ເມື່ອບໍ່ດົນມານີ້, ທ່ານ ຈັນທາ ສ້ວຍພະໄຕ ຮອງເຈົ້າເມືອງໆພີນ ແຂວງສະຫວັນນະເຂດ ພ້ອມດ້ວຍພາກສ່ວນກ່ຽວຂ້ອງຈາກເມືອງ, ກຸ່ມບ້ານ ແລະ ກຸ່ມປູກພືດໄດ້ລົງເຄື່ອນໄຫວ ທັດສະນະສຶກສາຖອດຖອນບົດຮຽນກ່ຽວກັບເຕັກນິກການປູກໝາກແຕງແຄນຕາລຸກຂອງກຸ່ມການປູກພືດບ້ານນາທະລັງ.
ທ່ານ ໄໝ ຊາວສວນບ້ານນາທະລັງ ໄດ້ລາຍງານໃຫ້ຮູ້ວ່າ: ຄອບຄົວຕົນເອງ ໄດ້ເລີ່ມທົດລອງການປູກໝາກແຕງແຄນຕາລຸກ ນັບແຕ່ປີ 2017 ເປັນຕົ້ນມາ, ພາຍຫຼັງທີ່ມີການເກັບກ່ຽວຜົນຜະລິດ (ໝາກແຕງແຄນຕາລຸກ) ເຫັນວ່າຕະຫຼາດມີຄວາມຕ້ອງການຫຼາຍ ຈຶ່ງມີການຂະຫາຍເນື້ອທີ່ປູກຫຼາຍຂຶ້ນ ແລະ ມາຮອດປີ 2022, ໄດ້ຖືກຮັບຮອງສ້າງເປັນກຸ່ມການປູກພືດບ້ານນາທະລັງ. ປັດຈຸບັນ ພາຍໃນກຸ່ມ ມີ 7 ຄອບຄົວ, ມີເນື້ອທີ່ປູກ 4,5 ເຮັກຕາ, ການປູກໝາກແຕງແຄນຕາລຸກ ແມ່ນເລີ່ມປູກໃນຊ່ວງເດືອນພະຈິກ ຂອງທຸກໆປີ ຫຼັງຈາກການເກັບກ່ຽວຜົນຜະລິດເຂົ້າປະຈໍາປີສໍາເລັດ ແລະ ມາໃນປີ 2023, ສາມາດເກັບກ່ຽວຜົນຜະລິດໄດ້ທັງໝົດ 20,1 ໂຕນ, ສ້າງລາຍຮັບໃຫ້ກຸ່ມ 218.000.000 ກີບ ແລະ ສໍາລັບປີ 2024 ການປູກໝາກແຕງແຄນຕາລຸກ ກຳລັງເລີ່ມມີການເກັບກູ້ ຄາດຄະເນວ່າຈະບັນລຸຜົນຜະລິດປະມານ 22 ໂຕນ, ຂາຍສົ່ງຕະຫຼາດໃນລາຄາສະເລ່ຍ 15.000ກີບ ຕໍ່ 1 ກິໂລ./. 
(ຂ່າວ: ເມືອງພີນ)