ກອງປະຊຸມສະຫຼຸບວຽກງານຫ້ອງວ່າການແຂວງສາລະວັນ ປະຈຳປີ 2023 ແລະ ວາງທິດທາງແຜນການປີ 2024 ໄດ້ຈັດຂຶ້ນຜ່ານມາ, ທີ່ຫ້ອງການແຂວງ, ໂດຍການເຂົ້າຮ່ວມຂອງທ່ານ ສົມໃຈ ອຸ່ນຈິດ ຄະນະປະຈໍາພັກແຂວງ ຮອງເຈົ້າແຂວງສາລະວັນ ຜູ້ຊີ້ນໍາວຽກງານຫ້ອງວ່າການ, ມີບັນດາຄະນະພັກ, ຄະນະນໍາຂອງຫ້ອງວ່າການແຂວງ ແລະ ແຂກຖືກເຊີນອ້ອມຂ້າງແຂວງເຂົ້າຮ່ວມ.

ທ່ານ ສົມໃຈ ບຸນສະຫະນິມິດ ຮອງຫົວໜ້າຫ້ອງວ່າການແຂວງ ກໍໄດ້ຜ່ານຮ່າງບົດສະຫຼຸບວຽກງານ ແລະ ຕີລາຄາການຈັດຕັ້ງປະຕິບັດວຽກງານຮອບດ້ານ ໃນໄລຍະ 1 ປີຜ່ານມາໄດ້ສຸມໃສ່ການປະຕິບັດຕາມສິດ, ໜ້າທີ່ ແລະ ພາລະບົດບາດ ເປັນເສນາທິການຮັບໃຊ້ໃຫ້ຄະນະພັກແຂວງ, ເລຂາພັກແຂວງ-ເຈົ້າແຂວງ, ຮອງເລຂາພັກແຂວງ-ຮອງເຈົ້າແຂວງ, ຄະນະປະຈໍາພັກແຂວງ ແລະ ອົງການປົກຄອງແຂວງໃນການຊີ້ນໍາ-ນໍາພາ, ຖືສໍາຄັນໃນການສຶກສາອົບຮົມດ້ານການເມືອງແນວຄິດໃຫ້ແກ່ຖັນແຖວສະມາຊິກພັກ, ພະນັກງານ-ລັດຖະກອນ, ຊຸກຍູ້ໃນການຈັດຕັ້ງຜັນຂະຫຍາຍມະຕິ XI ຂອງພັກ, ມະຕິ IX ຂອງອົງຄະນະພັກແຂວງ, ລວມທັງການຈັດຕັ້ງແຜນພັດທະນາເສດຖະກິດ-ສັງຄົມ, ມີຜົນສໍາເລັດຫຼາຍດ້ານ.. ຈາກນັ້ນ, ກໍໄດ້ຜ່ານທິດທາງແຜນການ, ວຽກຈຸດສຸມທີ່ຈະສືບຕໍ່ຈັດຕັ້ງປະຕິບັດໃນປີ 2024 ຕື່ມອີກ.

ກອງປະຊຸມດັ່ງກ່າວ, ຍັງໄດ້ຜ່ານຮ່າງຂໍ້ກໍານົດວ່າດ້ວຍເລຂາການນຳຂັ້ນແຂວງ ແລະ ເມືອງ, ຮ່າງຂໍ້ຕົກລົງວ່າດ້ວຍລະບຽບການ ແລະ ກົນໄກການເຮັດວຽກຂອງຫ້ອງວ່າການແຂວງ, ທັງໄດ້ມີການປະກອບຄໍາຄິດເຫັນໃສ່ຮ່າງດັ່ງກ່າວ, ໂອກາດນີ້, ກໍ່ໄດ້ມີພິທີມອບໃບຍ້ອງຍໍໃຫ້ກັບກົມກອງ ແລະ ບຸກຄົນດີເດັ່ນໃນການຈັດຕັ້ງປະຕິບັດວຽກງານໄລຍະປີ 2023.

(ຂ່າວ-ພາບ: ວິໄລວອນ ສິດທິໄຊ)