ວັນທີ 12 ກຸມພາ ນີ້, ການນໍາພັກ - ລັດ ແຂວງຄໍາມ່ວນ ນໍາໂດຍ ທ່ານ ວັນໄຊ ພອງສະຫວັນ ເຈົ້າ ແຂວງຄຳມ່ວນ ພ້ອມດ້ວຍຄະນະບໍລິຫານງານພັກແຂວງ, ສະພາປະຊາຊົນແຂວງ, ນາຍທະຫານ, ນາຍຕຳຫຼວດ ໄດ້ເຂົ້າວາງພວງມະລາ ແລະ ກະຕ່າດອກໄມ້ ຢູ່ອະນຸສາວະລີນັກຮົບນິລະນາມ, ອະນຸສາວະລີປະທານ ໄກສອນ ພົມວິຫານ ແລະ ອານຸສອນສະຖານ 21 ມີນາ ປະທານ ສຸພານຸວົງ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949 – 20 ມັງກອນ 2024) ແລະ ວັນສ້າງຕັ້ງ ກອງບັນຊາການທະຫານແຂວງຄຳມ່ວນ ຄົບຮອບ 65 ປີ (13 ກຸມພາ 1959 – 13 ກຸມພາ 2024) ທີ່ໄດ້ໜູນວຽນມາເຖິງອີກວາລະໜຶ່ງ  ເພື່ອລະນຶກ, ເປັນການສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈໍານົນຂອງບັນພະບູລຸດລາວ ກໍ່ຄືບັນດານັກຮົບປະຕິວັດ ທີ່ໄດ້ເສຍສະຫລະຊີວິດ, ເລືອດເນື້ອ ເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການນໍາພາ-ຊີ້ນໍາຂອງພັກປະຊາຊົນ ປະຕິວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫຼວງ, ນຳເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າ ແລະ ປະກາດເອກະລາດ, ສະຖາປະນາເປັນ ສາທາລະນະລັດ ປະຊາທິປະໄຕປະຊາຊົນລາວ ຂຶ້ນຢ່າງສະຫງ່າຜ່າເຜີຍ.
ໃນໂອກາດນີ້, ຄະນະການນໍາຂອງແຂວງ ຍັງໄດ້ໄປຢ້ຽມຢາມ ໂຮງໝໍທະຫານແຂວງຄໍາມ່ວນ ຊຶ່ງໄດ້ຮັບຟັງກ່ຽວກັບປະຫວັດ ແລະ ມູນເຊື້ອການກຳເນີດເຕີບໃຫຍ່ຂະຫຍາຍຕົວ ຂອງເຫຼົ່າຮົບ ເສນາຮັກທະຫານແຂວງຄຳມ່ວນ ແຕ່ປີ 1959 ຈົນເຖິງປັດຈຸບັນ ພ້ອມທັງໄດ້ມອບເງິນ ເພື່ອຈັດຊື້ອຸປະກອນ ປະກອບສ່ວນເຂົ້າໃນການຮັກສາປິ່ນປົວຄົນເຈັບຢູ່ພາຍໃນໂຮງໝໍທະຫານແຂວງ ລວມມູນຄ່າ 1,5 ຕື້ກວ່າກີບ.
(ຂ່າວ-ພາບ: ກອງຄໍາ)