ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດພິທີເຜີຍແຜ່, ເຊື່ອມຊຶມເອກະສານແນວຄິດຊີ້ນຳ ຂອງ ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ກ່ຽວກັບ ”ເສດຖະກິດເອກະລາດເປັນເຈົ້າຕົນເອງ” ແລະ ປາຖະກະຖາເລົ່າມູນເຊື້ອ ການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ຄົບຮອບ 68 ປີ ຂຶ້ນໃນວັນທີ 14 ກຸມພານີ້ ທີ່ກະຊວງດັ່ງກ່າວ ຊຶ່ງມີ ຄະນະປະຈຳພັກ, ຄະນະນຳກະຊວງ, ຄະນະພັກຮາກຖານ, ຄະນະໜ່ວຍພັກ, ຄະນະບໍລິຫານງານສະຫະພັນກຳມະບານກະຊວງ, ສະມາຊິກພັກ ແລະ ສະມາຊິກກຳມະບານເຂົ້າຮ່ວມ
ໃນພິທີ ສະຫາຍ ມະໄລທອງ ກົມມະສິດ ກຳມະການສຳຮອງສູນກາງພັກ ເລຂາຄະນະພັກ ລັດ ຖະມົນຕີກະຊວງ ອຄ ໄດ້ເຜີຍແຜ່, ເຊື່ອມຊຶມເອກະສານແນວຄິດຊີ້ນຳ ຂອງສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ກ່ຽວກັບ ”ເສດຖະກິດເອກະລາດເປັນເຈົ້າຕົນເອງ” ແລະ ສະຫາຍ ເລັດ ໄຊຍະພອນ ກຳມະການສູນກາງພັກ ເລຂາຄະນະພັກ ປະທານຄະນະບໍລິຫານງານສູນກາງສະຫະພັນກຳມະບານລາວ ໄດ້ປາຖະກະຖາເລົ່າມູນເຊື້ອ ການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ຄົບຮອບ 68 ປີ
ໃນການຈັດຕັ້ງເຜີຍແຜ່ເອກະສານສຳຄັນຄັ້ງນີ້ ແມ່ນເພື່ອໂຄສະນາເຜີຍແຜ່ເຊື່ອມຊຶມ ທິດຊີ້ນຳຂອງ ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ຕໍ່ວຽກງານການເງິນທົ່ວປະເທດ ເປັນຕົ້ນແມ່ນ ການວາງນະໂຍບາຍ, ລະບົບເສດຖະກິດ ຂອງຊາດ ຈາກລະບອບເສດຖະກິດ ທີ່ເຕັມໄປດ້ວຍການເພິ່ງພາ, ເອື່ອຍອີງ ໃຫ້ກ້າວໄປສູ່ລະບົບ ແລະ ລະບອບເສດຖະກິດ “ເອກະລາດ, ເປັນເຈົ້າຕົນເອງ”.ແລະ ເພື່ອຫວນຄືນມູນເຊື້ອການກຳເນີດ, ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ໃນຕະຫຼອດໄລຍະ 68 ປີ ຊຶ່ງເປັນຕົວແທນໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ໃນການປະກອບສ່ວນອັນສຳຄັນເຂົ້າໃນພາລະກິດປົດປ່ອຍປະເທດຊາດໃນເມື່ອກ່ອນກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ, ທັງແນໃສ່ປຸກລະດົມ ແລະ ປູກຈິດສຳນຶກໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານເວົ້າລວມ, ເວົ້າສະເພາະ ແມ່ນສະມາຊິກກຳມະບານທົ່ວ ກະຊວງ ອຄ ໃຫ້ມີຄວາມບຸກບືນ, ຕັ້ງໜ້າປະກອບສ່ວນເຂົ້າໃນການ ເຄື່ອນໄຫວວຽກງານກຳມະບານ, ສ້າງຂະບວນການແຂ່ງຂັນ 5 ເປັນເຈົ້າ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຕິດພັນກັບການປະຕິບັດໜ້າທີ່ວິຊາສະເພາະ ແລະ ຂະບວນການຜະລິດ, ສ້າງທັດສະນະໃນການອອກແຮງງານທີ່ມີລະບຽບວິໄນໃຫ້ກວ້າງຂວາງ ແລະ ຝົດຟື້ນກວ່າເກົ່າ.
(ຂ່າວ-ພາບ: ສຳນານ)
