ທ່ານ ຄອນສະຫວັນ ຄໍາມູນທາ ຫົວໜ້າສ່ວຍສາອາກອນ ຮອງຫົວໜ້າສູນບໍລິການຜ່ານປະຕູດຽວເມືອງແກ່ນທ້າວ ແຂວງໄຊຍະບູລີ ໄດ້ປະກອບຄໍາເຫັນຢູ່ໃນກອງປະຊຸມ ສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ວ່າ: ສູນບໍລິການຜ່ານປະຕູດຽວຂອງເມືອງແກ່ນທ້າວປະກອບມີ 15 ຫ້ອງການເຂົ້າຮ່ວມ. ໃນໄລຍະຜ່ານມາໄດ້ເອົາໃຈໃສ່ເຄື່ອນໄຫວວຽກງານຕາມພາລະບົດບາດ ເປັນຕົ້ນແມ່ນໄດ້ບໍລິການທາງດ້ານເອກະສານໃຫ້ແກ່ນັກທຸລະກິດ, ຜູ້ປະກອບການ ແລະ ປະຊາຊົນລວມສູນຢູ່ຈຸດດຽວ, ຊຸກຍູ້ຕິດຕາມການປະກອບເອກະສານເຄື່ອນຍ້າຍສິນຄ້າ, ການເກັບລາຍຮັບຈາກຄ່າທໍານຽມ, ຄ່າບໍລິການຕ່າງໆເພື່ອມອບເຂົ້າງົບປະມານ ແລະ ສະຫຼຸບລາຍງານຂັ້ນເທິງເປັນປົກກະຕິ ຊຶ່ງສະແດງອອກ 1 ປີຜ່ານມາ ສາມາດເກັບລາຍຮັບໄດ້ທັງໝົດ 3.600 ລ້ານກວ່າກີບ.ໃນນັ້ນ, ຄ່າທຳນຽມປະຕິບັດໄດ້ 100 ລ້ານກວ່າກີບ, ຄ່າບໍລິການ 800 ລ້ານກວ່າກີບ, ລາຍຮັບຈາກສ່ວຍສາອາກອນ (ອາກອນເຄື່ອນຍ້າຍ) 2.700 ລ້ານກ່ວາກີບ.

ການບໍລິການປະກອບເອກະສານເຄື່ອນຍ້າຍສິນຄ້າອອກຕ່າງປະເທດຈໍານວນ 3 ແສນກວ່າໂຕນ, ມູນຄ່າ75 ລ້ານກວ່າໂດລາ ປະກອບມີ: ສາລີ 22.000 ກ່ວາໂຕນ, ໝາກເດີອຍ 4.100 ໂຕນ, ມັນແຫ້ງ 297.000 ໂຕນ, ຖົ່ວດິນຝັກ 19 ໂຕນ, ຖົ່ວແດງ 500 ກວ່າໂຕນ, ໝາກງາ 540 ກວ່າໂຕນ, ປໍສາ 25 ໂຕນ, ແກນສາລີ 4.500 ກວ່າໂຕນ, ແກ່ນຫຍ້າ 90 ກວ່າໂຕນ, ກາກມັນຕົ້ນ 5.000 ກວ່າໂຕນ, ຂີງ 90 ກວ່າໂຕນ. ການອອກໃບຢັ້ງຢືນເຄື່ອນຍ້າຍສິນຄ້າພາຍໃນປະເທດໄດ້ເຄື່ອນຍ້າຍສັດລ້ຽງລວມມູນຄ່າທັງຫມົດ 14.000 ລ້ານກວ່າກີບ. ໃນນັ້ນ., ປະກອບມີ ຄວາຍ 1.200 ກ່ວາໂຕ, ງົວ 2.600 ໂຕ, ໝູພັນ 300 ກວ່າໂຕ, ໝູລາດ 570 ກວ່າໂຕ, ມ້າ 200 ກວ່າໂຕ, ເຂົ້າເປືອກ 25 ໂຕນ, ແບ້ 160 ກວ່າໂຕ, ສາລີ 250 ໂຕນ, ໜໍ່ໄມ້ 5 ໂຕນ.

ໃນຕໍ່ໜ້າ ສູນບໍລິການຜ່ານປະຕູດຽວເມືອງແກ່ນທ້າວ ຈະໄດ້ສືບຕໍ່ລົງເຊື່ອມຊຶມບັນດານິຕິກໍາທີ່ກ່ຽວກັບວຽກງານບໍລິການຜ່ານປະຕູດຽວໃຫ້ອົງການປົກຄອງບ້ານ, ບັນດາຫົວໜ່ວຍທຸລະກິດ-ຜູ້ປະກອບການ ແລະປະຊາຊົນໃຫ້ຮັບຮູ້ ແລະ ເຂົ້າໃຈເພື່ອເຮັດໃຫ້ແຕ່ລະພາກສ່ວນເຂົ້າໃຈຕໍ່ລະບຽບການຕ່າງໆ, ຊຸກຍູ້ຂະແໜງການທີ່ກ່ຽວຂ້ອງ ເອົາໃຈໃສ່ເຄື່ອນໄຫວວຽກງານການບໍລິການຜ່ານປະຕູດຽວ ໃຫ້ເປັນປົກກະຕິ, ເອົາໃຈໃສ່ບໍລິການເອກະສານເພື່ອຫຼຸດຜ່ອນຄວາມຫຍຸ້ງຍາກໃຫ້ແກ່ປະຊາຊົນທີ່ມາໃຊ້ບໍລິການທີ່ມີຫຼາຍຂອດ, ຫຼາຍຂັ້ນ ໃຫ້ສະດວກວ່ອງໄວຂຶ້ນກວ່າເກົ່າ, ປະສານງານກັບຄະນະຮັບຜິດຊອບອຳນວຍຄວາມສະດວກທາງດ້ານການຄ້າຂັ້ນເມືອງ, ກວດກາບັນດາເອກະສານຕ່າງໆເຊັ່ນ: ໃບອານຸຍາດ, ໃບເຄື່ອນຍ້າຍຂອງຜູ້ປະກອບການ ໃຫ້ຖືກຕ້ອງຕາມລະບຽບການ ແລະ ປະກອບພັນທະຕ່າງໆຜ່ານລະບົບຄັງເງິນ ໃຫ້ຄົບຖ້ວນ ແລະ ສືບຕໍ່ຊຸກຍູ້ບັນດາຂະແໜງການທີ່ມີລາຍຮັບ ຈາກຄ່າທໍານຽມ ແລະ ຄ່າບໍລິການຕ່າງໆ ເກັບລາຍຮັບໃຫ້ຖືກຕ້ອງຕາມລັດຖະບັນຍັດຂອງປະທານປະເທດ, ພ້ອມທັງປະຕິບັດຕາມແຜນມອບເໝົາຂອງແຕ່ລະຂະແໜງການ ໃຫ້ໄດ້ຕາມຄາດໝາຍ ແລະ ລື່ນຄາດໝາຍ.

(ຂ່າວ: ແກ່ນທ້າວ).