ໃນຕອນເຊົ້າຂອງວັນທີ 4 ຕຸລາ ນີ້, ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ພ້ອມດ້ວຍຄະນະຜູ້ແທນຂັ້ນສູງຂອງສອງປະເທດ ໄດ້ເດີນທາງດ້ວຍລົດໄຟຄວາມໄວສູງຖ້ຽວພິເສດຈາກ ສະຖານີລົດໄຟ ນະຄອນຫຼວງວຽງຈັນ ຫາ ສະຖານີລົດໄຟ ວັງວຽງ ແຂວງວຽງຈັນ ເພື່ອຊົມທີວທັດທໍາມະຊາດ, ການຜະລິດກະສິກໍາ ແລະ ວິຖີຊີວິດການເປັນຢູ່ຂອງປະຊາຊົນລາວ ຕາມເສັ້ນທາງລົດໄຟ ລາວ-ຈີນ.
    ໃນເວລາເດີນທາງເຖິງ ສະຖານີລົດໄຟ ວັງວຽງ, ການນໍາຂັ້ນສູງຂອງລາວ ແລະ ບຣູໄນ ພ້ອມດ້ວຍຄະນະ ໄດ້ຖືກຕ້ອນຮັບໂດຍ ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ພ້ອມດ້ວຍຄະນະນໍາຂອງແຂວງຈໍານວນໜຶ່ງ. ຈາກນັ້ນ, ຄະນະທັງໝົດ ກໍໄດ້ເດີນທາງໄປຍັງ ໂຮງແຮມເອັສບູຕິກ ແລະ ໄດ້ຊົມທີວທັດທໍາມະຊາດ ແລະ ທີວທັດຕົວເມືອງວັງວຽງ ພ້ອມທັງໄດ້ຖ່າຍຮູບຮ່ວມກັນ ເພື່ອເປັນທີ່ລະນຶກຢູ່ສະຖານທີ່ດັ່ງກ່າວ. ພ້ອມນີ້, ກໍໄດ້ຢ້ຽມຊົມບັນດາຮ້ານວາງສະແດງຜະລິດຕະພັນສິນຄ້າກະສິກໍາ ແລະ ຫັດຖະກໍາຂອງລາວ ປະກອບມີ: ຜະລິດຕະພັນເຂົ້າຈ້າວ, ເຂົ້າໜຽວ, ກາເຟ, ຊາ, ຜ້າໄໝລາວ, ສິ້ນໄໝລາວ, ປັກດິ້ງ, ຊານໍ້າກ້ຽງ, ຜະລິດຕະພັນເຈ້ຍສາ, ເຄື່ອງແກະສະຫຼັກລາຍລາວ ແລະ ອື່ນໆ.
    ຫຼັງຈາກນັ້ນ, ຜູ້ນໍາຂອງລາວ ແລະ ບຣູໄນ ພ້ອມດ້ວຍຄະນະ ກໍໄດ້ເດີນທາງກັບຄືນນະຄອນຫຼວງວຽງຈັນ ດ້ວຍລົດໄຟຄວາມໄວສູງຖ້ຽວພິເສດຈາກ ສະຖານີລົດໄຟວັງວຽງ ຫາ ສະຖານີລົດໄຟ ນະຄອນຫຼວງວຽງຈັນ. ໃນຕອນບ່າຍຂອງວັນດຽວກັນ, ຄະນະຜູ້ແທນຂັ້ນສູງຂອງບຣູໄນ ນໍາໂດຍ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ກໍໄດ້ເດີນທາງກັບຄືນປະເທດ ດ້ວຍຖ້ຽວບິນພິເສດ ຊຶ່ງອອກສົ່ງທີ່ສະໜາມບິນສາກົນວັດໄຕ ໂດຍ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ, ທັງເປັນລັດຖະມົນຕີກຽດຕິຍົດ ແລະ ຄະນະ.
ຂ່າວ:ກະຊວງການຕ່າງປະເທດ,ພາບ:ໂອເລ້