ກອງປະຊຸມປະເມີນການຈັດຕັ້ງປະຕິບັດຂໍ້ຕົກລົງ ຂອງທ່ານເຈົ້າແຂວງເຊກອງ ວ່າດ້ວຍກອງທຶນຄຸ້ມຄອງໄພພິບັດ ແລະ ສັງຄົມ-ສົງເຄາະຂັ້ນແຂວງ ຈັດຂຶ້ນໃນວັນທີ 8 ກຸມພາ ຜ່ານມາ ທີ່ສະໂມສອນສະພາປະຊາຊົນແຂວງ, ພາຍໃຕ້ການເປັນປະທານຂອງທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ມີສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍກອງທຶນຄຸ້ມຄອງໄພພິບັດ ແລະ ສັງຄົມ-ສົງເຄາະຂັ້ນແຂວງຈາກທ່ານ ແກດ ດາລາແພງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ; ຈາກນັ້ນ, ຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນໃສ່ເນື້ອໃນບົດລາຍງານດັ່ງກ່າວ ໃຫ້ອຸດົມສົມບູນ.
ໃນໂອກາດນີ້, ທ່ານ ຄໍາສອນ ກອນເຍີ ໄດ້ມີຄໍາເຫັນວ່າ: ການຈັດກອງປະຊຸມຄັ້ງນີ້ ເພື່ອເປັນການຕິດຕາມກວດກາ ແລະ ເກັບກໍາຂໍ້ມູນ, ຟັງຄໍາຄິດເຫັນຂໍ້ສະເໜີຕ່າງໆຕໍ່ບັນຫາທີ່ພົ້ນເດັ່ນ, ພ້ອມທັງ ເປັນການສະຫຼຸບຕີລາຄາດ້ານດີ, ຂໍ້ຄົງຄ້າງ, ຖອດຖອນບົດຮຽນກ່ຽວກັບການຈັດຕັ້ງປະຕິບັດຂໍ້ຕົກລົງ ວ່າດ້ວຍກອງທຶນຄຸ້ມຄອງໄພພິບັດດັ່ງກ່າວ ເພື່ອເປັນຂໍ້ມູນນໍາໄປຄົ້ນຄວ້າ, ປຶກສາຫາລື ກັບຂະແໜງກ່ຽວຂ້ອງ ແລະ ຊອກຫາວິທີແກ້ໄຂໃຫ້ສອດຄ່ອງກັບສະພາບຕົວຈິງ ເພື່ອສືບຕໍ່ສ້າງຄວາມເຂັ້ມແຂງໃຫ້ແກ່ວຽກງານຄຸ້ມຄອງໄພພິບັດ.
(ຂ່າວ: ແຂວງເຊກອງ)