ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ຂອງເມືອງຊະນະຄາມ ແຂວງວຽງຈັນ ປະຈຳປີ 2023 ແລະ ທິດທາງແຜນການ ປີ 2024 ໄດ້ໄຂຂຶ້ນໃນວັນທີ 16 ກຸມພາ ຜ່ານມາ ທີ່ເມືອງດັ່ງກ່າວ ໂດຍການເປັນປະທານຂອງທ່ານ ແກ້ວ ພິມມະວົງ ເຈົ້າເມືອງຊະນະຄາມ, ມີທ່ານ ສີສະຫວັນ ແກ້ວພົມມະຈັນ ຮອງຫົວໜ້າພະແນກການເງິນແຂວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ອຸດອນ ທອງສະຫວັນ ຫົວໜ້າຫ້ອງການໆເງິນເມືອງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ແຜນງົບປະມານແຫ່ງລັດ ຂອງເມືອງຊະນະຄາມ ປະຈຳປີ 2023 ແລະ ທິດທາງແຜນການ ປີ 2024.ໂດຍສະເພາະການຈັດຕັ້ງປະຕິບັດແຜນງົບປະມານແຫ່ງລັດໃນໄລຍະ 1 ປີຜ່ານການຈັດຕັ້ງປະຕິບັດມາດຕະການຕ່າງໆ ສາມາດເກັບລາຍຮັບງົບປະມານໄດ້ທັງໝົດ 22 ຕື້ກວ່າກີບ ເທົ່າກັບ 124,72%; ຂອງແຜນການ(ແຜນການ 17 ຕື້ກວ່າກີບ) ທຽບໃສ່ປີຜ່ານມາເທົ່າກັບ 144.95% ເພີ້ມຂຶ້ນ 8 ຕື້ກວ່າກີບ.

ສ່ວນທິດທາງແຜນການປີ 2024 ຈະສືບຕໍ່ຈັດຕັ້ງປະຕິບັດຕາມມະຕິກອງປະຊຸມໃຫຍ່ອົງຄະນະພັກເມືອງ ຊະນະຄາມ ຄັ້ງທີ VII ກໍຄືແຜນພັດທະນາ 5 ປີຄັ້ງທີ VII ຂອງເມືອງ ແລະ ແຜນງົບປະມານແຫ່ງລັດ 5 ປີ (2020-2024) ທັງເປັນການສືບຕໍ່ໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ການຈັດຕັ້ງປະຕິບັດຕາມຂໍ້ຕົກລົງຂອງເຈົ້າແຂວງວຽງຈັນ ກ່ຽວກັບການແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ອື່ນໆ.

(ພາບ-ຂ່າວ: ເມືອງຊະນະຄາມ)