ໃນວັນທີ 12 ກຸມພາ ຜ່ານມາ, ທີ່ເດີ່ນສະໜາມຫຼວງຂອງ ແຂວງໄຊຍະບູລີ ໄດ້ຈັດພິທີເປີດງານວາງສະແດງສິນຄ້າ ໃນງານມະຫາກໍາບຸນຊ້າງ ປະຈໍາປີ 2024 ຂຶ້ນ, ເຂົ້າຮ່ວມເປັນກຽດມີທ່ານ ເພັດພິໄຊ ສູນວິໄລ, ຮອງເຈົ້າແຂວງ ປະທານຄະນະກໍາມະການຈັດງານມະຫາກໍາບຸນຊ້າງ, ມີທ່ານ ເສນ ພັນລັກ ວ່າການເຈົ້າເມືອງ ໄຊຍະບູລີ, ມີການນໍາຂອງແຂວງ, ການນໍາຂອງເມືອງ, ຕົວແທນຮ້ານວາງສະແດງສິນຄ້າຈາກ 11 ເມືອງ, ບັນດາ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.

ໃນພິທີ, ທ່ານ ເພັດພິໄຊ ສູນວິໄລ ໄດ້ກ່າວວ່າ: ເພື່ອເປັນການສ້າງບັນຍາກາດ ແລະ ປະກອບສ່ວນເຂົ້າໃນງານມະຫາກໍາບຸນຊ້າງປະຈໍາປີ 2024 ໃຫ້ເປັນຂະບວນຟົດຟື້ນ ແລະ ເພື່ອເປັນການຖອດຖອນບົດຮຽນແລກປ່ຽນຊື້-ຂາຍສິນຄ້າລະຫວ່າງນັກທຸລະກິດ, ຜູ້ຜະລິດ, ພໍ່ຄ້າ-ຊາວຂາຍໃນການຊອກ ແລະ ຂະຫຍາຍຕະຫຼາດແກ່ຜະລິດພັນໂອດ໋ອບຂອງແຂວງໃຫ້ນັບມື້ກ້າວເປັນສິນຄ້າຕິດດາວຕໍ່ໄປ, ອັນພົ້ນເດັ່ນສຳລັບສິນຄ້າທີ່ນຳມາວາງສະແດງຕະຫຼາດນັດຄັ້ງນີ້ແມ່ນໄດ້ວາງສະແດງສິນຄ້າໂອດ໊ອບ, ສິນຄ້າທີ່ເປັນທ່າແຮງຂອງແຂວງ ແລະ ການໂຄສະນາສິນຄ້າຂອງຫົວໜ່ວຍທຸລະກິດຈຳນວນໜຶ່ງ.

ການຈັດຕະຫຼາດນັດປີນີ້, ແມ່ນຕ່າງຈາກທຸກໆປີໂດຍສະເພາະແມ່ນການວາງສະແດງສິນຄ້າຂອງບັນດາເມືອງ, ຕ່າງແຂວງ ແລະ ສິນຄ້າຂອງບັນດາເຜົ່າມາຕິດພັນຢູ່ນຳ. ສໍາລັບງານບຸນປີນີ້, ມີ 12 ກິດຈະກຳຫຼັກຄື: ກິດຈະກຳຕະຫຼາດນັດ, ບໍລິການຈີກປີ້, ບໍລິການຝາກລົດ, ກິດຈະກຳຂາຍຂອງທີ່ລະນຶກ, ກິດຈະກຳຄອນເສີດ, ກິດຈະກຳເຄື່ອງຫຼີ້ນເດັກນ້ອຍສະໄລ່ເດີ, ກິດຈະກຳຖ່າຍຮູບ, ກິດຈະກຳບໍລິການຫ້ອງນ້ຳ, ກິດຈະກຳຕັ້ງແຄມ, ກິດຈະກຳໂດດຈ້ອງ, ກິດຈະກຳກາຍຍະສິນ ແລະ ກິດຈະກຳມາຍາກົນ, ໃນນັ້ນ, ປະເພດສິນຄ້າທີ່ນຳເຂົ້າມາວາງສະແດງ ແລະ ຈຳໜ່າຍໃນງານມະຫາກຳບຸນຊ້າງປະກອບມີ: ສິນຄ້າຫັດຖະກຳຈາກບັດດາເມືອງ, ສິນຄ້າປະເພດເຄື່ອງນຸ່ງຮົ່ມ, ສິນຄ້າປະເພດອຸປະໂພກ-ບໍລິໂພກ, ສິນຄ້າປະເພດເຄື່ອງດື່ມ, ສິນຄ້າປະເພດກົນຈັກ ແລະ ລົດຍົນ, ສິນຄ້າປະເພດເຄື່ອງຫຼີ້ນສຳລັບເດັກ, ມີຮ້ານວາງສະແດງສີນຄ້າເຂົ້າຮ່ວມທັງໝົດ 310 ຮ້ານ, ມີມູນຄ່າສິນຄ້າ 20 ຕື້ກວ່າກີບ.

(ຂ່າວ-ພາບ:ອຸ່ນເຮືອນ ໂພທິລັກ)