ຄາດໝາຍແຫຼ່ງທຶນເພື່ອພັດທະນາ ຂອງປະເທດເຮົາໃນປີນີ້ ທີ່ໄດ້ຮັບການຮັບຮອງໂດຍກອງປະຊຸມສະພາແຫ່ງຊາດ ແມ່ນມີຄວາມຕ້ອງການທຶນ 56.784 ຕື້ກີບ, ເທົ່າກັບ 19,32% ຂອງລວມຍອດຜະລິດຕະພັນພາຍໃນ (GDP) ຊຶ່ງໃນນີ້ຄາດໝາຍການລົງທຶນຈາກພາກເອກະຊົນພາຍໃນ ແລະ ຕ່າງປະເທດ ສູງເປັນອັນດັບໜຶ່ງ, ຮອງລົງມາຄື ທຶນຊ່ວຍເຫຼືອທາງການເພື່ອພັດທະນາ (ODA) ແລະ ຕາມມາດ້ວຍທຶນໃນແຜນລົງທຶນຂອງລັດ, ສ່ວນການລົງທຶນຈາກແຫຼ່ງທຶນອື່ນໆ ມີຄາດໝາຍທີ່ໜ້ອຍສຸດໃນຄາດໝາຍດັ່ງກ່າວ.

ມະຕິກອງປະຊຸມສະພາແຫ່ງຊາດ ເລກທີ 118/ສພຊ, ລົງວັນທີ 21/11/2023 ວ່າດ້ວຍການຮັບຮອງບົດລາຍງານຂອງລັດຖະບານ ກ່ຽວກັບການສະຫຼຸບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແຫ່ງຊາດ ກາງສະໄໝ 5 ປີ ຄັ້ງທີ IX (2021-2025), ທິດທາງແຜນພັດທະນາເສດຖະກິດ-ສັງຄົມ ທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2023 ແລະ ແຜນພັດທະນາເສດຖະກິດ-ສັງຄົມ ປີ 2024 ໄດ້ຮັບຮອງຄາດໝາຍແຫຼ່ງທຶນເພື່ອການພັດທະນາ ຄືດັ່ງໂຕເລກຂ້າງເທິງນັ້ນ ຊຶ່ງໃນໂຕເລກດັ່ງກ່າວ ໄດ້ມີຄາດໝາຍໄວ້ໃນ 4 ແຫຼ່ງທຶນ ຄື ຈາກແຜນລົງທຶນຂອງລັດ, ຈາກ ODA, ຈາກການລົງທຶນເອກະຊົນພາຍໃນ ແລະ ຕ່າງປະເທດ, ການລົງທຶນຈາກແຫຼ່ງຕ່າງໆ (ການລົງທຶນຈາກຊຸມຊົນ).

ໃນບັນດາແຫຼ່ງທຶນນັ້ນ, ຄາດໝາຍແຜນລົງທຶນຂອງລັດ ທັງໝົດ 5.000 ຕື້ກີບ, ເທົ່າກັບ 8,81% ຂອງການລົງທຶນທັງໝົດ, ໃນນີ້ ແຜນລົງທຶນບ້ວງປົກກະຕິ 2.900 ຕື້ກີບ; ແຜນລົງທຶນບ້ວງຈົດຮັບ-ຈົດຈ່າຍ ແລະ ບ້ວງລົງທຶນອື່ນໆ 2.100 ຕື້ກີບ; ໃນນີ້ຈັດສັນໃຫ້ແຜນງານບຸລິມະສິດຂອງລັດຖະບານ 23,76% ຂອງແຜນລົງທຶນ ຈໍານວນ 5.000 ຕື້ກີບ,ເທົ່າກັບ 1.188,18 ຕື້ກີບ ຊຶ່ງມີແຜນງານຟື້ນຟູ ພື້ນຖານໂຄງລ່າງທີ່ໄດ້ຮັບຜົນກະທົບຈາກໄພພິບັດທໍາມະຊາດ 300 ຕື້ກີບ; ແຜນງານໂຄງການພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ ທົ່ວປະເທດ 160 ຕື້ກີບ;ແຜນງານໂຄງການຍຸດທະສາດ ປກຊ-ປກສ ຊາຍແດນລາວ-ກໍາປູເຈຍ ຈໍານວນ 50 ຕື້ກີບ; ແຜນງານໂຄງການພັດທະນາແຂວງ ແລະ ເມືອງເປັນຕົວແບບ ຈໍານວນ 192 ຕື້ກີບ; ແຜນງານຍົກສູງຄຸນນະພາບວຽກງານ ສຶກສາ, ສາທາລະນະສຸກ ຈໍານວນ 168 ຕື້ກີບ (ສະເໜີພິຈາລະນາເພີ່ມຕື່ມອີກ ເພື່ອແກ້ໄຂບັນຫາເຄັ່ງຮ້ອນໃນຂົງເຂດດັ່ງກ່າວ); ແຜນງານໂຄງການສົມທົບທຶນກັບໂຄງການ ODA ຈໍານວນ 100 ຕື້ກີບ; ແຜນງານວຽກງານ ປັບປຸງພື້ນຖານໂຄງລ່າງ ກະກຽມກອງປະຊຸມອາຊຽນ 18,18 ຕື້ກີບ; ແຜນງານພັດທະນາປ້ອງກັນຕາຝັ່ງເຈື່ອນ ຕາມຊາຍແດນໃນທົ່ວປະເທດ ຈໍານວນ 200 ຕື້ກີບ. ໃນຈໍານວນ 5.000 ຕື້ກີບ ທີ່ເປັນແຜນລົງທຶນຂອງລັດ ຍັງມີຄາດໝາຍໃນການຈັດສັນໃຫ້ທ້ອງຖິ່ນ 51% ຂອງແຜນລົງທຶນນີ້, ເທົ່າກັບ 2.550 ຕື້ກີບ; ຈັດສັນໃຫ້ບັນດາຂະແໜງການສູນກາງ 25,24% ຂອງແຜນລົງທຶນ ຈໍານວນ 5.000 ຕື້ກີບ, ເທົ່າກັບ 1.261,82 ຕື້ກີບ.

