ໃນວັນທີ 14 ກຸມພາ ຜ່ານມາ ທີ່ຫ້ອງວ່າການເມືອງຍົມມະລາດ ແຂວງຄໍາມ່ວນ ໄດ້ຈັດພິທີເຊັນບົດບັນທຶກ ມອບ-ຮັບ 3 ໂຄງການທີ່ໄດ້ຮັບການຊ່ວຍເຫຼືອຈາກບໍລິສັດໄຟຟ້ານໍ້າເທີນ 2 ໃຫ້ອົງການປົກຄອງເມືອງຍົມມະລາດ ມູນຄ່າ 109.768 ໂດລາ ຊຶ່ງປະກອບມີ: ການກໍ່ສ້າງຊົນລະປະທານປ່ອງ 4 ແລະ ອ່າງພັກນໍ້າ, ການສ້ອມແປງເສັ້ນທາງຫຼວງແຫ່ງຊາດ 1E ແລະ ອຸປະກອນການແພດ  ລະຫວ່າງ ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ແລະ ທ່ານ ມາກ ອ່ອງຕວນ ຣູບ ຜູ້ອໍານວຍການໃຫຍ່ບໍລິສັດໄຟຟ້ານໍ້າເທີນ 2, ໂດຍມີຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ ແລະ  ແຂກຖືກເຊີນເຂົ້າຮ່ວມເປັນສັກຂີພະຍານ.
    ທ່ານ ຜູ້ອໍານວຍການບໍລິສັດໄຟຟ້ານໍ້າເທີນ 2 ໄດ້ກ່າວວ່າ: ຂ້າພະເຈົ້າມີຄວາມພາກພູມໃຈຫຼາຍທີ່ ບໍລິສັດ ໄດ້ເປັນສ່ວນໜຶ່ງໃນການຊ່ວຍເຫຼືອພັດທະນາພື້ນຖານໂຄງລ່າງ ພ້ອມທັງສ້າງເງື່ອນໄຂສໍາລັບສົ່ງເສີມຄວາມຢືນຍົງ ແລະ ການພັດທະນາເສດຖະກິດ-ສັງຄົມໃຫ້ແກ່ຊຸມຊົນອ້ອມຂ້າງໂຄງການ. ການມອບ 3 ໂຄງການຄັ້ງນີ້, ລວມມີມູນຄ່າທັງໝົດ 109.768 ໂດລາ. ປະກອບມີ ໂຄງການກໍ່ສ້າງຊົນລະປະທານປ່ອງ 4 ທີ່ມີຄວາມຍາວ 200 ແມັດ ແລະ ອ່າງພັກນໍ້າ ເພື່ອນໍາໃຊ້ນໍ້າສໍາລັບການປູກຝັງໃນລະດູແລ້ງຂອງປະຊາຊົນຢູ່ບ້ານຍົມມະລາດໃຕ້ ແລະ ບ້ານຖໍ້າພວງ; ຄາດຄະເນຕອບສະໜອງພື້ນທີ່ທໍາການຜະລິດນາແຊງເບື້ອງຕົ້ນແມ່ນ 84,76 ເຮັກຕາ.  ການສ້ອມແປງທາງຫຼວງແຫ່ງຊາດ 1E ເຂດບ້ານ ສ້າງແກ້ວ ລະຫວ່າງ ເຂື່ອນດັດສົມນໍ້າ ຫາ ເຮືອນຈັກ ມີຄວາມຍາວ 150 ແມັດ ແລະ ອຸປະກອນການແພດໃຫ້ກັບທິມສຸກເສີນຂອງໂຮງໝໍເມືອງຍົມມະລາດ.
    ທ່ານ ບຸນທັນ ເຈົ້າເມືອງຍົມມະລາດ ຍັງໄດ້ສະແດງຄວາມຂອບໃຈ ມາຍັງທ່ານຜູ້ອໍານວຍການໃຫຍ່ບໍລິສັດໄຟຟ້ານ້ຳເທີນ2 ພ້ອມຄະນະ ທີ່ໃຫ້ການຊຸກຍູ້ຊ່ວຍເຫຼືອ ເປັນຜົນງານອັນລ້ຳຄ່າ ຕິດພັນກັບຍຸດທະສາດການພັດທະນາຂອງເມືອງ, ເວົ້າສະເພາະແມ່ນພັດທະນາເພື່ອຍົກລະດັບຊີວິດການເປັນຢູ່ຂອງພໍ່ແມ່ປະຊາຊົນໃນເຂດລຸ່ມເຂື່ອນເຮືອນຈັກ ບໍລິສັດ ໄຟຟ້ານໍ້າເທີນ2, ສ້າງເງື່ອນໄຂສໍາລັບສົ່ງເສີມຄວາມຍືນຍົງ ແລະ ການພັດທະນາເສດຖະກິດ-ສັງຄົມ ໃຫ້ແກ່ຊຸມຊົນອ້ອມຂ້າງໂຄງການກໍຄືບ້ານ ແລະ ເມືອງ, ຕິດພັນກັບວຽກງານກະສິກຳ, ຄົມມະນາຄົມ ແລະ ສາທາລະນະສຸກ.
(ຂ່າວ: ມະນີວັນ)