ວັນທີ 9 ກຸມພາ 2024 ທີ່ເຮືອນຮັບແຂກເລກ 1 ແຂວງຄໍາມ່ວນ ໄດ້ຈັດກອງປະຊຸມສະຫຼູບວຽກງານຈັດຕັ້ງກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ ປະຈໍາປີ 2023 ແລະ ທິດທາງແຜນການປີ 2024, ໂດຍການເປັນປະທານຂອງສະຫາຍ ວົງເພັດ ຈິດປັນຍາ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ ວຽກພັກ-ພະນັກງານ, ມີບັນດາຄະນະປະຈໍາພັກແຂວງ, ກໍາມະການພັກແຂວງ, ຄະນະພັກຮາກຖານ ແລະ ຂະແໜງການກ່ຽວຂ້ອງເຂົ້າຮ່ວມ.
    ສະຫາຍ ສົມໃຈ ພານີຈັນ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງໄດ້ຜ່ານຮ່າງບົດສະຫຼູບຕີລາຄາການຈັດຕັ້ງປະຕິບັດວຽກງານດັ່ງກ່າວໂດຍໄດ້ຍົກໃຫ້ເຫັນຜົນສຳເລັດໃນຫຼາຍດ້ານ ເປັນຕົ້ນ: ວຽກງານກໍ່ສ້າງພັກ, ວຽກພະນັກງານໃນຜ່ານມາ ຄະນະນພັກ, ຄະນະຈັດຕັ້ງທຸກຂັ້ນໄດ້ເອົາໃຈໃສ່ການປັບປຸງການຈັດຕັ້ງຂອງພັກຕິດພັນກັບການປັບປຸງກົງຈັກລັດໃຫ້ມີຄວາມສອດຄ່ອງ, ເຄື່ອນໄຫວມີປະສິດທິພາບ ແລະ ປະສິດທິຜົນ, ເອົາໃຈໃສ່ຊຸກຍູ້, ຕິດຕາມບັນດາໜ່ວຍພັກ, ໃນປີ 2023 ສໍາເລັດການປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈໍານວນ 1.115 ໜ່ວຍ, ກໍາລັງກະກຽມປະເມີນ 85 ໜ່ວຍ. ໄດ້ຂະຫຍາຍມະຫາຊົນຜູ້ກ້າວໜ້າເຂົ້າເປັນສະມາຊິກພັກສໍາຮອງ 923 ສະຫາຍ, ຍິງ 359 ສະຫາຍ ແລະ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ 903 ສະຫາຍ ຍິງ 321 ສະຫາຍ. ປະຈຸບັນທົ່ວແຂວງ ມີ 10 ອົງຄະນະພັກເມືອງ, ມີ 2 ຄະນະພັກ ປກຊ-ປກສ, ມີການຈັດຕັ້ງຮາກຖານພັກທັງໝົດ 1.302 ຮາກຖານ. ຄຽງຄູ່ກັບຜົນສໍາເລັດດັ່ງກ່າວຍັງໄດ້ຍົກໃຫ້ເຫັນດ້ານອ່ອນຂໍ້ຄົງຄ້າງລວມເຖິງວຽກງານຈຸດສຸມທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. 
ໂອກາດນີ້ ສະຫາຍ ຮອງເລຂາພັກແຂວງ ໄດ້ຮຽກຮ້ອງມາຍັງ ຄະນະພັກ-ຄະນະນໍາແຕ່ລະຂັ້ນ ຫຼອດເຖິງບັນດາຜູ້ເຂົ້າຮ່ວມ ເອົາໃຈໃສ່ໃນການຄົ້ນຄວ້າ, ປະກອບຄໍາເຫັນຢ່າງມີຈຸດສຸມ ກົງໄປກົງມາ ແລະ ແທດເໝາະ ກັບຮ່າງບົດສະຫຼູບດັ່ງກ່າວໂດຍສະເພາະດ້ານເນື້ອໃນ, ຕົວເລກຕ່າງໆ ໃຫ້ຕີລາຄາຢ່າງພາວະວິໃສ ຕໍ່ບັນດາສາເຫດ ທີ່ພາໃຫ້ມີຈຸດດີ, ຈຸດອ່ອນ ແລະ ບັນຫາຂໍ້ຄົງຄ້າງຕ່າງໆ ຢ່າງລະອຽດເລິກເຊິ່ງ ເພື່ອຈະໄດ້ພ້ອມກັນຄົ້ນຄວ້າ ແລະ ປັບປຸງ ເຮັດໃຫ້ເນື້ອໃນບົດສະຫຼຸບ ແລະ ພາກທິດທາງແຜນການ ມີຄວາມສົມບູນ ແລະ ຮັບປະກັນຄຸນນະພາບບົນພື້ນຖານຄວາມຖືກຕ້ອງສອດຄ່ອງຕາມລະບຽບຫຼັກການ ເພື່ອຈະໄດ້ນໍາໄປຈັດຕັ້ງປະຕິບັດໃຫ້ມີປະສິດທິຜົນ.
(ຂ່າວ: ມະນີວັນ)