນຊາການທະຫານຊາຍແດນ 150 ແລະ ກອງບັນຊາການທະຫານເມືອງ ຊຶ່ງໄດ້ຮັບເລືອດຕົວຈິງທັງໝົດ 44 ຖົງ.
(ພາບ-ຂ່າວ: ພົມມະນີ ອິນສະຫວັນ)