ພິທີເປີດການນຳໃຊ້ສະໂມສອນດອກປີກໄກ່ ເອພີ (AP badminton Club) ໄດ້ຈັດຂຶ້ນ ໃນຕອນແລງວັນທີ 9 ກຸມພາ ຜ່ານມາ ທີ່ບ້ານດອນກອຍ ເມືອງສີສັດຕະນາກ ນະຄອນຫຼວງວຽງຈັນ ໂດຍມີທ່ານ ວຽງສະຫວັນ ແສງຈັນ ຮອງປະທານສະຫະພັນດອກປີກໄກ່ແຫ່ງຊາດລາວ, ທ່ານ ດອນນີ ສີສະໝຸດ ເຈົ້າຂອງສະໂມສອນດອກປີກໄກ່ ເອພີ ແລະ ທ່ານ ພັນທະວຸດ ສີສົມເດດ ຜູ້ບໍລິຫານ ສະໂມສອນ ດອກປີກໄກ່ ເອພີ ທັງເປັນຄູຝຶກທີມຊາດລາວ ຊຸດໃຫຍ່ ແລະ ຮຸ່ນເຍົາວະຊົນ ພ້ອມດ້ວຍບັນດາແຂກຖືກເຊີນ ແລະ ນັກກິລາດອກປີກໄກ່ລະດັບຕົ້ນໆຂອງລາວ ກໍຄືລະດັບທີມຊາດລາວເຂົ້າຮ່ວມຢ່າງຫຼວງຫຼາຍ.

ໃນພິທີ, ທ່ານ ພັນທະວຸດ ສີສົມເດດ ໃຫ້ຮູ້ວ່າ: ສະໂມສອນແຫ່ງນີ້ ສ້າງຕັ້ງຂຶ້ນມາ ນອກຈາກຈະເປີດຮັບໃຊ້ສັງຄົມລາວແລ້ວ ສະຖານທີ່ດັ່ງກ່າວກໍຍັງຈະເນັ້ນສ້າງນັກກິລາເຍົາວະຊົນລາວ ກໍຄື ນະຄອນຫຼວງວງຽງຈັນ ເພື່ອກ້າວສູ່ການເປັນນັກກິລາດອກປີກໄກ່ທີມຊາດ ເວົ້າສະເພາະແມ່ນນັກກິລາອາຊີບໃນອະນາຄົດ ໂດຍສະໂມສອນພວກເຮົາຈະເລີ່ມເປີດຮັບສະໝັກນັກກິລາຕັ້ງແຕ່ຮຸ່ນອານຸຊົນ ອາຍຸ 5 ປີຂຶ້ນໄປ ຈົນເຖິງຮຸ່ນໄວໜຸ່ມ ຫາກພໍ່ແມ່ຜູ້ປົກຄອງທ່ານໃດມີຄວາມສົນໃຈຢາກຈະສົ່ງເສີມລູກຫຼານກ້າວໄປຕາມຄວາມໄຝ່ຝັນຕາມຈຸດປະສົງທີ່ວາງໄວ້ ສາມາດຕິດຕໍ່ໄດ້ທີ່ເບີໂທຫຼືວອດແອັບ 02077799924 ໄດ້ຕະຫຼອດເວລາ ພວກເຮົາພ້ອມທີ່ຈະພັດທະນາລູກຫຼານອະນຸຊົນ, ເຍົາວະຊົນ ແລະ ໄວໜຸ່ມກ້າວສູ່ການເປັນນັກກິລາອາຊີບຢ່າງມີຄຸນນະພາບ. ຜູ້ບໍລິຫານ ສະໂມສອນ ດອກປີກໄກ່ ເອພີ ໃຫ້ຮູ້ອີກວ່າ: ສະໂມສອນ ດອກປີກໄກ່ ເອພີ ມີສະຖານທີ່ກວ້າງຂວາງ ມີຫ້ອງວິໄອພີ ເພື່ອຕິດຕາມຊົມ-ເຊຍ ລະບົບຫ້ອງແອ ທີ່ສາມາດເກັບສຽງບໍ່ກົດດັນນັກກິລາ ເຮັດໃຫ້ນັກກິລາມີສະມາທິຫຼາຍຂຶ້ນ ແລະ ສະໜາມກິລາມີທັງໝົດ 5 ຂອດ ໄດ້ຄຸນນະພາບລະດັບສາກົນ ສາມາດນຳໃຊ້ຈັດແຂ່ງຂັນລະດັບຊາດໄດ້ຢ່າງສະດວກສະບາຍ. ສະນັ້ນຖືເອົາໂອກາດນີ້ ເຊີນບັນດານັກກິລາຜູ້ທີ່ມັກຮັກໃນການຫຼິ້ນກິລາດອກປີກໄກ່ ມາຊົມໃຊ້ສະໜາມກິລາແຫ່ງນີ້. ຂ່າວ-ພາບ: ສົງການ ພັນແພງດີ