ມະຕິດັ່ງກ່າວ, ຍັງລະບຸກ່ຽວກັບການຈັດສັນງົບປະມານການລົງທຶນຂອງລັດ ຕາມໂຄງປະກອບໂຄງການລົງທຶນ: ໂຄງການຊໍາລະໜີ້ສິນ, ໂຄງການສືບຕໍ່, ໂຄງການສະເໜີໃໝ່ ໂດຍເນັ້ນບຸລິມະສິດຈັດສັນງົບປະມານໃຫ້ໂຄງການໜີ້ສິນ, ໂຄງການສືບຕໍ່ໃຫ້ອີງໃສ່ໜ້າວຽກປະຕິບັດສໍາເລັດ ເປັນບ່ອນອີງການຈັດສັນຕົວຈິງ ເພື່ອຮັບປະກັນຄວາມສະເໝີພາບ ແລະ ຍຸຕິທໍາ, ສ່ວນໂຄງການສະເໜີໃໝ່ໃຫ້ເນັ້ນໃສ່ໂຄງການທີ່ມີຄວາມຈໍາເປັນ ແລະ ສໍາຄັນແທ້; ໃນນັ້ນ ເອົາໃຈໃສ່ ການຈັດສັນທຶນ ໃຫ້ການບູລະນະຮັກສາເສັ້ນທາງຫຼວງແຫ່ງຊາດ, ຂະແໜງສຶກສາທິການ-ສາທາລະນະສຸກ, ສົມທົບທຶນ ODA, ທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (SMEs).

ສ່ວນການລົງທຶນເອກະຊົນພາຍໃນ ແລະ ຕ່າງປະເທດ 32.435 ຕື້ກີບ ເທົ່າກັບ 57,12% ຂອງການລົງທຶນທັງໝົດ. ຂະນະທີ່, ທຶນຊ່ວຍເຫຼືອທາງການເພື່ອການພັດທະນາ (ODA) ເປັນໂຄງການ 15.449 ຕື້ກີບ ເທົ່າກັບ 27,20% ຂອງການລົງທຶນທັງໝົດ, ໃນນີ້ ທຶນຊ່ວຍເຫຼືອມີຄາດໝາຍທີ່ 5.037 ຕື້ກີບ ແລະ ທຶນກູ້ຢືມ 10.412 ຕື້ກີບ. ນອກນີ້, ແຫຼ່ງທຶນໃນການລົງທຶນຈາກແຫຼ່ງອື່ນໆ (ການລົງທຶນຈາກຊຸມຊົນ) ແມ່ນໄດ້ຄາດໝາຍຢູ່ທີ່ 3.900 ຕື້ກີບ ເທົ່າກັບ 6,87% ຂອງການລົງທຶນທັງໝົດ.

(ຂ່າວ: ສຸກສະຫວັນ)